ކްރޮސްރޯޑްސް މޯލްޑިވްސްގައި ބޭއްވުނު މޯލްޑިވްސް ވިމެން އިން ޕޮލިސިންގ ސަމިޓް 2025 ގެ އިފްތިތާޙީ ރަސްމިއްޔާތުގައި، ޔުނިފޯމް ބޮޑީސްތަކުގައި އަންހެނުން ޚިދުމަތްކުރުމުގެ ސްޓްރެޓެޖިކް މުހިންމުކަން ފަސްޓް ލޭޑީ ފުރަތަމަ ލޭޑީ ސާޖިދާ މުޙައްމަދު ފާހަގަކުރައްވައިފިއެވެ.

"އެމްޕަވަރޑް ވިމެން: ސޭފަރ ކޮމިއުނިޓީސް" ގެ ޝިޢާރުގެ ދަށުން ބޭއްވުނު މި ސަމިޓްގައި ވާހަކަފުޅު ދައްކަވަމުން ފަސްޓް ލޭޑީ ވިދާޅުވީ، ޔުނިފޯމް ބޮޑީސްތަކުގައި މަސައްކަތްކުރާ އަންހެނުންނަކީ އަމާންކަން ދެމެހެއްޓުމުގެ ބަލަދުވެރިންނާއި މުޖުތަމަޢުގައި ކުރިއެރުމުގެ ނިޝާންތަކެއް ކަމުގައެވެ.

ފަސްޓް ލޭޑީގެ ވާހަކަފުޅުގައި، ފުލުހުންނާއި، ސިފައިންނާއި، ކަސްޓަމްސް އަދި އިމިގްރޭޝަން އަދި އެހެނިހެން ޔުނިފޯމް ޚިދުމަތްތަކުގައި އަންހެނުން އަދާކުރާ ގިނަގުނަ ދައުރު ފާހަގަކުރައްވައި، އެފަރާތްތަކަކީ ހަމައެކަނި ޤާނޫނު ތަންފީޒުކުރާ ބައެއްގެ ގޮތުގައި ނޫން، ކުރިއަށް އޮތް ޖީލުތަކަށް އިލްހާމް ދޭ ބައެއްގެ ގޮތުގައިވެސް ސިފަކުރެއްވިއެވެ.

އަދި ސައިބަރ ކުށްތަކާއި، ޓްރެފިކިންގ، މޫސުމީ ކާރިސާތަކާއި، ހަރުކަށި ފިކުރުފަދަ ދުނިޔެއާއި ސަރަޙައްދީ ސަލާމަތީ ގޮންޖެހުންތައް އިތުރުވަމުންދާކަން ފާހަގަކުރައްވައި، މިފަދަ މައްސަލަތައް ހައްލުކުރުމުގައި އަންހެނުންގެ މުހިންމު ދައުރު ފާހަގަކުރެއްވިއެވެ. އަދި އަންހެން ކުދިންނާއި އަންހެނުންނަށް ސެކިއުރިޓީ ދާއިރާއަކީ ކުރިއެރުން ލިބޭނެ އަދި އެމީހުންގެ ޚާއްޞަ ހުނަރުތައް ބޭނުންކުރެވޭނެ ދާއިރާއެއްގެ ގޮތުގައި ދެކުމަށް ހިތްވަރުދެއްވިއެވެ.

މި ރަސްމިއްޔާތުގައި ފަސްޓް ލޭޑީ ވަނީ "އަންހެނަކު އޭނާގެ މުޖުތަމަޢު ރައްކާތެރިކުރުމަށް ކުރިއަށް އަޅާ ކޮންމެ ފިޔަވަޅަކުން، ޢަދުލުގެ މާނަ އަލުން އެކުލަވާލެވޭ" ކަމަށް ވިދާޅުވެ، މޯލްޑިވްސް ވިމެން އިން ޕޮލިސް ޗެލެންޖް ކޮއިން ވެސް ތަޢާރަފުކުރައްވާފައެވެ.