ހޮނިހިރު ދުވަހުގެ ރޭ ރަޝިއާއިން ޔުކްރެއިންގެ ހުޅަނގު ސަރަހައްދުގައި ހިމެނޭ ޗެރްނިވްސްޓީ ސިޓީއަށް ދިން ވައިގެ ހަމަލާގައި މަދުވެގެން 2 މީހަކު މަރުވެ، މުޅި ޤައުމުން 38 މީހަކަށް އަނިޔާވެއްޖެ ކަމަށް ޔުކްރެއިންގެ އިސް ވެރިން ބުނެފިއެވެ.
މި ހަމަލާތަކުގައި އިރުމަތީ ސަރަހައްދުގައި ހިމެނޭ ހާކިވް އަދި ސުމީ އިން ފެށިގެން ހުޅަނގު ސަރަހައްދުގައި ހިމެނޭ ލްވިވް، ލުޓްސްކް އަދި ޗެރްނިވްސްޓީއަށް ދެވުނު ހަމަލާތަކުގައި އާންމު ރައްޔިތުންގެ ވަސީލަތްތަކަށް ގެއްލުން ލިބިފައިވެއެވެ. ރަޝިއާގެ ދިފާއީ މިނިސްޓްރީން ބުނެފައިވަނީ ލްވިވް، ހާކިވް އަދި ލުޓްސްކްގައި ހުރި ޔުކްރެއިންގެ މިލިޓަރީ-އިންޑަސްޓްރިއަލް ކޮމްޕްލެކްސްތަކާއި މިލިޓަރީ އެއަރޯޑްރޯމްއަކަށް ހަމަލާދީފައިވާ ކަމަށެވެ
ޔުކްރެއިންގައި ހުންނަ އދ.ގެ އިންސާނީ ހައްޤުތަކުގެ މޮނިޓަރިންގ މިޝަންއިން ބުނެފައިވާ ގޮތުގައި ޖޫން މަހަކީ ވޭތުވެދިޔަ 3 އަހަރު ތެރޭގައި އެންމެ ގިނަ އާންމުންނަށް ގެއްލުން ލިބުނު މަހެވެ. މި މަހު 232 މީހަކު މަރުވެ، 1،343 މީހަކަށް އަނިޔާވެފައިވެއެވެ.
ސިޔާސީ އަދި ޑިޕްލޮމެޓިކް ކަންކަން
އުތުރު ކޮރެއާގެ ލީޑަރު ކިމް ޖޮންގ އުން، ރަޝިއާގެ ފޮރިން މިނިސްޓަރު ސަރގޭ ލަވްރޯވްއަށް ބުނެފައިވަނީ ޔުކްރެއިންގައި ރަޝިއާއިން އަޅާ ހުރިހާ ފިޔަވަޅުތަކަށް "އެއްވެސް ޝަރުތަކާ ނުލައި" އެހީތެރިވެދޭން ތައްޔާރަށް ހުރި ކަމަށެވެ. މީގެ ކުރިން ލަވްރޯވް ވަނީ އުތުރު ކޮރެއާގެ ފޮރިން މިނިސްޓަރު ޗޯއީ ސޮން ހުއީއާ ވޮންސަންގައި ބައްދަލުކޮށް، ދެ ޤައުމުގެ ސިޔާދަތާއި ސަރަހައްދީ ސަލާމަތް ރައްކާތެރިކުރުމަށް އެއްބާރުލުން ދިނުމަށް އެއްބަސްވެފައެވެ.
ސްލޮވާކިއާގެ ބޮޑުވަޒީރު ރޮބަޓް ފިކޯ ވަނީ ރަޝިއާގެ ގޭސް ސަޕްލައި ހުއްޓާލުމުން އެ ޤައުމަށް ލިބިދާނެ ގެއްލުންތަކުން ރައްކާތެރިވުމަށް އީޔޫއާއެކު އެއްބަސްވުމަކަށް އާދެވޭތޯ މަސައްކަތްކުރަމުންދާ ކަމަށް ބުނެފައެވެ. ސްލޮވާކިއާއިން ވަނީ 2028 އިން ފެށިގެން ރަޝިއާގެ ގޭސް އިމްޕޯޓްކުރުން ހުއްޓާލުމަށް ހުށަހަޅާފައިވާ އީޔޫގެ 18 ވަނަ ދަޅަ ފިޔަވަޅުތަކަށް އިއުތިރާޒުކޮށްފައެވެ.
