ރައީސް މުހައްމަދު މުއިއްޒުގެ ސަރުކާރުގެ އަމަލުތަކާ ދެކޮޅަށް، އިދިކޮޅުގައި ތިއްބެވި ކުރީގެ ރައީސުން ކަމަށްވާ މުހައްމަދު ނަޝީދާއި އިބްރާހިމް މުހައްމަދު ސޯލިހާ އެކު މަސައްކަތް ކުރެއްވުމަށް ތައްޔާރަށް ހުންނެވި ކަމަށް ކުރީގެ ރައީސް އަބްދުﷲ ޔާމީން މިއަދު ވިދާޅުވެއްޖެ އެވެ. ޔާމީން މިހެން ވިދާޅުވީ ގައުމު ސަލާމަތްކުރުމަށް ކުރީގެ ތިން ރައީސުން އެކުގައި ނުކުންނަން ޖެހޭ ކަމަށް އެމްޑީޕީގެ ކުރީގެ ޗެއާޕާސަން ފައްޔާޒު އިސްމާއީލް ގޮވާލައްވާފައި ވަނިކޮށެވެ.
ފައްޔާޒު އިސްމާއީލް ވިދާޅުވީ ރައީސް މުއިއްޒުގެ 'ހުދުމުހުތާރު' ވެރިކަމުން ގައުމު ސަލާމަތްކުރަން ޖެހޭ ކަމަށާއި، ތަފާތު ވިސްނުންތައް އެއްފަރާތްކޮށް ސަރުކާރާ ދެކޮޅަށް މުޅި ރާއްޖޭގައި މުޒާހަރާކޮށް ރައްޔިތުންގެ ނުރުހުމުގެ އަޑު އިއްވަން ޖެހޭ ވަގުތު ޖެހިއްޖެ ކަމަށެވެ. މި ގޮވާލުމަށް އިޖާބަ ދެއްވަމުން ޔާމީން ވިދާޅުވީ ނޫސްވެރިކަމުގެ މިނިވަންކަން އިއާދަކުރުމަށްޓަކައި ކުރީގެ ރައީސުންނާ އެކު މަސައްކަތް ކުރައްވާނެ ކަމަށެވެ.
ނޫސްވެރިން ހައްޔަރުކުރުމުގެ މައްސަލަ ހޫނުވުން
މި މައްސަލަ ފެންމަތިވެފައިވަނީ ރައީސް މުއިއްޒުގެ މައްޗަށް ތުހުމަތުތަކެއް ކޮށް 'އަދަދު' ނޫހުން ގެނެސްދިން ޑޮކިއުމަންޓަރީއަކާ ގުޅިގެން، އެ ނޫހުގެ ދެ ނޫސްވެރިޔަކު ޖަލަށް ލާފައިވާ ދަނޑިވަޅެއްގަ އެވެ. މިކަމާ ގުޅިގެން ކުރީގެ ރައީސް މުހައްމަދު ނަޝީދު ވެސް ވަނީ ނޫސްވެރިން ހައްޔަރުކުރުމާ ދެކޮޅަށް މިރޭ ބާއްވާ އިހުތިޖާޖުގައި ބައިވެރިވެވަޑައިގަންނަވާނެ ކަމަށް އިއުލާން ކުރައްވާފަ އެވެ.
ނޫސްވެރިކަމުގެ ދިފާއުގައި މަސައްކަތް ކުރައްވަން ތައްޔާރަށް ހުންނެވި ކަމަށް ޔާމީން ވިދާޅުވި ނަމަވެސް، އެ މަނިކުފާނުގެ ވެރިކަމުގައި ނޫސްވެރިކަމުގެ މިނިވަންކަމަށް ބޮޑެތި ހުރަސްތަކެއް ކުރިމަތިވިކަން ފާހަގަކުރެވެ އެވެ. އެގޮތުން ޔާމީންގެ ވެރިކަމުގައި ބައެއް ނޫސްތައް ބަންދުކޮށް، ނޫސްވެރިން ހައްޔަރުކުރުމުގެ އިތުރުން އިދިކޮޅު ފަރާތްތަކާ ގުޅުން އޮންނަ މީޑިއާތައް ރައީސް އޮފީހަށް ވެއްދުން ވެސް މަނާކޮށްފައިވެ އެވެ.
