މިދިޔަ ޖުލައި މަހު ލ. މާވަށުގައި އެ ރަށު މޫސާ އިބްރާހިމް މަރާލި މައްސަލައިގެ ތަހުގީގު ނިންމައި ދައުވާކުރަން ޕްރޮސެކިއުޓާ ޖެނަރަލުގެ އޮފީހަށް ފުލުހުން ފޮނުވައިފި އެވެ.

އެ މައްސަލާގައި ފުލުހުން ދައުވާކުރަން ފޮނުވީ ހދ. ނޮޅިވަރަންފަރު، އަސަރީމަންޒިލް، މުހައްމަދު އިބްރާހިމްގެ މައްޗަށެވެ. އުމުރުން 29 އަހަރުގެ އެ ޒުވާނާ ވަނީ މޫސަގެ ބޮލަށް ހަމަލާދީ މަރާލި 28 ވަނަ ދުވަހު ހައްޔަރުކޮށް، ޝަރީއަތް ނިމެންދެން ބަންދުކޮށްފަ އެވެ.

އެ މީހާ އަކީ މަސްތުވާތަކެތީގެ ރިކޯޑު އޮންނަ މީހެއް ކަމަށް ވެސް ފުލުހުން ބުންޏެވެ.

ފުލުހުން ބުނީ މިދިޔަ އަންގާރަ ދުވަހު އެ މައްސަލައިގެ ތަހުގީގު ނިންމައި ޕީޖީ އޮފީހަށް ފޮނުވާފައިވާ ކަމަށާއި އެ އޮފީހުން އެ ރިޕޯޓު ބަލައިގެންފައިވާ ކަމަށެވެ.

މޫސަ އާއި މުހައްމަދުގެ މެދުގައި ހިނގި ހަމަނުޖެހުންތަކެއްގައި މޫސަގެ ކަރަށް ހަމަލާދިނުމުގެ ސަބަބުން ލިބުނު އަނިޔާއަށް ފަރުވާދޭން މާވަށު ހެލްތު ސެންޓަރަށް ގެންދިޔައިރު ވެސް މަރުވެފައިވާ ކަމަށް އެ ސެންޓަރާ ހަވާލާދީ ފުލުހުން ބުނެފައިވެ އެވެ.

މޫސައަށް ހަމަލާދިނުމަށް ބޭނުންކުރި ކަމަށް ބެލެވޭ ވަޅި ވެސް ފުލުހުން ވަނީ ހޯދައިފަ އެވެ.

ރަށުން ވާހަކަ ދެއްކި ބައެއް މީހުން ބުނި ގޮތުގައި މޫސަގެ ކަރަށް ހަމަލާ އަމާޒުވީ، މުހައްމަދަށް ދިން އަނިޔާތަކުން އަމިއްލައަށް ސަލާމަތްވާން އުޅެނިކޮށެވެ.