އެމެރިކާއިން ރަޝިޔާއާއެކު ވެފައިވާ ޑީސަލް އެއްބަސްވުމަށް ޔޫކްރެއިންގެ ރައީސް ވޮލޮޑިމީރް ޒެލެންސްކީ ފާޑުވިދާޅުވުމާ ގުޅިގެން، ޔޫކްރެއިނަށް އައު ރައީސަކު ހޮވަންވީ ވަގުތު ޖެހިއްޖެ ކަމަށް އެމެރިކާގެ ރައީސް ޑޮނަލްޑް ޓްރަމްޕް ވިދާޅުވެއްޖެ އެވެ.

ވައިޓް ހައުސްގެ ބޭރުގައި ނޫސްވެރިންނާ ވާހަކަދައްކަވަމުން ޓްރަމްޕް ހޮނިހިރު ދުވަހު ވިދާޅުވީ، ރަޝިޔާގެ ތެޔޮ ސާފުކުރާ ކާރުޚާނާތަކަށް ޙަމަލާދިނުމުގެ ހުއްދަ ދެއްވައިގެން ޒެލެންސްކީ މަސައްކަތް ކުރައްވަނީ މުޅި ދުނިޔެއަށް މައްސަލަތައް ކުރިމަތިކުރަން ކަމަށެވެ. އަދި އެފަދަ ޙަމަލާތައް ވަގުތުން ހުއްޓާލުމަށް އިންޒާރު ދެއްވަމުން، އެއްބަސްވުމަކަށް އާދެވޭނެ އައު ވެރިއަކު ޔޫކްރެއިނަށް ގެންނަންޖެހޭ ކަމަށްވެސް ޓްރަމްޕް ވިދާޅުވި އެވެ. ޓްރަމްޕްގެ މި ވާހަކަތަކަށް މަރުޙަބާ ދަންނަވަމުން ރަޝިޔާގެ ރައީސް ލަޑިމިއާ ޕޫޓިންގެ މަންދޫބު ކިރިލް ދިމިތުރީވް ވިދާޅުވީ މިއީ ތާރީޚީ ވާހަކަތަކެއް ކަމަށާއި ޔޫކްރެއިނަށް ބޭނުންވަނީ ޞުލްޙައަށް އިސްކަންދޭ ލީޑަޝިޕެއް ކަމަށެވެ.

އަންނަ އަހަރުގެ އެޕްރީލް 7 އާ ހަމައަށް ރަޝިޔާގެ ޑީސަލް އެކްސްޕޯޓް ކުރުމުގެ ދަތިކުރުމުގެ ފިޔަވަޅުތައް މެދުކަނޑާލުމަށް އެމެރިކާއިން އެއްބަސްވެފައިވާކަން ޓްރަމްޕް ހާމަކުރެއްވުމުން، ޒެލެންސްކީ ވަނީ އެކަމަށް ވަރަށް ބޮޑަށް ފާޑުވިދާޅުވެފަ އެވެ. ޒެލެންސްކީ ވިދާޅުވީ މި އެއްބަސްވުމުގެ ސަބަބުން ރަޝިޔާއަށް ހަނގުރާމަ ކުރިއަށް ގެންދިއުމަށް ފައިސާ ލިބިގެންދާނެ ކަމަށާއި، މިއީ ޕޫޓިންއަށް ދެވުނު "ހަދިޔާއެއް" ކަމަށެވެ. އަދި މި އެއްބަސްވުމާއެކު ޒަޕޮރީޜިޔާއަށް ރަޝިޔާއިން ދިން ނުރައްކާތެރި ޙަމަލާތަކަށް އިޝާރާތް ކުރައްވައި، ރަޝިޔާއިން ދެކެނީ މިއީ ރަށްތަކަށް ބޮންއެޅުމަށް ލިބުނު ހުއްދައެއްގެ ގޮތުގައި ކަމަށްވެސް އޭނާ ތުހުމަތު ކުރެއްވި އެވެ.

