އީރާނުގެ ވެރިރަށް ތެހެރާނާއި އެހެނިހެން ސިޓީތަކުގައި ގިނަ އަދަދެއްގެ މުޒާހަރާގެ ބައިވެރިން ހިނގާލުންތައް ބާއްވަމުންދާކަން ވީޑިއޯތަކުން ފެންނައިރު، މިއީ ފާއިތުވި އަހަރުތަކުގައި އެގައުމުގެ ވެރިކަމާ ދެކޮޅަށް ކުރަމުންދާ އެންމެ ބޮޑު މުޒާހަރާއެވެ.

މުޒާހަރާގެ ބައިވެރިން ދަނީ އީރާނުގެ އެންމެ މަތީ ވެރިޔާ އާޔަތުالله އަލީ ޚާމަނާއީގެ ވެރިކަން ވައްޓާލުމަށާއި، އަރުވާލެވިގެން އުޅުއްވާ ކުރީގެ ޝާހުގެ ދަރިކަލުން ރިޒާ ޕަހްލަވީ އެނބުރި ވަޑައިގަތުމަށް ގޮވާލަމުންނެވެ. ރިޒާ ޕަހްލަވީ ވަނީ އޭނާއަށް ތާއީދުކުރާ ފަރާތްތަކުން މަގުތަކަށް ނުކުތުމަށް ބާރުއަޅުއްވާފައެވެ.

އިންސާނީ ހައްގުތަކަށް މަސައްކަތްކުރާ ޖަމާއަތްތަކުން ބުނާ ގޮތުގައި، މިއީ އީރާނުގެ ފައިސާގެ އަގު ވެއްޓުމާ ގުޅިގެން އުފެދުނު ނުތަނަވަސްކަމުގެ 12 ވަނަ ދުވަހެވެ. އީރާނުގެ 31 ޕްރޮވިންސެއްގެ 100 އަށްވުރެ ގިނަ ސިޓީއާއި އަވަށްތަކުގައި މިހާރު މުޒާހަރާތައް ކުރިއަށް އެބެދެއެެވެ.

ސަލާމަތީ ބާރުތަކުން ދިން ހަމަލާތަކުގައި މަދުވެގެން 45 މުޒާހަރާގެ ބައިވެރިން މަރުވެފައިވާއިރު، އޭގެ ތެރޭގައި 8 ކުޑަކުދިން ހިމެނެއެވެ. އީރާނުގެ ކަމާބެހޭ ފަރާތްތަކުން ރިޕޯޓްކޮށްފައިވާ ގޮތުގައި ސަލާމަތީ ބާރުތަކުގެ 6 މީހަކު ވަނީ މަރުވެފައެވެ.

މި މުޒާހަރާތައް ފެށިފައިވަނީ، 1979 ވަނަ އަހަރުގެ އިސްލާމީ އިންގިލާބުގައި ވެރިކަން ވެއްޓުނު ޝާހުގެ ދަރިކަލުން، ވޮޝިންޓަން ޑީސީގައި ދިރިއުޅުއްވާ ރިޒާ ޕަހްލަވީ، އީރާނުގެ ރައްޔިތުން "މަގުތަކަށް ނުކުމެ، އެއްބައިވަންތަކަމާއެކު ޑިމާންޑްތަކަށް ގޮވާލުމަށް" އިލްތިމާސް ކުރެއްވިތާ މާގިނަ އިރުތަކެއް ނުވަނީހެވެ. އެކްސްގައި ކުރެއްވި ޕޯސްޓެއްގައި، "މިރޭ މިލިއަނުން އީރާނުގެ ރައްޔިތުން އެމީހުންގެ މިނިވަންކަމަށް ގޮވާލައިފި" ކަމަށް ޕަހްލަވީ ވިދާޅުވިއެވެ. އަދި މުޒާހަރާގެ ބައިވެރިންނަކީ އޭނާގެ "ހިތްވަރުގަދަ ވަޠަނީ އަޚުން" ކަމުގައި ސިފަކުރެއްވިއެވެ.

އީރާނުގެ ހާމަނީގެ ސަރުކާރު އެމެރިކާގެ ރައީސް ޑޮނަލްޑް ޓްރަމްޕް ކުރައްވާ މަސައްކަތްޕުޅަށް އޭނާ ޝުކުރު އަދާކުރެއްވިއެވެ. އަދި ޔޫރަޕްގެ ލީޑަރުންވެސް އެފަދައިން އަމަލުކުރުމަށް ގޮވާލެއްވިއެވެ.

އީރާނުގެ ދައުލަތުގެ މީޑިއާތަކުން ބުރާސްފަތި ދުވަހުގެ ހަމަނުޖެހުންތަކުގެ މިންވަރު ކުޑަކޮށް ދެއްކުމަށް މަސައްކަތް ކުރިއެވެ. ބައެއް ހާލަތްތަކުގައި، މުޒާހަރާއެއް ނުކުރާ ކަމަށް ބުނެ، ހުސްކޮށް ހުރި މަގުތަކުގެ ވީޑިއޯތައް އާންމުކޮށް މުޒާހަރާތައް އިންކާރު ކުރިއެވެ.

މުޒާހަރާތައް ހޫނުވެ، އީރާނުގެ ބޮޑު ސަރަހައްދަކުން އިންޓަނެޓު ކަނޑާފައިވާ ކަމަށް މީޑިއާތަކުން ރިޕޯޓޫ ކުރެއެވެ. މީގެ އިތުރުން ރޭގެ ވަގުތެއްގައި އީރާނު ސަރުކާރު އޮފީހެއްގައި މުޒާހަރާގެ ބައިވެރިން ވަނީ ރޯކޮށްލާފައެވެ.