ފާއިތުވި ދެ އަހަރާއި ބައިގެ ތެރޭގައި ކުރެވުނު މަސައްކަތްތަކުން އިންތިޒާމުވެގެން ހިންގާ ކުށްތައް ވަރަށް ބޮޑަށް މަދުކުރެވިފައިވާކަމަށާއި، މިހާރުވެސް 10 ގޭންގް ލީޑަރެއްގެ މައްސަލަ ތަހުގީގުކުރަމުންދާކަމަަށް ދާހިލީ ސަލާމަތާއި ފަންނިއްޔާތާ ބެހޭ ވަޒީރު އަލީ އިހުސާނު ވިދާޅުވެއްޖެއެވެ. 

ސަރުކާރުގެ ވުޒާރާތަކުގެ މަސައްކަތްތަކާ ގުޅޭ ގޮތުން އާއްމުން ކުރާ ސުވާލުތަކަށް ވަޒީރުން ޖަވާބުދެއްވުމަށް ބާއްވާ "އަހާ" ފޯރަމުގައި، ގޭންގު ކުށްތައް މަދުކުރުމަށް ސަރުކާރުން އަޅާފައިވާ ފިޔަަވަޅުތަކާއި ނެރެވުނު ނަތީޖާއާ ގުޅޭ ގޮތުން އާއްމު މީހަކު ކުރި ސުވާލަކަށް ޖަވާބުދެއްވަމުން އިހުސާނު ވިދާޅުވީ މީގެ ކުރިން ގޭންގު ކުށްތައް އޮތީ ވަރަށް ބޮޑަށް އާއްމުވެފައި ކަމަށެވެ. ގޭންގުތަކުގެ މެދުގައި ހިނގަމުންއައި މާރާމާރީތަކުގައި އެވެރެޖުކޮށް އަހަރެއްގެ މައްޗަށް ދެ ޒުވާނުންނާއި ފަސް ޒުވާނުންނާ ދެމެދުގެ އަދަދަކަށް ޒުވާނުން ގަތުލުކުރަމުންދިޔަ ކަމަށެވެ. 

ގޭންގުތަކުގެ މައްސަލަ ހައްލުކުރުމަށް ސަރުކާރުން އެޅި އެންމެ މުހިއްމު ފިޔަވަޅެއްގެ ގޮތުގައި ވަޒީރު ފާހަގަކުރެއްވީ ކުރިއްސުރެ ގޭންގުތައް ހަރަކާތްތެރިވަމުންއައި ސަރަހައްދުތަކުގައި ދިވެހި ފުލުހުން ހަރަކާތްތެރިވާ މިންވަރު އިތުރުކުރުމެވެ. ވަޒީރު ވިދާޅުވި ގޮތުގައި މިހާރު އެ ސަރަހައްދުތަކުގައި ގޭންގުތަކަށް ނިސްބަތްވާ މީހުން ހަރަކާތްތެރިވާ އަދަދަށްވުރެ ގިނައިން ފުލުހުން ހަރަކާތްތެރިވާނެއެވެ. 

ވަޒީރު ވިދާޅުވި ގޮތުގައި ސަރުކާރުން ގޭންގުތަކުގައި އުޅޭ ޒުވާނުންނަށް ދެ ހިޔާރެއް ދިނެވެ. އެއީ މަސައްކަތާއި ވިޔަފާރީގައި ޝާމިލުވެ ކުށުގެ ވެށިން އަމިއްލައަށް ނުކުތުން ނުވަތަ ގާނޫނުގެ ދަށުން ކުށްވެރިވުމެވެ. ވަޒީރު އުފާކުރައްވާ ކަމެއްގެ ގޮތުގައި ފާހަގަކުރެއްވީ ގޭންގުތަކުގައި އުޅުނު ގިނަ ކުދިން ޒިންމާދާރު ބަޔަކަށްވާން އަމިއްލަ އިހުތިޔާރުކުރުމެވެ. 

"އެމީހުންނަަށް އަޅުގަނޑުމެން ދީފައިވާނެ ޗޮއިސެއް. އެ ޗޮއިސަކީ، ޒުވާން ކުދިންނޭ ތިއީ އަދި ކުރިމަގު އަދި އެބައޮތެއްނޫންހެއްޔޭ، މިކަމުން ދުރުހެލިވެ ވިޔަފާރިތަކުގައި އުޅެ ވަޒީފާއަށް ދާން. އެ ފުރުސަތު މިހާރު ދީފައި އޮންނާނީ. އުފަލާއެކު އަޅުގަނޑުމެން ފާހަގަކުރާކަމަކީ އެކުދިންގެ ތެރެއިން ގިނަ ކުދިން އިހުތިޔާރުކުރީ އެމަގު،" ވަޒީރު ވިދާޅުވިއެވެ. 

