މެދުއިރުމަތީގައި މިހާރު ހިނގަމުންދާ ހަނގުރާމައާއި ގުޅިގެން ދިވެހި ސަރުކާރުގެ ސިޔާސަތު ވަރަށް ސާފުކަމަށާއި، ރާއްޖެ އޮތީ އަރަބި އިސްލާމީ ގައުމުތަކާއެކު އެއް ރޫހެއްގައި ކަމަށް ރައީސުލްޖުމްހޫރިއްޔާ ވިދާޅުވެއްޖެއެވެ.
ރައީސް ވިދާޅުވީ ސަރުކާރުން ނެރުނު ބަޔާނުގައިވެސް ހަމަލާދޭ ހުރިހާ ފަރާތްތަކުން އެ ކުރާ ކަންތައްތަކާ ސަރުކާރުން ދެކޮޅުކަން ހާމަކޮށް، ހަނގުރާމަ ހުއްޓާލުމަށް ގޮވާލާފައިވާނެ ކަމަށެވެ.
ސަރުކާރުގެ ސްޓޭންޑް ހާމަކުރުމުގެ ގޮތުން ފާއިތުވި ދެ ދުވަސް ތެރޭގައި ގިނަ މަސައްކަތްތަކެއް ކުރެވިފައިވާކަން ފާހަގަކުރައްވަމުން ރައީސް ވިދާޅުވީ، ކަމާ ގުޅޭ ސެކްޓޯރަލް ބަޔާންތައްވެސް ތަފާތު ވުޒާރާތަކުން ނެރެފައިވާ ކަމަށެވެ. މީގެ ތެރޭގައި އިކޮނޮމިކް މިނިސްޓްރީ، ޓޫރިޒަމް މިނިސްޓްރީ، ފިނޭންސް މިނިސްޓްރީ، ހަޔަރ އެޑިޔުކޭޝަން މިނިސްޓްރީ އަދި އިސްލާމިކް މިނިސްޓްރީ ހިމެނޭކަން އެމަނިކުފާނު ފާހަގަކުރެއްވިއެވެ.
"ސަރުކާރުން ސްޓޭންޑް ވަރަށް ސާފު. ދެން އަޅުގަނޑު އެވަރުންވެސް ނިންމާނުލާންވެގެން ސީދާ އިރާނުން އެ ހަމަލާދޭ ގައުމުތަކުގެ ވެރިންނަށް މިދަނީ އިރާދަކުރެއްވިއްޔާ ފުރުސަތު ލިބޭހާ ވާހަކަ ގުޅަމުން،" ރައީސް ވިދާޅުވިއެވެ. އެމަނިކުފާނު އިތުރަށް ވިދާޅުވީ ރޭގެ ވަގުތެއްގައާއި މިއަދު މެންދުރުފަހު އިތުރު ހަތަރު ގައުމެއްގެ ވެރިންނާ ގުޅުއްވުމަށް ހަމަޖެހިފައިވާ ކަމަށާއި، މިއީ ހަމައެކަނި ބަޔާނަކުން ނިންމާނުލުމަށް ކުރާ މަސައްކަތެއް ކަމަށެވެ.
އިރާނުގެ މަޝްރަހާ ގުޅޭގޮތުން ވާހަކަފުޅު ދައްކަވަމުން ރައީސް ވިދާޅުވީ، ރާއްޖެއިން އަބަދުވެސް އަމަލުކުރަމުންދަނީ ގައުމީ ހަމަތަކުގެ މަތިން ކަމަށެވެ. އެގޮތުން 2024 ވަނަ އަހަރު އިރާނުގެ ރައީސް އަވަހާރަވުމާ ގުޅިގެން ތައުޒިއްޔާ ފޮނުއްވި ކަމަށާއި، އަދި އާ ރައީސް ހުވާކުރެއްވުމުގެ ރަސްމިއްޔާތަށް ރާއްޖޭގެ ނައިބު ރައީސް ވަޑައިގެންނެވިކަންވެސް ފާހަގަކުރެއްވިއެވެ.
ނިންމަވާލައްވަމުން ރައީސް ވިދާޅުވީ ރާއްޖެއަކީ އަރަބި އިސްލާމީ ގައުމުތަކާ ވަރަށް އަޚުވަތްތެރި ގުޅުމެއް ބާއްވާ ގައުމެއް ކަމަށެވެ. އަދި މިހާރު ދިމާވެފައިވާ މައްސަލަތަކުގައިވެސް ރާއްޖެއިން މަސައްކަތް ކުރަމުންދާނީ އެ ގައުމުތަކާ އެކުގައި އެއް ރޫހެއްގައި ކަމުގެ ޔަގީންކަން ރައީސް ދެއްވިއެވެ.
