އިޒްރޭލުގެ އަސްކަރިއްޔާ އިން ބުނެފައި ވަނީ ޣައްޒާ ސިޓީ ކައިރީގައި ދިން ހަމަލާއެއްގައި ހަމާސްގެ އިސް ކޮމާންޑަރެއް ކަމަށްވާ ރާއިދު ސަޢަދު މަރާލާފައިވާ ކަމަށެވެ. ނަމަވެސް މި ހަމަލާގައި އެމީހާ މަރުވިކަން ހަމާސް އިން އަދި ކަށަވަރުކޮށްދީފައެއް ނުވެއެވެ.

ޣައްޒާގެ ސިއްހީ އިދާރާތަކުން ބުނާ ގޮތުގައި ހޮނިހިރު ދުވަހު ދިން މި ހަމަލާގައި ފަސް މީހުން މަރުވެ، 25 މީހުން ޒަހަމްވެފައިވެއެވެ. ހަމާސް އިން ނެރުނު ބަޔާނެއްގައި ރާއިދު ސަޢަދު މަރުވިކަން ކަށަވަރުކޮށްދީފައި ނުވި ނަމަވެސް، ޣައްޒާ ސިޓީގެ ބޭރުގައި އާއްމު ރައްޔިތެއްގެ އުޅަނދަކަށް ހަމަލާ ދީފައިވާ ކަމަށާއި، މިއީ އޮކްޓޯބަރު މަހު ހިނގި ހަމަލާ ބަދަލުކުރުން ހުއްޓާލުމުގެ އެއްބަސްވުމާ ހިލާފު ކަމެއް ކަމަށް ބުނެފައިވެއެވެ.

އިޒްރޭލުގެ އަސްކަރިއްޔާ އިން ޓެލެގްރާމްގައި ކުރި ޕޯސްޓެއްގައި ތުހުމަތުކޮށްފައި ވަނީ ސަޢަދު ހަރަކާތްތެރިވަމުން ދިޔައީ ހަމާސްގެ ގާބިލުކަން އަލުން ގާއިމުކުރުމަށް ކަމަށާއި، އެ ގާބިލުކަން އިޒްރޭލުން ޣައްޒާގައި ދެ އަހަރަށްވުރެ ގިނަ ދުވަހު ހިންގި ޖަރީމާތަކުގެ ސަބަބުން ވަރަށް ބޮޑަށް ދަށްވެފައިވާ ކަމަށެވެ. އަދި އޭނާ ސިފަކޮށްފައި ވަނީ 2023 ވަނަ އަހަރުގެ އޮކްޓޯބަރު 7 ގައި އިޒްރޭލަށް ދިން ހަމަލާތައް ރާވައި ހިންގި މީހުންގެ ތެރޭގައި ހިމެނޭ މީހެއްގެ ގޮތުގައެވެ.

އިޒްރޭލުގެ ދިފާއީ އޮފިޝަލަކު ރޮއިޓާސް ނިއުސް އެޖެންސީއަށް މައުލޫމާތު ދެމުން ބުނެފައި ވަނީ، މި ހަމަލާގެ އަމާޒަކީ ސަޢަދު ކަމަށާއި، އޭނާ އަކީ ހަމާސްގެ ހަތިޔާރު އުފައްދާ ބައިގެ އިސްވެރިޔާ ކަމަށެވެ. ހަމާސްގެ މަސްދަރުތަކުން ވެސް އޭނާ ސިފަކޮށްފައި ވަނީ އެ ޖަމާއަތުގެ ހަތިޔާރު އެޅި ފިޔަވަޅުގެ ދެވަނަ ކޮމާންޑަރުގެ ގޮތުގައެވެ. މީގެ ކުރިން އޭނާ ހުންނެވީ ހަމާސްގެ އެންމެ ބޮޑު އަދި އެންމެ ގިނަ ވަސީލަތްތައް ހުރި ޣައްޒާ ސިޓީ ބަޓޭލިއަންގެ އިސްވެރިޔާގެ މަގާމުގައެވެ.

ސަޢަދު މަރާލެވުނު ކަމަށް ވާނަމަ، އޮކްޓޯބަރު މަހު ހަމަލާ ބަދަލުކުރުން ހުއްޓާލުމުގެ އެއްބަސްވުމަށް ފަހު ހަމާސްގެ އިސް ލީޑަރެއްގެ މައްޗަށް ދިން އެންމެ ބޮޑު އަމާޒަކަށް ވެގެންދާނެއެވެ. ވާފާ ނިއުސް އެޖެންސީން ރިޕޯޓްކޮށްފައި ވަނީ އިޒްރޭލުގެ ޑްރޯނަކުން ޣައްޒާ ސިޓީގެ ހުޅަނގުގައިވާ ނާބުލްސީ ޖަންކްޝަންގައި އުޅަނދަކަށް ހަމަލާ ދީފައިވާ ކަމަށާއި، އެ ހަމަލާގައި ގެއްލުންތަކެއް ލިބިފައިވާ ކަމަށެވެ. ނަމަވެސް އެ އެޖެންސީން ވަކި އަދަދެއް ރިޕޯޓްކޮށްފައި ނުވާތީ، މި ހަމަލާ އަކީ ހަމާސްގެ މެމްބަރު މަރާލި ކަމަށް ބުނާ ހަމަލާ ކަމެއް ސާފެއް ނުވެއެވެ.

އޮކްޓޯބަރު މަހު ހަމަލާ ބަދަލުކުރުން ހުއްޓާލި ފަހުން ވެސް އިޒްރޭލުން ދަނީ ޣައްޒާއަށް ދުވާލަކު ހަމަލާ ދެމުންނެވެ. ޣައްޒާގެ އިދާރާތަކުން ބުނާ ގޮތުގައި މި އެއްބަސްވުމާ ހިލާފަށް ގާތްގަނޑަކަށް 800 ފަހަރަށް ހަމަލާ ދީފައިވާއިރު، މަދުވެގެން 386 މީހުން މަރާލާފައިވެއެވެ. އިޒްރޭލުން އަދިވެސް ވަނީ ޣައްޒާއަށް އެހީގެ ގިނަ ޓްރަކްތައް ވަނުން މަނާކޮށްފައެވެ. އދ. ގެ އާންމު މަޖިލީހުން ހުކުރު ދުވަހު ވަނީ އިޒްރޭލަށް ގޮވާލައި ގަރާރެއް ފާސްކޮށްފައެވެ. އެ ގަރާރުގައި ވަނީ ޣައްޒާގެ ރައްޔިތުންނަށް އެއްވެސް ހުރަހެއް ނެތި އިންސާނީ އެހީ ފޯރުކޮށްދިނުމަށާއި، އދ. ގެ މަރުކަޒުތަކަށް ހަމަލާ ދިނުން ހުއްޓާލުމަށާއި، ބައިނަލްއަގްވާމީ ގާނޫނުތަކަށް އިހްތިރާމްކުރުމަށް ގޮވާލާފައެވެ.