ގޭންގުތަކުގައި އުޅުނު ޒުވާނުންނަށް އަނބުރާ މުޖުތަމައަށް އައުމަށް މަގުފަހިކޮށްދިނުމާއެކު، އިންތިޒާމުވެގެން ކުށްކުރުން ހުއްޓުވުމަށް ފުލުހުން ހާއްސަ މސައްކަތްތަކެއް ކުރަމުންދާކަން ވަޒީރު ފާހަގަކުރެއްވިއެވެ. އެގޮތުން މިހާތަނަށް 52 ޓާގެޓެޑް ގޭންގު އޮޕަރޭޝަންތައް ހިންގާފައިވާއިރު، އެ އޮޕަރޭޝަންތަކުގައި 10،000 އަށްވުރެ ގިނަ މީހުން ޗެކުކޮށް، 517 މީހަކު ހައްޔަރުކޮށްފައިވެއެވެ. އަދި މިމީހުންނާ ގުޅުންހުރި 670 އެއްހައި ސަކަލު ފުލުހުން ޓޯކޮށްފަައިވެއެވެ. 

"ނަތީޖާއަކީ މިހާރު ކުރިން ފަލަސުރުހީތަކުން ފެންނަ ގޮތަށް އެތަނުން ވަޅިޖަހައިފި، މިތަނުން ތަޅާމަރަނީ މިވާހަކަތައް މަދުވާނެ މިހާރު. އަދި އަޅުގަނޑުމެންގެ ސަރުކާރުގައި ފާއިތުވި ތިން އަހަރެއްހައި ދުވަހުގެ ތެރޭގައި އަދި އެއްވެސް ދިވެހި ރައްޔިތެއްގެ ފުރާނަ ގޭންގު މާރާމާރީގައި ގެއްލިފައިނުވާނެ،" ވަޒީރު ވިދާޅުވިއެވެ. 

އޭގެ އިތުރަށް ވަޒީރު ވިދާޅުވީ ކުޑަކުދިން ގޭންގު ކުށްތަކުގައި ބައިވެރިކުރުމަށް ސޭފް ހައުސްތަކުގެ ގޮތުގައި ބޭނުންކުރަމުންއައި 26 ތަނެއް ފުލުހުން ރެއިޑުކޮށް އެކަމަށް ބޭނުންނުކުރެވޭ ގޮތަށް މިހާރު ބަންދުކޮށްފައިވާ ކަމަށެވެ. ނިމުނު ޖޫން މަހުން ފެށިގެން 10 ގޭންގު ލީޑަރެއްގެ މައްސަލަ ތަހުގީގުކުރަމުންދާކަން ހާމަކުރައްވަމުން ވަޒީރު ވިދާޅުވީ އެމީހުންނާމެދު އައު ގާނޫނުގެ ދަށުން ފިޔަވަޅުއެޅިގެންދާއިރު އިންތިޒާމީ ގޮތެއްގައި ޖަރީމާތައް ހިންގުމަށް ބޮޑު ހައްލެއް ލިބިގެންދާނެކަން ޔަގީންކުރައްވާ ކަމަަށެވެ. 

ގޭންގުތަކުން އުމުރުން 14، 15 އަހަރުގެ ކުޑަކުދިން ކުށުގެ ވެއްޓަށް ތައާރަފުކޮށް ނާޖައިޒު ގޮތުގައި ބޭނުންކުރަމުންދާކަން ފާހަގަކުރައްވަމުން އިހުސާނު ވިދާޅުވީ އެކަން ހުއްޓުވުމަށް ކުރެވުނު މަސައްކަތުގެ ތެރެއިން ގޭންގުތައް ހަރަކާތްތެރިވާ ތަންތަނުން 212 ކުއްޖަކު ނަގައި ފުލުސް ސްޓޭޝަންތަކަށް ގެނެސް ނަސޭހަތްދީ އާއިލާތަކާ ހަވާލުކޮށްފައިވާ ކަމަށެވެ. މި މައްސަލައިގެ ދާއިމީ ހައްލަަކީ ހޯޕް އައިލެންޑު ގާއިމުކޮށް އެތަނުގެ ތެރެއިން ކުދިންނަށް ދޭންޖެހޭ ތަރުބިއްޔަތާއި ހުނަރުތައް ފޯރުކޮށްދިނުން ކަމަށްވެސް ވަޒީރު ވިދާޅުވިއެވެ.