މި މަހުގެ 10 ވަނަ ދުވަހު އިމިގްރޭޝަނުން ތަޢާރަފްކުރި، އޮންލައިންކޮށް ވިސާ ހޯދޭ ނިޒާމަށް މިއަދުން ފެށިގެން ވަނީ ޢަމަލުކުރަން ފަށާފައެވެ. 

މި ބަދަލާއެކު ބިދޭސީންގެ މަސައްކަތު ވިސާއާއި އެހެނިހެން ވިސާތަކަށް އެދެވޭނީ އިމިގްރޭޝަންގެ ވެބްސައިޓް މެދުވެރިކޮށެވެ.

ބިދޭސީންގެ މަސައްކަތު ވިސާ އާކުރުމަށް ނުވަތަ އާ ވިސާއަކަށް އެދެން ބޭނުންވާ ފަރާތްތަކުން، އިމިގްރޭޝަންގެ ސައިޓަށް ވަނުމަށްފަހު 'ޑްރޮޕް ޑައުން މެނޫ'އިން ވިސާ ނެގުމަށް ހަމަޖައްސާފައިވާ ބަޔަށް ގޮސް، 'ވޯކް ވިސާ'ގެ ދަށުން 'އޮންލައިން އެކްސްޕެޓް ސިސްޓަމް'އަށް ވަންނަން ޖެހެއެވެ.

އެއަށްފަހު، މަސައްކަތު ހުއްދަ ނަންބަރު ނުވަތަ ބިދޭސީ މީހާގެ ޕާސްޕޯޓު ނަންބަރު ޖަހައި، އެ މީހާގެ މައުލޫމާތު ހޯދުމަށްފަހު، 'ވިސާ' ޓެބަށް ގޮސް މަސައްކަތު ވިސާ އާކުރާ ބަޔަށް ފިތާލާށެވެ. މި މަރުހަލާގައި، ވިސާއަށް އެދި ހުށަހެޅުމަށް ބޭނުންވާ މުހިންމު ލިޔެކިއުންތައް ހިމަނަން ޖެހެއެވެ.

އިމިގްރޭޝަންގެ ވެބްސައިޓުން ފާހަގަކުރާ ގޮތުގައި، ބިދޭސީ މަސައްކަތްތެރިންގެ ޒިންމާ ނަގާ ކުންފުނިތަކުން، އެ މީހުން ރާއްޖެ އަންނަތާ 15 ދުވަހުގެ ތެރޭގައި ވިސާ ހޯދުން ލާޒިމްވެއެވެ. އިމިގްރޭޝަނުން ބަޔާންކޮށްފައިވާ ގޮތުގައި، ވިސާ ހޯދަން ޖެހޭނީ ހޯމްލޭންޑް ސެކިއުރިޓީ މިނިސްޓްރީން ދޫކޮށްފައިވާ މަސައްކަތުގެ ހުއްދައާ އެއްގޮތަށެވެ. އަދި ޞައްޙަ ވިސާއެއް ނެތި ބިދޭސީ މަސައްކަތްތެރިންނަށް ރާއްޖެއިން ފުރައިގެން ނުދެވޭނެއެވެ.

މަސައްކަތު ވިސާ ނޫން އެހެން ވިސާތަކަށް އެދޭނަމަ، އިމިގްރޭޝަންގެ 'އިމުގަ' ޕޯޓަލް މެދުވެރިކޮށް އެކަމަށް އެދެވޭނެއެވެ. އިމިގްރޭޝަނުން ބުނެފައިވާ ގޮތުގައި ދިގު މުއްދަތަކަށް ވިސާ ދޫކުރަނީ ރާއްޖޭގައި ވަޒަންވެރިވެ ތިބޭ ބިދޭސީންނަށެވެ.

އިމިގްރޭޝަންގެ ހުރިހާ ޚިދުމަތެއް ޑިޖިޓަލްކޮށްފި: މި މަހުގެ 10 ވަނަ ދުވަހު އިމިގްރޭޝަނުން ވަނީ ޕާސްޕޯޓު ހެދުމަށް ސީދާ ކައުންޓަރަށް ދިއުން ނިމުމަކަށް ގެނެސްދޭ ޚާއްސަ މޮބައިލް އެޕަކާއި އީ-ވިސާގެ ޚިދުމަތް ތަޢާރަފްކޮށްފައެވެ. މި ޚިދުމަތްތައް ތަޢާރަފްކުރެވުނީ 'މޯލްޑިވްސް 2.0' ގެ ދަށުން އިމިގްރޭޝަންގެ ޚިދުމަތްތައް ޑިޖިޓަލައިޒް ކުރުމުގެ މަސައްކަތުގެ ތެރެއިންނެވެ. 'މޯލްޑިވްސް 2.0'ގެ ތަޞައްވުރުގެ ދަށުން ސަރުކާރުގެ އެހެން އިދާރާތަކުން ވެސް ދަނީ ޚިދުމަތްތައް ޑިޖިޓަލްކުރުމުގެ މަސައްކަތް ކުރަމުންނެވެ.