އަންނަ އޭޕްރީލް މަހު ބޭއްވުމަށް ހަމަޖެހިފައިވާ ލޯކަލް ކައުންސިލްތަކާއި އަންހެނުންގެ ތަރައްގީއަށް މަސައްކަތްކުރާ ކޮމިޓީތަކުގެ އިންތިޚާބުގައި، ސަރުކާރު ހިންގާ މައި ޕާޓީ، ޕީއެންސީން ގާތްގަނޑަކަށް 800 އާއި 900 އާ ދެމެދުގެ އަދަދަކަށް ގޮނޑި ކާމިޔާބު ކުރާނެ ކަމަށް އެ ޕާޓީގެ ޕީޖީ ލީޑަރު އިބްރާހީމް ފަލާހު މިރޭ ވިދާޅުވެއްޖެއެވެ.

މި އިންތިޚާބުގައި ވާދަކުރާ ކެންޑިޑޭޓުންގެ ތެރެއިން ނަން އަނބުރާ ގެންދިޔަ ފަރާތްތައް އުނިކުރުމަށްފަހު، މިހާރު ޖުމްލަ 2,962 ކެންޑިޑޭޓުން ވާދަކުރެއެވެ.

މި މަހުގެ ކުރީކޮޅު ފަލާހު ވިދާޅުވެފައިވަނީ، އިންތިޚާބުގެ 80 އިންސައްތަ ގޮނޑި ޕީއެންސީން ކާމިޔާބު ކުރާނެ ކަމަށެވެ. ނަމަވެސް އެ ފަހަރު އިތުރު ތަފުސީލެއް ދެއްވާފައެއް ނުވެއެވެ. ޕީއެންސީގެ މާފަންނު ދާއިރާގެ ކެމްޕެއިން ރަސްމީކޮށް އިފުތިތާހު ކުރުމަށް ބޭއްވި ހަފުލާގައި ވާހަކަދައްކަވަމުން، ފަލާހު ވަނީ އެކަމާ ގުޅޭ އިތުރު ތަފުސީލުތައް ހިއްސާކުރައްވާފައެވެ.

 ފަލާހު އިތުރަށް ފާހަގަކުރެއްވި ގޮތުގައި، ރާއްޖޭގައި ގިނަ ސިޔާސީ ޕާޓީތަކެއް ރަޖިސްޓްރީކޮށްފައި އޮތް ނަމަވެސް، މި އިންތިޚާބުގައި އޭގެ ތެރެއިން ގިނަ ޕާޓީތަކަކުން ވާދަކޮށްފައެއް ނުވެއެވެ. މައިގަނޑު ގޮތެއްގައި ވާދަކުރަނީ ޕީއެންސީއާއި އެމްޑީޕީކަން ފާހަގަކުރައްވައި، އޭނާ ވިދާޅުވީ 'އަޑުގަދަކޮށް' އުޅޭ ބައެއް ޕާޓީތަކުން އެއްވެސް ކެންޑިޑޭޓަކު ކުރިމަތިލާފައި ނުވާ ކަމަށެވެ. އެހެންނަމަވެސް، މި އިންތިޚާބުގައި އަމިއްލަ ގޮތުން ވާދަކުރާ ކެންޑިޑޭޓުންގެ އަދަދު ގިނަކަން އޭނާ ފާހަގަކުރެއްވިއެވެ.