މޯލްޑިވްސް އިމިގްރޭޝަންގެ ވަޒީފާއަށް އޮފިސަރުން ހޯދަން ބާއްވާ ވޯކް-އިން އިންޓަވިއު އަންނަ ހޮނިހިރު ދުވަހު ބާއްވަން ނިންމައިފިއެވެ.
އިމިގްރޭޝަނުން ބުނީ އެ އިދާރާގެ އޮފިސަރުންގެ ވަޒީފާއަށް 50 މީހުން ނެގުމަށް ނިންމާފައިވާ ކަމަށާއި، އިންޓަވިއު ކުރިއަށްދާނީ އަންނަ ހޮނިހިރު ދުވަހުގެ ހެނދުނު 9 އިން 5 އަށް ކަމަށެވެ.
އިންޓަވިއު ކުރިއަށްދާނީ ގަލޮޅު މަދަރުސާގައި ކަމަށް އިމިގްރޭޝަނުން ބުންޏެވެ.
ވަޒީފާއަށް ނެގުމުގައި ބަލާނެ ޝަރުތުތަކަކީ:
- ސާނަވީ ނުވަތަ ސެކަންޑަރީއާ އެއްވަރުގެ އިމްތިހާނުން ދެ މާއްދާއިން މަދުވެގެން "ޑީ" ގްރޭޑެއް ހާސިލްކޮށްފައިވުމާއެކު ސެކަންޑަރީ ނުވަތަ ހަޔާ ސެކަންޑަރީ ސްކޫލް ސެޓްފިކެޓްގައި މަދުވެގެން ދިވެހި ބަހުން "ސީ" ގްރޭޑެއް ހާސިލްކޮށްފައިވުން؛ ނުވަތަ އެމްއެންކިއުއެފް ލެވެލް 3 ސެޓްފިކެޓް ފުރިހަމަކޮށްފައިވުން.
- އިޢުލާނުކުރާ މުއްދަތު ހަމަވުމުގެ ކުރިން އުމުރުން 40 އަހަރުން ދަށުގެ މީހަކަށްވުން.
އިންޓަވިއުއަށް ގެންދަން ޖެހޭ ލިޔެކިޔުންތަކަކީ:
- ޖޮބް އެޕްލިކޭޝަން ފޯމް
- ތައުލީމީ ސެޓްފިކެޓްތަކުގެ އޮރިޖިނަލް އާއި ކޮޕީ
- ސީވީ
- އައިޑީ ކާޑުގެ ކޮޕީ
މިއީ އިމިގްރޭޝަނުން ބާއްވާ ފުރަތަމަ ވޯކް-އިން އިންޓަވިއުއެވެ. މީގެ ކުރިން އޮފިސަރުން ނަގަމުން އައީ އެޕްލިކޭޝަން ހުށަހެޅުމުން، އެ ރިވިއުކޮށް އިންޓަވިއުތައް ކުރަމުންނެވެ.
