އެމްޑީޕީ ވެރިކަމުގައި އޮންނައިރު ޕާޓީގެ އިސް ލީޑަރަކީ ޗެއާޕާސަން ކަމަށް ކަނޑައަޅަން އެ ޕާޓީގެ އަސާސީ ގަވާއިދަށް އިސްލާހު ހުށަހަޅައިފި އެވެ.
މިރޭ ފެށުމަށް ހަމަޖެހިފައިވާ އެމްޑީޕީގެ ކޮންގްރެސްގައި އެ ޕާޓީން މިހާރު އަމަލުކުރަމުންދާ އަސާސީ ގަވާއިދަށް ބަދަލުތަކެއް ގެންނަން ވަނީ ނިންމައިފަ އެވެ.
އެގޮތުން ޕާޓީ ވެރިކަމުގައި އޮންނަ ހާލަތްތަކުގައި ޕާޓީގެ އިސްވެރިޔަކީ ރައީސުލްޖުމްހޫރިއްޔާ ކަމަށް ކަނޑައަޅާފައި އޮތް މާއްދާ އުނިކޮށް، ޕާޓީގެ އެންމެ އިސް ފަރާތަކީ ޗެއާޕާސަން ކަމަށް ކަނޑައަޅަން ވަނީ ހުށަހަޅާފަ އެވެ. ޗެއާޕާސަނަށް ދައުލަތުން މުސާރަ ލިބޭ އެހެން އެއްވެސް މަގާމެއް ފުރުން މަނާ ކުރުމަށް ވެސް ހުށަހަޅާފައިވެ އެވެ. އޭގެ ތެރޭގައި ރާއްޖޭގެ ރައީސްގެ މަގާމު ވެސް ހިމެނޭނެ އެވެ.
މީގެ ކުރިން އެ ޕާޓީގައި ރައީސް އާއި ނައިބު ރައީސްގެ މަގާމު ވެސް އޮންނައިރު، އާ އަސާސީ ގަވާއިދަށް ގެންނަ އިސްލާހުގައި އެ މަގާމުތަކުގެ ބައި ވަނީ އުނިކޮށްފަ އެވެ.
މީގެއިތުރުން ޗެއާޕާސަންގެ ނައިބުންގެ ގޮތުގައި މާލީ ނައިބަކާއި އިދާރީ ނައިބެއް މިހާރު އޮންނައިރު ސިޔާސީ ނައިބެއް އިތުރުުކުރަން ވެސް ވަނީ ހުށަހަޅާފަ އެވެ. އޭގެެ ތެރެއިން އެކަކަކީ އަންހެނަަކަށް ވެސް ވާންޖެހެ އެވެ.
ރިޔާސީ އިންތިހާބު ކާމިޔާބުކޮށް އެމްޑީޕީގެ ސަރުކާރެއް އަންނަ ހާލަތުގައި ރައީސަކަށް ހުންނަ ޕާޓީގެ ބޭފުޅާ ސަރުކާރު އެކުލަވާލުމުގައާއި މުހިންމު ސިޔާސަތުތައް ކަނޑައެޅުމާއި ތަންފީޒުކުރުމަށް، ޕާޓީގެ ގައުމީ މަޖިލީހުގެ ލަފަ އާއި މަޝްވަރާ ހޯދުމަށް އިގުރާރުވެ އެއްބަސްވުމެއްގައި ޕާޓީއާއެކު ސޮއިކުރުމާއެކު، އެއްބަސްވުމާ އެއްގޮތަށް މަޝްވަރާކުރަން ވާނެ ކަމަށްވެސް އިސްލާހުގައިވެ އެވެ.
އެމްޑީޕީގެ ސަރުކާރެއް އޮންނަ އިރު ޕާޓީ އާއި ސަރުކާރާ އޮންނަ ގުޅުން ވަރުގަދަކުރުމަށް ޓަކައި، ރައީސްގެ އިސް މުޝީރަކަށް އެ ޕާޓީގެ ޗެއާޕާސަން އައްޔަންކުރަން ވާނެ ކަމަށްވެސް ބުނެފައިވެ އެވެ.
