ކ. ތިލަފުށީގެ ގުދަނެއްގައި ހުރި ދެ މިލިއަން ރުފިޔާގެ އަގުހުރި ހުއިފިލަނޑާތަކަކަށް ހިޔާނާތްތެރިވި ކަމުގެ ތުހުމަތުގައި، އެ މައްސަލައިގައި ބައިވެރިވި ކަމަށް ބެލެވޭ ފުލުސް އޮފިސަރަކު ވަޒީފާއިން އެކަހެރިކޮށްފިއެވެ. ފުލުހުންގެ އިދާރާއިން ހާމަކުރި ގޮތުގައި، މި މައްސަލައާ ގުޅިގެން އެ އޮފިސަރު މިހާރު ވަނީ އިންވެސްޓިގޭޝަން އޮފިސަރެއްގެ މަގާމުން ދުރުކޮށްފައެވެ. މީގެ އިތުރުން، އެ އޮފިސަރާ ގުޅޭ އިދާރީ މައްސަލައެއް ޕްރޮފެޝަނަލް ސްޓޭންޑާޑްސް ކޮމާންޑުން މިހާރު ދަނީ ބަލަމުންނެވެ.

މިދިޔަ ޑިސެމްބަރު މަހުގެ ފަހުކޮޅު ހިނގި މި ހާދިސާ ފުލުހުންނަށް ރިޕޯޓްކޮށްފައިވަނީ ޑިސެމްބަރު 31 ގައެވެ. ތުހުމަތު ކުރެވޭ ގޮތުގައި، ޑިސެމްބަރު 29 ވަނަ ދުވަހު އޭގެ ވެރިފަރާތަށް އޮޅުވާލުމަށްފަހު، މަކަރާއި ހީލަތުން އެ ތަކެތި ވަނީ އެހެން ތަނަކަށް ބަދަލުކޮށްފައެވެ. ތަހުގީގަށް އެނގިފައިވާ ގޮތުގައި، ތިލަފުށިން މި ތަކެތި މާލެއަށް ގެނެސް ދެ ގެއެއްގައި ވަނީ ފޮރުވާފައެވެ. ފުލުހުން ވަނީ ކޯޓު އަމުރެއްގެ ދަށުން އެ ތަންތަން ބަލައި ފާސްކޮށް، އެ ހުއިފިލަނޑާތައް އެ ފަރާތުގެ ބެލުމުގެ ދަށަށް ގެންގޮސްފައެވެ.

އަތުލައިގަނެވުނު ތަކެތީގެ ތެރޭގައި ޖުމްލަ 1,438 ކިލޯގެ ހުއިފިލަނޑާ ހުރިއިރު، އޭގެ ތެރެއިން 787.35 ކިލޯއަކީ ރާއްޖެއިން ބޭރުކުރުން މަނާ ބާވަތްތަކެވެ. އަދި މި މަސައްކަތުގައި އުޅުނު ފަރާތްތަކަކީ ހުއިފިލަނޑާ ޕްރޮސެސް ކުރުމުގެ ގާނޫނީ ހުއްދަ އޮތް ބައެއް ނޫންކަން ވެސް ފާހަގަކުރެވިފައިވެއެވެ. މި މައްސަލައިގައި ހިމެނޭ ދެ ފަރާތުން ވެސް އެ ތަކެތީގެ މިލްކުވެރިކަމަށް ދައުވާ ކުރަމުންދާތީ، އޭގެ އަސްލު ވެރިފަރާތް ކަށަވަރުކުރުމުގައި ވަނީ ދަތިތަކެއް ކުރިމަތިވެފައެވެ.

މި ތަކެއްޗަކީ އަވަހަށް ހަލާކުވެދާނެ އެއްޗަކަށް ވާތީ، ޕްރޮސިކިއުޓާ ޖެނެރަލްގެ ލަފާގެ މަތިން އެ ތަކެތި ނީލަން ކިޔައިގެން ވިއްކާލުމަށް ވަނީ ނިންމާފައެވެ. ޕީޖީ އޮފީހުން ލަފާދީފައިވަނީ، ވެރިފަރާތް ސާފުކޮށް އެނގެން ނެތުމުން، ތަކެތި ވިއްކާލުމަށްފަހު ލިބޭ ފައިސާ ތަހުގީގާއި ޝަރީއަތް ނިމެންދެން ފުލުހުންގެ ބެލުމުގެ ދަށުގައި ބެހެއްޓުމަށެވެ. އެއާއެކު، ފުލުހުން މިހާރު ވަނީ އެ ތަކެތި ނީލަން ކިޔުމަށް އިއުލާނުކޮށްފައެވެ.