އައްޑޫ ސިޓީގެ ފޭދޫގައި ތަރައްގީ ކުރާ ސްޕޯޓްސް ކޮމްޕްލެކްސްގެ މަސައްކަތް މި އަހަރުގެ ފަހުކޮޅު ފަށައި، އަންނަ ނޮވެމްބަރަށް ނިންމާލެވޭނެ ކަމަށް އުއްމީދު ކުރައްވާ ކަމަށް، ޒުވާނުން ބާރުވެރިކުރުވުމާއި ކުޅިވަރާއި ހަށިހެޔޮކަމާ ބެހޭ ވަޒީރު އަބްދުﷲ ރާފިއު ވިދާޅުވެއްޖެއެވެ.
މި މަޝްރޫއުގެ މަސައްކަތް ހަވާލުކޮށްފައި ވަނީ ސްޕޯޓްސް ކޮމްޕްލެކްސް އެޅުމަށް ހަވާލު ކުރީ މޯލްޑިވްސް އެއާޕޯޓްސް ކޮމްޕެނީ ލިމިޓެޑް (އެމްއޭސީއެލް) އާއެވެ.
ރޭގެ "އަހާ"ފޯރަމްގައި މީހަކު ކުރި ސުވާލަކަށް ޖަވާބުދެއްވަމުން ރާފިއު ވިދާޅުވީ، ސްޕޯޓްސް ކޮމްޕްލެކްސް އެޅުމަށް ބިން އެ ވުޒާރާ ހަވާލު ކުރެވިފައިވާ ކަމަށެވެ. އަދި އެ މައުލޫމާތު އެމްއޭސީއެލްއާ ހިއްސާ ކުރެވިފައިވާ ކަމަށެވެ.
"އެ ބޭފުޅުން އެކަމަށް ބޭނުންވާ ހުރިހާ ކުރެހުމަކާއި، އެކަމަށް ބޭނުންވާ ހުރިހާ ޓެކްނިކަލް މަސައްކަތެއް ވަނީ ނިމިފައި، ސްޓްރަކްޗާގެ މަސައްކަތް އަޅުގަނޑު ގަބޫލުކުރާ ގޮތުގައި ޕްރޮޑަކްޝަނަށްވެސް ވަނީ ދީފައި،".
ވަޒީރު ވިދާޅުވީ، އެ މަސައްކަތް މި އަހަރުގެ ފަހުކޮޅު ފެށިގެން ދާނެ ކަމަށް އުއްމީދު ކުރެވޭ ކަމަށެވެ.
"އަންނަ އަހަރުގެ ނޮވެމްބަރުގެ ހިސާބަށް އެ މަޝްރޫއު ނިންމާލެވޭނެ ކަމަށް އަޅުގަނޑުމެން އުއްމީދު ކުރަނީ، މިއީ ޕްރި-ފެބްރިކޭޓެޑް ސްޓްރަކްޗާއެއް ވީމަ، ޕްލެޓްފޯމް އޭގެ ކުރީގައި ހެދިޔަސް، އެ ޕްލެޓްފޯމް އަޮންނާނީ. އެހެން ނަމަވެސް އަޅުގަނޑު ހިތުން އެެ ބޭފުޅުން ބޭނުންފުޅުވަނީ އެ ތަކެތި އަންނަންވާއިރަށް އިމާރާތުގެ ޕްލެޓްފޯމް އެއްކޮށް ނިންމައި، އެކަމަށް ރެޑީކޮށްފައި ބޭއްވުން،".
ވަޒީރު ވިދާޅުވީ ބެޑްމިންޓަން ކޯޓުގެ މަޝްރޫއަކީ ތަންކޮޅެއް ގިނަ ދުވަސްވެފައި އޮތް މަޝްރޫއެއް ކަމަށާއި، އެތަނުގައި ކޮންކްރީޓް ބުޑުތައް ޖެހިފައިވާ ކަމަށެވެ.
"އިރާދަކުރެއްވިއްޔާ އަޅުގަނޑުމެން އެ މަސައްކަތް ވީހާވެސް އަވަހަކަަށް ކޮންޓްރެކްޓަރާއި ވާހަކަދައްކައިގެން، ކުރިއަށްގެންދާނަން. އަދި ކޮންޓްރެކްޓަރު މަސައްކަތް ކުރިއަށްގެންދިއުން ލަސްވާކަމަށް ވެއްޖެއްޔާ، އެ ކޮންޓްރެކްޓް ބާތިލްކޮށް، އިރާދަކުރެއްވިއްޔާ އަވަސް ފުރުސަތެއްގައި އެ މަސައްކަތް ކުރިއަށްގެންދާނެ ވާހަކަ ދަންނަވާލަން،".
