ކަނު ބަނދެވިގެން ރާއްޖެ އަނދަވަޅަކާ ދިމާލަށް ދިއުމަށް އެމްޑީޕީން ދޫކޮށްނުލާނެ ކަމަށާއި، ރައީސް ޑރ. މުޙައްމަދު މުޢިއްޒުގެ ސަރުކާރު ބަދަލުކޮށް ރައްޔިތުންނަށް އެމްޑީޕީން އަލުން ހެޔޮވެރިކަމެއް ކޮށްދޭނެ ކަމަށް ކުރީގެ ރައީސް މުޙައްމަދު ނަޝީދު ވިދާޅުވެއްޖެ އެވެ.
އެމްޑީޕީގެ ކޮންގްރެސް ހުޅުވުމުގެ ރަސްމިއްޔާތުގައި ވާހަކަފުޅު ދައްކަވަމުން ރައީސް ނަޝީދު ވިދާޅުވީ، ސަރުކާރުގެ އިޤްތިޞާދީ ސިޔާސަތުތަކުގެ ސަބަބުން ޤައުމު ދަނީ ނުރައްކަލާ ދިމާލަށް ކަމަށެވެ. "ބަތްކައްކާ ކުޅުން މީޒާނެއް ނެތް. ލާހޫރޭ އިގްތިސާދީ ސިޔާސަތުތަކެއް މި ދިވެހިރާއްޖެ މިގެންދަނީ ކަނު ބަނދެވިގެން ތިބެ އަނދަވަޅަކަށް ވެއްޓުމަށް. އަޅުގަނޑުމެންނެއް މި ޕާޓީއެއް އެ މަގަށް މި ރާއްޖެ ދިއުމަކަށް ދުލެއް ނުކޮށްލެވޭނެ،"ނަޝީދު ވިދާޅުވި އެވެ.
ރައީސް ނަޝީދު އިތުރަށް ވިދާޅުވީ މި ސަރުކާރު ބަދަލުކޮށް އެމްޑީޕީގެ ވެރިކަމެއް އަލުން ޤާއިމުކުރައްވާނެ ކަމަށެވެ. "އަޅުގަނޑުމެން ރައީސް މުއިއްޒު ބަދަލުކުރާނަން. މި ދިވެހިރާއްޖޭގެ ރައްޔިތުންނަށް އަޅުގަނޑުމެން ހެޔޮ ވެރިކަމެއް ހޯދައިދޭނަން. މި ސަރުކާރު އަޅުގަނޑުމެން ބަދަލުކުރާނަން. ދިވެހި ރައްޔިތުންގެ ޑިމޮކްރެޓިކް ޕާޓީގެ ސަރުކާރެއް ދެން އިރާދަކުރެއްވިއްޔާ ދެން އުފެދިގެން އަންނެ،" އެމަނިކުފާނު ވިދާޅުވި އެވެ.
ސަރުކާރުން ގެންގުޅޭ ސިޔާސަތުތައް ފެއިލްވެފައިވާކަން ފާހަގަކުރައްވަމުން ނަޝީދު ވިދާޅުވީ، ދަރަނި އަދާކުރުމުގެ އެއްވެސް ސިޔާސަތެއް ސަރުކާރުގައި ނެތް ކަމަށާއި ބޭރުން ފައިސާ ހޯދުމުގެ ޤާބިލުކަން ވެސް ސަރުކާރުގައި ނެތް ކަމަށެވެ. އަދި ރައްޔިތުންނަށް ކަމެއް ކޮށްދިނުމުގެ ޚިޔާލެއް ނެތި ސަރުކާރުން ކުރާ ކަމަކީ އޮޅުވާލުމާއި މަކަރު ހެދުން ކަމަށް ވިދާޅުވި އެވެ.
"ދޮގު ހެދުމާއި، އޮޅުވާލުމާއި، މަކަރު ހެދުން މިއީ މި ސަރުކާރުގެ ހަމައެކަނި އަމާޒު. ރާއްޖޭގެ ރައްޔިތުންނަށް ކަމެއް ކޮށްދިނުމުގެ ކުޑަ ހިޔާލެއްވެސް އެބޭފުޅުންގެ ނެތް،" ނަޝީދު ވިދާޅުވި އެވެ.
