ފަހި ދިރިއުޅުން ކޯޕަރޭޝަން (އެފްޑީސީ) އިން ހުޅުމާލޭގައި އިމާރާތްކުރި 4000 ފްލެޓް ލިބުނު މީހުންނަށް، އެ ފްލެޓްތައް ޙަވާލުކުރަން ލަފާކުރި ތާރީޚުތަކާ އެއްގޮތަށް ފްލެޓްތައް ޙަވާލުކުރުމުގެ މަސައްކަތް ފަށައިފިއެވެ. 

އެފްޑީސީން ޑިސެމްބަރު 2 ވަނަ ދުވަހު ވަނީ ފްލެޓްތައް ޙަވާލުކުރެވޭނެކަމަށް ލަފާކުރާ ތާރީޚުތައް އާއްމުކޮށްފައެވެ. ހުޅުމާލެ ދެވަނަ ފިޔަވަހީގައި އިމާރާތްކޮށްފައިވާ 4000 ފްލެޓްގެ ތެރެއިން އެންމެ ފުރަތަމަ ޙަވާލުކުރީ 14 ވަނަ ޓަވަރުގެ ފްލެޓްތަކެވެ. 

ބާކީ ޓަވަރުތަކުގެ ތެރެއިން އަމާން އުދަރެސްގެ ޓަވަރު 11، 12، 13، 15 އަދި 16 ވަނަ ޓަވަރުގެ ފްލެޓްތައް ޙަވާލުކުރަން ނިންމީ ޑިސެމްބަރު ދެވަނަ ހަފްތާގެ ތެރޭގައެވެ. އެ ތާރީޚާ އެއްގޮތަށް އެފްޑީސީން އިއްޔެ ވަނީ ފަސް ޓަވަރުގެ ފްލެޓްތައް ޑިސެމްބަރު 7 ވަނަ ދުވަހު ޙަވާލުކުރަން ފަށައިފައެވެ. 

އެފްޑީސީން ފަހުން އާއްމުކުރި ތާރީޚުތަކަށް ބަލާއިރު، ހުރިހާ ފްލެޓެއް ޙަވާލުކޮށް ނިމޭނީ 2026 ޖަނަވަރީ ފަހު ހަފްތާގައެވެ.