އުރީދޫގެ ޗީފް ކޮމާޝަލް އޮފިސަރު ހުސެއިން ނިޔާޒް - -

ދިވެހިރާއްޖޭގައި ބޭނުންކުރެވޭ އެންމެހައި މޯބައިލް ނަންބަރުތަކަށް ޕޭޕަލްގެ ޚިދުމަތް ބޭނުންކުރެވޭނެ

އާއިޝަތު އަނާ ރަޝީދު
 
1 މަސް ކުރިން

އުރީދޫގެ އެމްފައިސާ މެދުވެރިކޮށް، ދިވެހިރާއްޖޭގައި ބޭނުންކުރެވޭ އެންމެހައި މޯބައިލް ނަންބަރުތަކަށް ޕޭޕަލްގެ ޚިދުމަތް ފޯރުކޮށްދެވޭނެ ކަމުގެ ޔަގީންކަން އުރީދޫގެ ޗީފް ކޮމާޝަލް އޮފިސަރު ހުސެއިން ނިޔާޒް ދެއްވައިފިއެވެ.

ކުރިއަށް އޮތް އަހަރު ރާއްޖެއަށް ޕޭޕަލްގެ ޚިދުމަތް ތަޢާރަފުކުރުމަށް ޕޭޕަލް އަދި އުރީދޫ މޯލްޑިވްސްއާ ދެމެދު ވެވޭ އެއްބަސްވުމެއްގެ ދަށުން މިހާރު ދަނީ އެކަމުގެ ރަސްމީ މަސައްކަތްތައް ކުރެވެމުންނެވެ.

މި ޚިދުމަތާ ގުޅޭގޮތުން ނިޔާޒް ހާމަކުރެއްވި ގޮތުގައި، އެމްފައިސާ ބޭނުންކުރާ ހުރިހާ ފަރާތްތަކަށް މި ޚިދުމަތް ލިބިގެންދާނެއެވެ. އެމްފައިސާއަކީ ހުރިހާ މުވާސަލާތީ ވިއުގައެއްގެ ބޭނުންކުރާ ފަރާތްތަކަށް ވެސް ބޭނުންކުރެވޭނެ ޑިޖިޓަލް ވޮލެޓަކަށްވާތީ، ކޮންމެ ޚިދުމަތް ފޯރުކޮށްދޭ ފަރާތެއްގެ ނަންބަރެއް ބޭނުންކުރި ކަމުގައިވިޔަސް، އެމްފައިސާ ވޮލެޓް ހަދައިގެން ޕޭޕަލްގެ ޚިދުމަތް ލިބިގަނެވޭނެއެވެ.

ރާއްޖެއަށް ޕޭޕަލްގެ ޚިދުމަތް ތަޢާރަފުކުރުމަށް އުރީދޫއިން ނިންމުމާ ގުޅިގެން، މި ޚިދުމަތަށް ބޭނުންވާ އިންވާޑް ރެމިޓެންސް ލައިސަންސް މޯލްޑިވްސް މަނިޓަރީ އޮތޯރިޓީ (އެމްއެމްއޭ) އިން ވޭތުވެދިޔަ ބުދަ ދުވަހު އުރީދޫއަށް ދޫކޮށްފައިވެއެވެ.

އުރީދޫއިން އިތުރަށް ހާމަކުރި ގޮތުގައި، އަންނަ އަހަރު ޕޭޕަލްގެ ޚިދުމަތް ރާއްޖެއަށް ތަޢާރަފުކުރުމާއެކު، ދުނިޔޭގެ އެކި ކަންކޮޅުތަކުގައި ޕޭޕަލް ޚިދުމަތް ޤަބޫލުކުރާ އެތައް ފަރާތްތަކަކާއެކު، ރާއްޖޭގައި ތިބެގެން ފައިސާގެ މުޢާމަލާތްތައް ކުރެވޭނެއެވެ. މީގެ އިތުރުން އުރީދޫގެ އެމްފައިސާ އެކައުންޓް މެދުވެރިކޮށް ޕޭޕަލްގެ ޚިދުމަތް ލިބެން ހުންނާނެ ކަމަށް އުރީދޫއިން ބުނެފައިވެއެވެ.