އިންޑިއާ ސަރުކާރާއެކު ދިވެހިރާއްޖެއިން ވެފައިވާ އެއްބަސްވުންތަކުގައި، ރާއްޖޭގެ ގައުމީ ސަލާމަތަށް ނުރައްކާވާ ފަދަ އެއްވެސް ކަމެއް މިހާރު ނޯންނާނެ ކަމުގެ ޔަގީންކަން ރައީސުލްޖުމްހޫރިއްޔާ ޑރ. މުހައްމަދު މުއިއްޒު ދެއްވައިފިއެވެ.
ރައީސް މިހެން ވިދާޅުވީ މިއަދު ބޭއްވި ނޫސްވެރިންގެ ބައްދަލުވުމުގައި ނޫސްވެރިޔަކު ކުރި ސުވާލަކަށް ޖަވާބު ދެއްވަމުންނެވެ.
ރައީސް ވިދާޅުވީ ގައުމީ ސަލާމަތަށް ނުރައްކާވާ ފަދަ ކަމެއް އެއްބަސްވުމެއްގައި އޮތް ނަމަ އެކަމެއް ސަރުކާރުން ހާމަކުރާނެ ކަމަށެވެ. އަދި ކުރިން އެއްބަސްވުންތަކުގައި ހުރި ބައެއް ކަންކަމަށް ބަދަލު ގެނެސްފައިވާ ކަމަށާއި، މިހާރު އޮތް އެއްބަސްވުންތަކުގެ ސަބަބުން ގައުމީ ސަލާމަތަށް އެއްވެސް ނުރައްކަލެއް ކުރިމަތިނުވާނެ ކަމަށް އެމަނިކުފާނު ތަކުރާރުކޮށް ވިދާޅުވިއެވެ.
އެއްބަސްވުންތަކުން އުނިކުރި ބައެއް މަޢުލޫމާތުތައް ހާމަކުރުމާ ގުޅޭގޮތުން ރައީސް ވިދާޅުވީ، އެކަންކަމަކީ ގައުމީ ސަލާމަތާ ގުޅުންހުރި ކަންކަން ކަމަށްވާނަމަ އެ މައުލޫމާތުތައް ހާމަނުކުރެވޭނެ ކަމަށެވެ. "އުނިކުރި ކަންކަމަކީ ކޮބައިކަން ޤައުމީ ސަލާމަތަށް ނުރައްކާވާންޏާ ހާމައެއް ނުކުރެވޭނެ. ނެޝަނަލް ސެކިއުރިޓީ ކައުންސިލްގައި އަޅުގަނޑުމެން ތިކަމާ މަޝްވަރާކުރިން. މަޝްވަރާކޮށްފައި އެ މަޢުލޫމާތުތައް އަޅުގަނޑުމެން އެހެރީ ވިތްހޯލްޑް ކޮށްލާފައި،" ރައީސް ވިދާޅުވިއެވެ.
މީގެ އިތުރުން، އެއްބަސްވުންތައް ހާމަކުރުމުގެ ވައުދާ ގުޅޭގޮތުން ވާހަކަ ދައްކަވަމުން ރައީސް ވިދާޅުވީ އެމަނިކުފާނަކީ ވައުދު ފުއްދަވާ ބޭފުޅެއް ކަމަށާއި، މިހާތަނަށްވެސް ވައުދުތައް ފުއްދަވަމުން ގެންދަވާ ކަމަށެވެ. ނަމަވެސް ބައެއް މައުލޫމާތުތައް ހާމަކުރުމުގައި ވަގުތާއި ހާލަތަށް ބަލަންޖެހޭ ކަމަށް އެމަނިކުފާނު ފާހަގަކުރެއްވިއެވެ.
ރައީސް އިތުރަށް ވިދާޅުވީ މިވަގުތަށް ބައެއް މައުލޫމާތުތައް ހިފަހައްޓާފައިވަނީ ޓައިމިންގ މުހިންމުވުމުން ކަމަށެވެ. އަދި އެއްބަސްވުންތަކުގައި ހުރި ގައުމީ ސަލާމަތަށް ނުރައްކާވާ ފަދަ ކަންކަމަށް ބަދަލު ގެނެސް، އެކަންކަން އިސްލާހުކޮށްފައިވާކަން ރައީސްގެ ވާހަކަފުޅުގައި ފާހަގަކުރެއްވިއެވެ.
