އެމެރިކާގެ ރައީސް ޑޮނަލްޑް ޓްރަމްޕްގެ ދަނބިދަރިކަލުން ޖެރެޑް ކުޝްނަރ، އިސްރާއީލުން ދެކޮޅު ހަދަމުންދާ ޣައްޒާއާ ގުޅޭ 15 ނުކުތާގެ ޕްލޭނާ ބެހޭގޮތުން މަޝްވަރާ ކުރެއްވުމަށް އިސްރާއީލުގެ ބޮޑުވަޒީރު ބެންޖަމިން ނަތަންޔާހޫއާ ބައްދަލުކުރައްވަން ހަމަޖެހިއްޖެއެވެ.

ހޯމަ ދުވަހު މި ބައްދަލުވުން ބޭއްވުމަށް ހަމަޖެހިފައިވާއިރު، އޭގެ އެއް ދުވަސް ކުރިން ކުޝްނަރ ވަނީ މިސްރުގެ އަލްއަލަމައިންއަށް ޒިޔާރަތްކުރައްވައި ގަތަރު، ތުރުކީ އަދި މިސްރުގެ މެދުވެރިންނާ ބައްދަލުކުރައްވާފައެވެ. 

މި ދަތުރުފުޅުގައި ބޯޑް އޮފް ޕީސްގެ ޑިރެކްޓަރ ޖެނެރަލް ނިކޮލައި މްލަދެނޯވް އަދި އިނގިރޭސިވިލާތުގެ ކުރީގެ ބޮޑުވަޒީރު ޓޯނީ ބްލެއާ ވެސް ބައިވެރިވެވަޑައިގެންނެވިއެވެ. މީގެއިތުރުން ކުޝްނަރ ވަނީ ހަމާސްގެ ސިޔާސީ ލީޑަޝިޕްގެ މެންބަރުންނާ ވެސް ވަރަށް ނާދިރު ބައްދަލުވުމެއް ބާއްވަވާފައެވެ. މިކަމާ ގުޅޭ މައުލޫމާތު އެނގޭ އޮފިޝަލަކު އަލްޖަޒީރާއަށް މައުލޫމާތު ދެއްވި ގޮތުގައި، މި ބައްދަލުވުމުގެ މަގުސަދަކީ އެއްބަސްވުމުގެ ޒިންމާތައް އަމަލީ ގޮތުން ފެންނަ ފިޔަވަޅުތަކަކަށް ބަދަލުކުރުމެވެ.

ޖުލައި މަހުގެ ފަހުކޮޅު ޓްރަމްޕް ވަނީ ހަމާސް ހަތިޔާރު އެޅުން ހުއްޓުވުމަށް އެއްބަސްވުމަކަށް އާދެވިފައިވާ ކަމަށް ވިދާޅުވެފައެވެ. މި އެއްބަސްވުމަކީ ފެބްރުއަރީ 2026 ގައި އުފައްދައި، ޓްރަމްޕް އުމުރު ދުވަހުގެ ޗެއާޕާސަންގެ ގޮތުގައި ހުންނަވާ، ފަލަސްތީނުގެ އެއްވެސް މަންދޫބަކު ނުހިމެނޭ ގޮތަށް ގާތްގަނޑަކަށް 40 ގައުމެއް ބައިވެރިވާ އެމެރިކާ އިސްވެ ހިންގާ ބޯޑް އޮފް ޕީސްގެ މަސައްކަތެކެވެ.

އަންނަ އޮކްޓޫބަރު މަހު އަލުން އިންތިހާބުވުމަށް މަސައްކަތް ކުރައްވަމުން ގެންދަވާ ނަތަންޔާހޫ ވަނީ މި ޕްލޭނަށް ފާޅުގައި ދެކޮޅު ހައްދަވާފައެވެ. އޭނާ ދެކޮޅު ހައްދަވަނީ އިސްރާއީލު ސިފައިން ޣައްޒާއިން ފޭބުމުގެ ބަދަލެއްގެ ގޮތުގައި، ހަމާސްއިން މަޑުމަޑުން ހަތިޔާރު ބަހައްޓައި ޣައްޒާގެ ވެރިކަން ބައިނަލްއަގުވާމީ ފައުޖަކާ ހަވާލުކުރަންޖެހޭ މާއްދާއަށެވެ.

ހަމާސް ޖަމާއަތުން ބުނެފައިވަނީ އެ ޕްލޭން ގަބޫލުކުރާ ކަމަށާއި ނަމަވެސް އެކަން ތަންފީޒު ކުރެވޭނީ އިސްރާއީލުން ވެސް ވެފައިވާ ވައުދުތައް ފުއްދައި، ޣައްޒާއިން ސިފައިން ބާލައި ހަމަލާތައް ހުއްޓާލުމުން ކަމަށެވެ. 

ޑިޕްލޮމެޓިކް ގޮތުން ދިމާވެފައިވާ މި ހުރަސްތައް ނައްތާލުމަށްޓަކައި ކުޝްނަރ އިސްވެ ހުންނަވައިގެން ވަފުދެއް މިސްރަށާއި އިސްރާއީލަށް ޒިޔާރަތްކުރައްވާނެކަން ބޯޑް އޮފް ޕީސްގެ އޮފިޝަލުން ވަނީ މިދިޔަ ހަފްތާގައި ކަށަވަރުކޮށްދީފައެވެ.