މަގާމުގެ ނުފޫޒު ބޭނުންކޮށްގެން ބިދޭސީ ބައެއްގެ އަތުން ފައިސާ ފޭރިގަނެ، ކޮރަޕްޝަންގެ އަމަލުތަކެއް ހިންގި ކަމަށް ބުނާ މައްސަލައެއްގައި ކުށަށް އިއުތިރާފުވި އިމިގްރޭޝަން އޮފިސަރަށް މިއަދު ކްރިމިނަލް ކޯޓުން ހުކުމްކޮށްފި އެވެ.

މި މައްސަލައަކީ، ކުރީގެ އިމިގްރޭޝަން ކޮންޓްރޯލަރު ޝަމްއާން ވަހީދު ހިމެނޭ ގޮތަށް އިމިގްރޭޝަންގެ ބައެއް މުވައްޒަފުން، ގަވާއިދާ ހިލާފު އޮޕަރޭޝަނެއްގައި ބިދޭސީ މަސައްކަތްތެރިންގެ އަތުން 530،000ރ. ނެގި މައްސަލައެކެވެ.

މި މައްސަލާގައި ދައުވާކުރި ފަސް މީހުންގެ ތެރެއިން ކުށަށް އިއުތިރާފުވީ މުހައްމަދު އަލްސަން އިސްމާއިލް އެވެ. އޭނާއާ އެކު ދައުލަތުން ވަނީ އިއުތިރާފުގެ އެއްބަސްވުމެއް އެކުލަވާލާފަ އެވެ.

ކްރިމިނަލް ކޯޓުން މިއަދު އިއްވި ހުކުމުގައި، އަލްސަންގެ އަސާސީ އަދަބަކީ 9 މަހާއި 18 ދުވަހުގެ ޖަލު ހުކުމެއް ނަމަވެސް، އިއުތިރާފު އެއްބަސްވުމުގެ ދަށުން ޖަލު އަދަބުގެ ގޮތުގައި ކަނޑައެޅީ 2 މަހާއި 3 ދުވަހެވެ. އަދި ބާކީ ހުކުމް 45،000ރ. ގެ ޖޫރިމަނާއަކަށް ބަދަލުކުރި އެވެ. އަލްސަން ބަންދުގައި ހޭދަކުރި މުއްދަތު ހުކުމުން އުނިކުރުމުން، އޭނާ ތަންފީޒުކުރަން ޖެހޭ އަދަބެއް ނެތެވެ.