ދިވެހި ރައްޔިތުންގެ ޑިމޮކްރެޓިކް ޕާޓީ (އެމްޑީޕީ) ގެ ކޮންގްރެސްގައި ވާހަކަފުޅު ދައްކަވަމުން، ޤާނޫނުއަސާސީއަށް ބޭނުންވާ އިސްލާހުތައް ގެނައުމަށާއި ޤައުމުގެ އިޤްތިޞާދީ މިސްރާބު ހަމަމަގަށް އެޅުވުމަށް އެ ޕާޓީން ހުއްޓުމެއް ނެތި މަސައްކަތްކުރާނެ ކަމަށް ކުރީގެ ރައީސް އަދި އެމްޑީޕީގެ ޗެއަރޕާސަން މުހައްމަދު ނަޝީދު ވިދާޅުވެއްޖެއެވެ.

ރައީސް ނަޝީދު ދެއްކެވި ވާހަކަފުޅުގައި، އެމްޑީޕީ އުފެދިގެން އައި ތާރީޚަށް އަލިއަޅުއްވާލައްވަމުން، އީވާން ނަސީމް ޖަލުގައި ނިޔާވި ހާދިސާއާއި، 2004 ވަނަ އަހަރުގެ ނޮވެމްބަރު މަހުގެ 10 ވަނަ ދުވަހު އެމްޑީޕީ އިޢުލާންކުރި ދުވަސްވަރު ޤާނޫނުއަސާސީއަށް ބަދަލު ގެންނަން ޖެހުނު ސަބަބުތައް ހަނދުމަކޮށްދެއްވިއެވެ. 

އެގޮތުން ބާރުތައް ވަކިކުރުމަށާއި ރައީސުލްޖުމްހޫރިއްޔާއަށް ލިބިދޭ ބާރުތައް އެއްކޮށްފައި އޮންނަ އޮތުން ބަދަލުކުރުމަށް އަދިވެސް މަސައްކަތްކުރަން ޖެހޭ ކަމަށާއި، މި ކޮންގްރެސްގައި އެފަދަ އިސްލާހީ ބަދަލުތަކާ ގުޅޭގޮތުން މަޝްވަރާކުރެވިގެންދާނެ ކަމަށް ވިދާޅުވިއެވެ.

މީގެއިތުރުން، މި ފަހަރުގެ ކޮންގްރެސްގެ ތެރެއިން އެކި ކައުންސިލްތަކުން 76 ޕްރޮޖެކްޓެއް ފާހަގަކޮށްފައިވާކަން އެމަނިކުފާނު ފާހަގަކުރެއްވިއެވެ. އަދި މި ޕްރޮޖެކްޓްތަކަކީ ރަށްރަށުގެ ރައްޔިތުންނަށް އާމްދަނީއާއި ވަޒީފާގެ ފުރުޞަތުތައް އިތުރުކޮށްދޭނެ ވިޔަފާރީގެ މުހިންމު ފުރުޞަތުތަކެއް ކަމަށާއި، އެ މަޝްރޫޢުތަކަށް އިންވެސްޓްމަންޓް ހޯދުމަށް މަސައްކަތްކުރަންޖެހޭ ކަމަށް ވިދާޅުވިއެވެ.

ޤައުމުގެ މިހާރުގެ އިޤްތިޞާދީ ހާލަތަށް އަލިއަޅުއްވާލައްވަމުން، މިހާރުގެ ސަރުކާރުގައި މާލިއްޔަތާއި އިޤްތިޞާދު ކުރިއަށް ގެންދާނެ ސާފު މިސްރާބެއް ނެތް ކަމަށް ރައީސް ނަޝީދު ވިދާޅުވިއެވެ. އަދި ޑޮލަރު މާރުކުރުމާއި ޓެކުހުގެ ސިޔާސަތުތަކަށް އެކި ދުވަހު އެކި ބަދަލު ގެންނަމުންދާތީ ފަތުރުވެރިކަމުގެ ދާއިރާއަށާއި ވިޔަފާރިތަކަށް ދަތިތަކާ ކުރިމަތިވަމުންދާ ކަމުގެ ކަންބޮޑުވުން ފާޅުކުރެއްވިއެވެ.

ނިންމަވާލައްވަމުން ރައީސް ނަޝީދު ވިދާޅުވީ، ރައްޔިތުންނަށް ހެޔޮ ވެރިކަމެއް ކޮށްދިނުމަށާއި، ޤައުމު މިހާރު އޮތް ހާލަތުން އަރައިގަތުމަށްޓަކައި އެމްޑީޕީގެ ސަރުކާރެއް އަލުން ޤާއިމުކުރުމުގެ މަސައްކަތް ކުރިއަށް ގެންދަވާނެ ކަމަށެވެ.