ބަންގްލަދޭޝްގެ ކުރީގެ ބޮޑުވަޒީރު ޝައިޚް ޙަސީނާ - -

ޝައިޚް ޙަސީނާ މަރަން ހުކުމްކޮށްފި

އާއިޝަތު އަނާ ރަޝީދު
 
13 ދުވަސް ކުރިން

ބަންގްލަދޭޝްގެ ކުރީގެ ބޮޑުވަޒީރު ޝައިޚް ޙަސީނާ މަރަން ހުކުމް ކޮށްފިއެވެ. 

މި ހުކުމް އައީ، ވެރިކަމުން ދުރުކުރެވުނު ޝެއިޚް ހަސީނާއާ ދެކޮޅަށް މިދިޔަ އަހަރު ކުރި މުޒާހަރާތަކުގައި ބައިވެރިވި މީހުންނަށް ބަޑި ޖަހައި އަނިޔާވެރިވި ކަމުގެ ތުހުމަތުތައް އެކަމަނާގެ މައްޗަށް ސާބިތުވުމާ ގުޅިގެންނެވެ.

ޝަރީއަތުގެ މަޖިލީހަށް ހާޒިރުވުމަށް ކޯޓުން ތަކުރާރުކޮށް އަމުރުކުރި ނަމަވެސް ޙަސީނާ ހާޒިރުވެ ވަޑައިގެންފައި ނުވާތީ، ޝަރީއަތުގެ ކަންކަން ކުރިއަށް ގެންދިޔައީ އެކަމަނާގެ ޣައިރު ހާޒިރުގައެވެ.

މިދިޔަ އަހަރު ހިންގި އެ ހަމަލާތަކުގެ ސަބަބުން، ހަސީނާގެ 15 އަހަރު ދިގު ދެމިގެން ދިޔަ "ޚުދުމުޚުތާރު" ވެރިކަން ނިމުމަކަށް އައެވެ. ވެރިކަން ވެއްޓުމާއެކު، ހަސީނާ ވަނީ ފިއްލަވައިގެން އަވަށްޓެރި އިންޑިއާއަށް ވަޑައިގެންފައެވެ. އެއަށްފަހު އާންމު ތަންތަނުން އެކަމަނާ ފެނިފައެއް ނުވެއެވެ.

ހަސީނާއަށް މަރުގެ ހުކުމް އިއްވުން އެކަށީގެންވާ ކަމަށް އެކަމަނާގެ ދަރިކަލުން ސަޖީބް ވަޒީދުވެސް ވަނީ ބަޔާންކުރައްވާފައެވެ.

އދ އިން ނެރެފައިވާ ރިޕޯޓެއްގައި ލަފާކުރެވޭ ގޮތުގައި، އެ އަހަރު ހިންގި މުޒާހަރާތަކުގައި ގާތްގަނޑަކަށް 1،400 މީހުން މަރުވެފައިވެއެވެ. މީގެ ތެރެއިން ގިނަ މީހުން މަރުވެފައިވަނީ ސަލާމަތީ ބާރުތަކުން ދިން ހަމަލާތަކުގެ ސަބަބުންނެވެ.

ނަމަވެސް، މި ހަފްތާގައި ބީބީސީއަށް ދެއްވި އިންޓަވިއުއެއްގައި ހަސީނާ ވިދާޅުވީ، އެ ހަމަނުޖެހުންތަކުގައި އިންސާނިއްޔަތާ ޚިލާފު އެއްވެސް އަމަލެއް ހިންގާފައި ނުވާނެ ކަމަށެވެ. އަދި ޣައިރު ހާޒިރުގައި ކުރިއަށް ގެންދިޔަ އެކަމަނާގެ ޝަރީއަތަކީ، ސިޔާސީ އިދިކޮޅު ފަރާތްތަކުގެ ބާރުގެ ދަށުގައި އޮތް ނުރަސްމީ ކޯޓަކުން ކުޅުނު ޑްރާމާއެއް ކަމަށްވެސް އެކަމަނާ ސިފަކުރެއްވިއެވެ.

މިކަން ދޮގުކުރައްވަމުން، ބަންގްލަދޭޝްގައި މިހާރު ވެރިކަން ކުރާ ވަގުތީ ސަރުކާރުގެ ތަރުޖަމާނު ވިދާޅުވީ، އެއީ އިންސާފުވެރިކަމާއެކު، ދެފުށް ފެންނަ ގޮތަކަށް، ލިޔެކިޔުންތަކާއެކު ކުރިއަށްދިޔަ ޝަރީއަތެއް ކަމަށެވެ.

ޙަސީނާގެ މައްޗަށް ރަސްމީކޮށް ދައުވާ އުފުލާފައިވަނީ މި އަހަރުގެ ޖުލައި މަހުގެ ތެރޭގައި، ކުރީގެ ހޯމް މިނިސްޓަރު އަސަދުއްޒާމާން ޚާން ކަމާލް އާއި ކުރީގެ އިންސްޕެކްޓާ ޖެނެރަލް އޮފް ޕޮލިސް ޗައުދަރީ އަބްދުﷲ އަލް މާމުން ވެސް ހިމެނޭ ގޮތަށެވެ.