ތޫފާން ދީތުވާގެ ސަބަބުން ފެންބޮޑުވުމުގެ ހާދިސާތައް ދިމާވެ، ބޮޑެތި ގެއްލުންތައް ލިބިފައިވާ ސްރީ ލަންކާއަށް އެހީވުމުގެ ގޮތުން ސަން ސިޔާމް ގްރޫޕުން 200،000 އެމެރިކާ ޑޮލަރު ހަދިޔާކުރުމަށް ނިންމައިފި އެވެ.

ސަން ސިޔާމް ގްރޫޕުގެ ޗެއާމަން އަދި ދ. މީދޫ ދާއިރާގެ މެންބަރު އަހުމަދު ސިޔާމް މުހައްމަދު، މި އެހީގެ ރަމްޒީ ޗެކް މިއަދު ވަނީ ސްރީ ލަންކާގެ ސަފީރު މުހައްމަދު ރިޒްވީ ހަސަންއާ ބައްދަލުކުރައްވައި ހަވާލުކުރައްވާފަ އެވެ. މިކަން ހާމަކޮށްފައިވަނީ ސަން ސިޔާމް ގްރޫޕުގެ ފަރާތުން ހިންގާ ޚަބަރުފަތުރާ ވަސީލަތް ކަމަށްވާ "ސަން އޮންލައިން" އިންނެވެ.

ހަދިޔާކުރަން ނިންމި 200،000 ޑޮލަރުގެ ތެރެއިން 75،000 ޑޮލަރު މިއަދު ވަނީ ލަންކާ ސަރުކާރާ ހަވާލުކޮށްފައި ކަމަށާއި، ބާކީ ބައި ކުރިއަށް އޮތް ދުވަސްތަކުގައި ދޭނެ ކަމަށް ވެސް އެ ގްރޫޕުން ބުނެފައިވެ އެވެ. މީގެ އިތުރުން، މާދަމާއިން ފެށިގެން ސަން ސިޔާމް ގްރޫޕުގެ އެކި ކުންފުނިތަކާއި ރިސޯޓުތަކުގައި ވެސް ލަންކާއަށް އެހީ ހޯދުމުގެ ގޮތުން ފައިސާ އެއްކުރުމުގެ މަސައްކަތް ފަށާނެ ކަމަށް ސަން އިން ބުނެ އެވެ.

އަދި، އަހުމަދު ސިޔާމް މުހައްމަދު ވަނީ ލަންކާގެ ރައީސް އަނުރާ ކުމާރަ ޑިސެނަޔަކައަށް ގުޅުއްވައި، މި ހާލަތުގައި އެމަނިކުފާނަށް ހިތްވަރު ދެއްވައި، ދިވެހިރާއްޖެއިން އެކުގައި ތިބިކަން ޔަގީންކޮށްދެއްވުމުގެ ގޮތުން ޚާއްސަ ސިޓީއެއް ވެސް ފޮނުއްވާފައިވާ ކަމަށް އެ ގްރޫޕުން ބުނެފައިވެ އެވެ.

ތޫފާން ދީތުވާ ސްރީ ލަންކާގެ އިރުމަތީ އައްސޭރިއަށް އެރުމުގެ ސަބަބުން، ބޯކޮށް ވާރޭވެހި ފެންބޮޑުވުމާއި ބިންގަނޑު ކަނޑައިގެން ދިއުމުގެ ހާދިސާތަކުގައި 200 އަށް ވުރެ ގިނަ މީހުން މަރުވެ، ގިނަ އަދަދެއްގެ އުމްރާނީ ވަސީލަތްތަކަށް ގެއްލުން ލިބިފައިވެ އެވެ.

ލަންކާއަށް އެހީވުމުގެ ގޮތުން ރާއްޖޭގައި މިއަދު ކުރިއަށް ގެންދާ ޓެލެތޯންގައި މެންދުރާ ހަމައަށް ދެ މިލިއަނަށް ވުރެ ގިނަ ރުފިޔާ ލިބިފައިވެ އެވެ. މި ޓެލެތޯންގެ ފަންޑު ފޮށިތައް މާލެ، ހުޅުމާލެ، އަދި ވިލިމާލޭގެ އެކި ސަރަހައްދުތަކުގައި ވަނީ ބަހައްޓާފަ އެވެ. ދިވެހި ރުފިޔާއިން އެހީ ފޯރުކޮށްދެއްވުމަށް 7730000796107 ނަމްބަރު އެކައުންޓަށް، އަދި ޑޮލަރުން ނަމަ 7730000796106 ނަމްބަރު އެކައުންޓަށް ފައިސާ ޖަމާކުރެވޭނެ އެވެ. ހެނދުނު 9:00 ގައި ފެށި މި ޓެލެތޯން މިރޭ މެންދަމު 1:00 ގެ ނިޔަލަށް ކުރިއަށްދާނެ އެވެ.