އދ. ދިގުރަށުގައި މޫދަށް ފުންމާލި ވަގުތު ދޯނީގެ ބުރަފަތީގައި ޖެހި ޒަޚަމްވެގެން ނިޔާވި، ސިންގަޕޫރަށް ނިސްބަތްވާ އުމުރުން 15 އަހަރުގެ ކުޑަކުއްޖާގެ މަރުގެ ތަހުގީގަށް، މުދައްރިސަކާއި ބައެއް ދަރިވަރުންގެ ބަޔާން ނަގާފައިވާ ކަމަށް ފުލުހުން ބުނެފިއެވެ.
ފުލުހުން މިއަދު ނެރުނު ބަޔާނެއްގައި ބުނީ މިދިޔަ ނޮވެމްބަރު އަށްވަނަ ދުވަހު ދިގުރަށުގައި ސްނޯކްލިންއަށް ގޮސް އުޅުމުގެ ތެރޭގައި ބޯޓު ޕްރޮޕެލާއަކުން ޖެހި ނުރައްކާތެރި ޒަޚަމްތަކެއް ލިބުނު ސިންގަޕޫރުގެ ދަރިވަރެއް ކަމަށްވާ ޖެނާ އާރިއަން ޗަން ޒީ-އެން މަރުވި ހިތާމަވެރި ހާދިސާގެ ފުރިހަމަ ތަހުގީގެއް ފުލުހުން ކުރިއަށް ގެންގޮސްފައިވާ ކަމަށެވެ.
އެ ހާދިސާ ހިނގާފައި ވަނީ ވޭލް ޝާކްއާ ގުޅޭ ދިރާސާއެއް ހަދަން ސްޓަޑީ ޓުއާއެއްގައި ގޮސް އުޅެނިކޮށެވެ.
އެ ހާދިސާއާ ގުޅިގެން މި އަހަރުގެ މެއި މަހުގެ ތެރޭގައި ފުލުސް އޮފިސަރުން ސިންގަޕޫރަށް ގޮސް ސްޓަޑީ ޓުއާގައި އުޅުނު ދަރިވަރުންނާއި މުދައްރިސެއްގެ ބަޔާން ހޯދާފައިވާ ކަމަށް އެ ބަޔާނުގައި ބުންޏެވެ.
އެ ތަހުގީގު، ޕްރޮސެކިއުޓާ ޖެނެރަލްގެ އޮފީހާއި އެހެނިހެން އިދާރާތަކާ ގުޅިގެން ޒިންމާދާރުކަމާއެކު ކުރަމުންދާނެ ކަމުގެ ޔަގީންކަން ފުލުހުން ވަނީ އަރުވައިފައެވެ. އަދި ހުޅުވާލެވިފައިވާ ތަހުގީގެއް ކުރިއަށް ގެންގޮސް، ތަހުގީގު ނިންމައި، ރިޕޯޓް ކަމާބެހޭ އެންމެހާ އިދާރާތަކަށް ފޯރުކޮށްދޭނެ ކަމަށް ވެސް ފުލުހުން ބުންޏެވެ.
