ގާނޫނުއަސާސީއާ ހިލާފަށް ރަސްމާލެއިން ބޭރުގެ ކުންފުންޏަކަށް ބޮޑު ބިމެއް ދޫކުރަން ނިންމާފައިވާ ކަމަށް ބުނެ، އެ ނިންމުން ހުއްޓުވުމަށް އެދި ސުޕްރީމް ކޯޓަށް ދުސްތޫރީ މައްސަލައެއް ހުށަހަޅައިފި އެވެ.

ރަސްމާލޭގައި "މޯލްޑިވްސް ވޯޓާފްރަންޓް އެންޑް މެރީނާ" ގެ ނަމުގައި ބިޔަ މަޝްރޫއެއް ހިންގުމަށްޓަކައި، ޔޫއޭއީގެ އީގަލް ހިލްސް ކުންފުންޏާއެކު ދިވެހި ސަރުކާރުން ކޮމާޝަލް ޓާމްސް އެގްރީމަންޓެއްގައި ސޮއިކުރީ މިދިޔަ ހަފުތާގަ އެވެ. މި އެއްބަސްވުމުގެ ދަށުން ރަސްމާލެއިން 500 ހެކްޓަރުގެ ބިން 99 އަހަރުގެ މުއްދަތަށް އެ ކުންފުންޏަށް ކުއްޔަށް ދިނުމަށް ވަނީ ހަމަޖެހިފަ އެވެ. މި ނިންމުމާ ގުޅިގެން ރާއްޖޭގެ ބައެއް ސިޔާސީ ފަރާތްތަކުން އަންނަނީ ކަންބޮޑުވުން ފާޅުކުރަމުންނެވެ.

ގާނޫނީ ވަކީލު އަލީ ހުސެއިން ވިދާޅުވީ، ގާނޫނުއަސާސީގެ 250 ވަނަ މާއްދާއާ ހިލާފަށް ބޭރު ކުންފުންޏަކަށް ރަސްމާލެއިން ބިން ދޭން ސަރުކާރުން ނިންމާފައިވާތީ، އެކަން ހުއްޓުވުމަށް އެދި ސުޕްރީމް ކޯޓަށް މައްސަލަ ހުށަހަޅާފައިވާ ކަމަށެވެ.

ސުޕްރީމް ކޯޓަށް ހުށަހެޅި މި މައްސަލައިގައި، އެ މައްސަލައާ މެދު ކޯޓުން ވަކި ގޮތެއް ނިންމަންދެން، އީގަލް ހިލްސް ކުންފުންޏާ ދެމެދު ވެފައިވާ އެއްބަސްވުމުގެ އެންމެހައި ކަންކަން މަޑުޖައްސައިލުމުގެ އަމުރެއް ނެރެދިނުމަށް ވަނީ އެދިފަ އެވެ.

މީގެއިތުރުން، އެ އެއްބަސްވުމުގެ ދަށުން ރަސްމާލޭގެ އެއްވެސް ބިމަކާ މެދު އީގަލް ހިލްސް ނުވަތަ އެހެން ތިންވަނަ ފަރާތެއްގެ ހައްގެއް ނުވަތަ މަސްލަހަތެއް އުފެދިގެންދާނެ އެއްވެސް ކަމެއް ނުކުރުމަށް ދިވެހި ސަރުކާރުގެ މައްޗަށް ވަގުތީ އަމުރެއް ނެރެދިނުމަށް ވެސް އެ މައްސަލައިގައި ކޯޓުގައި ވަނީ އެދިފަ އެވެ.