ވ. އާރަށު މައްސަލައިގައި ކުރީގެ ރައީސް އަބްދުﷲ ޔާމީން އަބްދުލްގައްޔޫމްގެ މައްޗަށް ދައުލަތުން އުފުލާފައިވާ ދައުވާތަކުގެ ޝަރީއަތުގެ އަޑުއެހުމެއް ކްރިމިނަލް ކޯޓުގައި ތާވަލުކޮށްފިއެވެ. މި އަޑުއެހުން ބޭއްވުމަށް ހަމަޖެހިފައިވަނީ ސެޕްޓެމްބަރު 29 ވާ ދުވަހުގެ ހެނދުނު 9:15 ގައެވެ.ރ

ކްރިމިނަލް ކޯޓުގައި ކުރިއަށްދާ މި މައްސަލައަކީ އާރަށު މައްސަލައިގައި އެ ކޯޓުން ކުރިން އިއްވި ހުކުމް ހައިކޯޓުން ބާތިލުކޮށް، އަލުން މައްސަލަ ބެލުމަށް އެންގުމާ ގުޅިގެން ކުރިއަށްގެންދާ ޝަރީއަތެކެވެ. މި އަޑުއެހުމުގައި މައިގަނޑު ގޮތެއްގައި އޮންނާނީ އެމަނިކުފާނުގެ މައްޗަށް ކޮށްފައިވާ ރިޝްވަތު ގަބޫލުކުރުމާއި މަނީ ލޯންޑަރިންގެ ކުށުގެ ދައުވާތަކާ ގުޅިގެން، ޝަރީއަތުގެ ކުރީގެ ހުށަހެޅުންތަކާ ބެހޭގޮތުން ވާހަކަދެއްކުމެވެ.

އާރަށް ކުއްޔަށް ދިނުމުގެ މުއާމަލާތުގެ ތެރެއިން 1.1 މިލިއަން ޑޮލަރުގެ ރިޝްވަތު ނަންގަވައި، އެ ފައިސާ ލޯންޑަކުރެއްވި ކަމަށް ނިންމައި 25 ޑިސެމްބަރު 2022 ގައި ކްރިމިނަލް ކޯޓުން ރައީސް ޔާމީންގެ މައްޗަށް 11 އަހަރުގެ ޖަލު ހުކުމެއް އިއްވިއެވެ. ނަމަވެސް، ދިފާއީ ހެކިތައް ނަފީކުރުމަށް ދައުލަތުން ހުށަހެޅި އައު ހެކިތައް ބަލައިނުގަނެވޭނެ ކަމަށް ކަނޑައަޅައި ހައިކޯޓުން އެ ހުކުމް ބާތިލުކުރިއެވެ.

ހައިކޯޓުގެ މި ނިންމުން ދައުލަތުން ސުޕްރީމް ކޯޓުގައި އިސްތިއުނާފު ކުރި ނަމަވެސް، 1 ޖުލައިގައި އެ ކޯޓުން ވަނީ ހައިކޯޓުގެ ހުކުމަށް ބަދަލެއް ގެންނަންޖެހޭ ސަބަބެއް ނެތް ކަމަށް ނިންމައި، މައްސަލަ އަލުން ބެލުމަށް ދަށު ކޯޓަށް ފޮނުވި ނިންމުން ދަމަހައްޓާފައެވެ.