އެމެރިކާއިން މިފަދަ ނިންމުމެއް ނިންމާފައި މިވަނީ، އެމެރިކާއާއި އިސްރާއީލުން އީރާނާ ދެކޮޅަށް ފެށި ހަނގުރާމައިގެ ސަބަބުން ހޮރްމޫޒް ކަނޑުއޮޅި ބަންދުވެ، ދުނިޔޭގެ ބާޒާރުގައި ތެލުގެ އަގު އިންތިހާއަށް އުފުލިފައިވާ ދަނޑިވަޅެއްގަ އެވެ. އެމެރިކާގައި ކުރިއަށް އޮތް މިޑްޓާމް އިންތިޚާބާ ދިމާކޮށް ތެލުގެ އަގު ހެޔޮކުރުމަށް ޓްރަމްޕް މަސައްކަތް ކުރައްވާއިރު، މިހާރު އެމެރިކާގައި ޑީސަލް ގަހަނާއެއްގެ އަގު ވަނީ 6.28 ޑޮލަރަށް އަރާފަ އެވެ. އެއްބަސްވުމުގެ ދަށުން ރަޝިޔާއިން ފުރަތަމަ ފިޔަވަހީގައި 300،000 ޓަނުގެ ޑީސަލް، އަދި ނޮވެމްބަރު މަހު އިތުރު 500،000 ޓަނު ދޫކުރުމަށް ވަނީ ހަމަޖެހިފަ އެވެ.

އެމެރިކާއާއި ރަޝިޔާގެ މި އެއްބަސްވުމާ ގުޅިގެން ވިލާތުގެ އިއްތިހާދުންވެސް ވަނީ ކަންބޮޑުވުން ފާޅުކޮށްފަ އެވެ. އީޔޫގެ ޚާރިޖީ ސިޔާސަތާ ބެހޭ ވެރިޔާ ކާޖާ ކައްލާސް ވިދާޅުވީ، ދަތިކުރުމުގެ ފިޔަވަޅުތައް ލުއިކުރުމަކީ ރަޝިޔާއަށް ހަނގުރާމަ ފުޅާކުރުމަށް އާމްދަނީ ހޯދައިދިނުން ކަމަށާއި ވިލާތުން އެފަދަ ލުޔެއް ނުދޭނެ ކަމަށެވެ. އަދި އަންނަ ހޯމަ ދުވަހު ރަޝިޔާއާ ދެކޮޅަށް ވަރުގަދަ އައު ދަތިކުރުމުގެ ފިޔަވަޅުތަކެއް އެޅުމަށް ނިންމާފައިވާ ކަމަށްވެސް އޭނާ ވިދާޅުވި އެވެ.

މީގެއިތުރުން އިނގިރޭސިވިލާތުގެ ބޮޑުވަޒީރު އެންޑީ ބާންހަމް ވަނީ ޒެލެންސްކީއަށް ފޯނުން ގުޅުއްވައި އެއްބާރުލުން އޮތްކަން ހާމަކުރައްވާފަ އެވެ. އަދި ދުނިޔޭގެ ބާޒާރަށް ކާބޯތަކެއްޗާއި ހަކަތަ ލިބުން ފަސޭހަކުރުމަށްޓަކައި، ކަޅުކަނޑުގެ އުޅަނދުފަހަރަށް ދޭ ޙަމަލާތައް ހުއްޓާލައި ހަކަތައިގެ ވަގުތީ ސުލްހައަކަށް ރަޝިޔާއިން އެއްބަސްވާންޖެހޭ ކަމަށް ދެ ލީޑަރުން ވަނީ ފާހަގަކުރައްވާފަ އެވެ.

ޔޫކްރެއިންގައި 2022 ވަނަ އަހަރު ހަނގުރާމަ ފެށުނީއްސުރެ މާޝަލް ލޯ އިޢުލާނުކޮށް އިންތިޚާބުތައް ވަނީ މެދުކަނޑާލާފަ އެވެ.