އަންނަ އަހަރު ދައުލަތުގެ މުވައްޒަފުންގެ މުސާރަ ބޮޑުކުރުމުގެ ސަބަބުން އިންފްލޭޝަން އިތުރުވެ، އެކަން ކޮންޓްރޯލް ނުކުރެވިއްޖެނަމަ ބޮޑުކުރެވޭ މުސާރައިގެ ފައިދާ ނުކުރާނެ ކަމަށް ރައްޔިތުންގެ މަޖިލީހުގެ ހިތަދޫމެދު ދާއިރާގެ މެންބަރު އަހުމަދު އަޒާން މަރްޒޫގު މިއަދު ވިދާޅުވެއްޖެއެވެ
އަންނަ އަހަރަށް ލަފާކުރާ ބަޖެޓާ ގުޅޭގޮތުން މަޖިލީހުގެ މިއަދުގެ ޖަލްސާގައި ކުރެވުނު ބަހުސްގައި ބައިވެރިވެވަޑައިގެން އަޒާން ވިދާޅުވީ، މުސާރަ އިތުރުކުރާއިރު އިންފްލޭޝަން މައްޗަށް ދާނެކަމަށްޓަކައި ސަރުކާރުން މިހާރުން ފެށިގެން ތައްޔާރުވުން މުހިންމު ކަމަށެވެ.
އަޒާން އިތުރަށް ވިދާޅުވީ، ދައުލަތުގެ މުވައްޒަފުންގެ އަދަދު އިތުރުވެ، މުސާރައަށް ކުރަންޖެހޭ ހަރަދު ކުޑަކުރުމަށް އާޓިފިޝަލް އިންޓެލިޖެންސް (އޭއައި) ފަދަ އީޖާދީ އުކުޅުތައް ބޭނުންކުރަން ޖެހޭނެ ކަމަށެވެ. އޭނާ ފާހަގަކުރެއްވި ގޮތުގައި، އެގޮތަށް އަމަލުކޮށްފިނަމަ ގިނަ އަދަދެއްގެ މުވައްޒަފުން ނުނަގައި ވެސް މަސައްކަތްތައް ކުރިއަށް ގެންދެވިދާނެއެވެ. އަންނަ އަހަރަކީ މުސާރަ ބޮޑުކުރާ އަހަރަކަށް ވާތީ، މުސާރަ ބޮޑުކުރާއިރު އިންފްލޭޝަން މަތިވުމަކީ ވާކަމެއް ކަމަށާއި، އެކަމުގެ ފުރުސަތު ބޮޑުވާނެ ކަމަށް ވިދާޅުވިއެވެ. އެހެންކަމުން، އިންފްލޭޝަން ބޮޑުވުމާ ދެކޮޅަށް ސަރުކާރުން މިހާރުން ފެށިގެން ދުރާލައި ފިޔަވަޅުތަކެއް އެޅުން މުހިންމު ކަމަށް އޭނާ ގޮވާލެއްވިއެވެ.
ދައުލަތުގެ ހަރަދު ބޮޑުކުރާ އެހެން ކަންތައްތަކުގެ ތެރޭގައި ހިމެނޭ، ހުރިހާ އެންމެނަށް ދެމުންދާ 'ބްލޭންކެޓް' ސަބްސިޑީތަކަށް އަލިއަޅުވާލައްވައި އަޒާން ވިދާޅުވީ، މިހާރު އޮތް ސަބްސިޑީ ނިޒާމު ބަދަލުކޮށް، ބޭނުންޖެހިފައިވާ ފަރާތްތަކަށް އަމާޒުކުރާ (ޓާގެޓެޑް) ސަބްސިޑީއަށް ބަދަލުކުރުމަށް ބައިނަލްއަގުވާމީ މާލީ އިދާރާތަކުން އަބަދުވެސް ލަފާދެމުން އަންނަ ކަމަށެވެ. ސިޔާސީ ގޮތުން މިކަން ކުރުމަކީ ފަސޭހަ ކަމަކަށް ނުވާނެކަން ގަބޫލުކުރައްވައި، އެހެން ނަމަވެސް މިހާރު މިދާ ގޮތަށް ކުރިއަށް ދިއުމަކީ ދެމެހެއްޓެނިވި ގޮތެއް ނޫން ކަމަށް އަޒާން ވިދާޅުވިއެވެ.
މޯލްޑިވްސް މަނިޓަރީ އޮތޯރިޓީ (އެމްއެމްއޭ) އިން ވަނީ ދައުލަތުގެ ބަޖެޓަށް ދެއްވި ލަފާގައި، އަންނަ އަހަރު ސަރުކާރުގެ ގިނަ މުވައްޒަފުންގެ މުސާރަ އެއްފަހަރާ ބޮޑުކުރުމުގެ ބަދަލުގައި، އެކަން ބަހާލައިގެން ކުރިއަށް ގެންދިއުމަށް އިރުޝާދު ދެއްވާފައެވެ. ރައްޔިތުންގެ މަޖިލީހުގެ ބަޖެޓް ދިރާސާކުރާ ކޮމިޓީގައި އެމްއެމްއޭގެ ގަވަރުނަރު އަހުމަދު މުނައްވަރު ވިދާޅުވީ، އަންނަ އަހަރު އެންމެ ބޮޑު ގޮންޖެހުމަކީ މުވައްޒަފުންގެ މުސާރަ ބޮޑުކުރުން ކަމަށެވެ. އެކަމަށްޓަކައި ސަރުކާރަށް ދެއްވާ ލަފައަކީ މުސާރަ ބޮޑުކުރުމުގެ ކަންކަން ބަހާލައިގެން ކުރިއަށް ގެންދިއުން ކަމަށެވެ.
ގަވަރުނަރު ވިދާޅުވި ގޮތުގައި، މުސާރަ ހަމަޖެއްސުމުގެ މަސައްކަތް (ޕޭ ހާމަނައިޒޭޝަން) ވަރަށް ކުރީއްސުރެ ކުރަމުން އަންނަނީ މި އަންނަ އަހަރު ނިންމުމަށްޓަކައެވެ. ނަމަވެސް، ބަޖެޓަށް ތިން ބިލިއަނާ ގާތްކުރާ އަދަދެއް އިތުރުވާނެ ކަމަށް ލަފާކުރެވޭއިރު، އެމްއެމްއޭގެ އެންމެ މުހިންމު ލަފައަކީ އެކަން ބަހާލައިގެން ކުރިއަށް ގެންދިއުމެވެ. އެއްފަހަރާ ހުރިހާ މުސާރައެއް ބޮޑުކޮށްފިނަމަ، އޭގެ ޕްރެޝަރު އިގްތިސާދަށް އައުމަކީ އެކަށީގެންވާ ކަމެއް ކަމަށް ގަވަރުނަރު ވިދާޅުވިއެވެ. އަދި އެ ބަދަލާއެކު، މިހާރު ފޮރިން އެކްސްޗޭންޖް މާކެޓުގައި އޮތް ޕްރެޝަރަށް އިތުރު ޕްރެޝަރެއް އައުމުގެ ފުރުސަތު އޮތް ކަމަށް ވެސް އޭނާ ފާހަގަކުރެއްވިއެވެ.
