ފިނޭންސް މިނިސްޓްރީގެ އެންމެ ފަހުގެ ހިސާބުތަކުން ދައްކާ ގޮތުގައި، ދައުލަތުގެ ދަރަނި އަދާކުރުމަށްޓަކައި ގާއިމުކޮށްފައިވާ ސޮވެރިން ޑިވެލޮޕްމެންޓް ފަންޑު (އެސްޑީއެފް) އަށް މި އަހަރު 2.2 ބިލިއަން ރުފިޔާ ޖަމާކުރެވިފައިވެ އެވެ. 

މިއީ މިއަހަރުގެ ބަޖެޓުގައި އެސްޑީއެފް އަށް ޖަމާކުރަން ކަނޑައެޅި 2.1 ބިލިއަން ރުފިޔާ އަށް ވުރެ އިތުރު އަދަދެކެވެ.

އެސްޑީއެފްގެ ޖުމްލަ ސައިޒު މިހާރު ހުރީ 10.9 ބިލިއަން ރުފިޔާގަ އެވެ. ނަމަވެސް މި ފައިސާގެ ބޮޑު ބައެއް ހުރީ ދައުލަތުގެ ޓީބިލް (ޑޮމެސްޓިކް ސެކިއުރިޓީ) ގައި އިންވެސްޓްކޮށްފަ އެވެ. އެގޮތުން 8.3 ބިލިއަން ރުފިޔާ ނުވަތަ މުޅި ފަންޑުގެ 76 ޕަސެންޓް ހުރީ އިންވެސްޓްކޮށްފަ އެވެ. މިވަގުތު ބޭނުން ކުރެވޭ ގޮތަށް ހުރީ 2.4 ބިލިއަން ރުފިޔާ އެވެ. މި ފަންޑަށް މިހާތަނަށް ޖަމާކުރި ފައިސާގެ ތެރެއިން 6.5 ބިލިއަން ރުފިޔާ އަކީ އެއާޕޯޓު ޑިވަލޮޕްމެންޓް ފީގެ ގޮތުގައި ލިބިފައިވާ ފައިސާ އެވެ.

އަންނަ އަހަރުގެ ދަރަނި އަދާކުރުމަށް އެސްޑީއެފް ފަންޑުން 4.1 ބިލިއަން ރުފިޔާ ބޭނުން ކުރަން ބަޖެޓު ފޮތުގައި ވަނީ ކަނޑައަޅާފަ އެވެ. އަދި އަންނަ އަހަރު ވެސް އެ ފަންޑަށް 2.5 ބިލިއަން ރުފިޔާ ޖަމާކުރަން ބަޖެޓުގައި ވަނީ ހިމަނާފަ އެވެ.

އަންނަ އަހަރަށް ލަފާކުރާ ދައުލަތުގެ ބަޖެޓަށް ބަލާއިރު، ދަރަނި ދެއްކުމުގެ ޖުމްލަ ހަރަދު ވަރަށް ބޮޑު އެވެ. ދަރަނި އަސްލު (ޕްރިންސިޕަލް) ދެއްކުމަށް 12.9 ބިލިއަން ރުފިޔާ ހޭދަކުރާ އިރު، އިންޓްރެސްޓް ހަރަދުގެ ގޮތުގައި 5.5 ބިލިއަން ރުފިޔާ ހިމަނާފައިވެ އެވެ. ޖުމްލަ 18.4 ބިލިއަން ރުފިޔާ ދަރަނި ދެއްކުމަށް ހޭދަވާނެ ކަމަށް ލަފާކުރެވޭއިރު، މިއީ މުޅި ބަޖެޓުގެ 29 ޕަސެންޓެވެ.

ދަރަނި އަދާކުރަން ބޭނުންވާ ބޮޑު ބައި ހޯދުމަށް ސަރުކާރުން ރީފައިނޭންސިންގެ ގޮތްތަކަށް ބަރޯސާވެ އެވެ. އަންނަ އަހަރުގެ ބަޖެޓުގައިވާ ގޮތުން، ލޯނު މެދުވެރިކޮށް 2.9 ބިލިއަން ރުފިޔާ، ސުކޫކާއި ބޮންޑު މެދުވެރިކޮށް 6.9 ބިލިއަން ރުފިޔާ، އަދި މަލްޓިލެޓްރަލް ބަޖެޓް ސަޕޯޓަށް 7.0 ބިލިއަން ރުފިޔާ ހޯދަން ވަނީ ކަނޑައަޅާފަ އެވެ. މީގެ އިތުރުން ރާއްޖޭގެ މާލީ އިދާރާތަކުން 5.1 ބިލިއަން ރުފިޔާ ހޯދުމަށް ވެސް ވަނީ ހިމަނާފަ އެވެ.