އިޤްތިޞާދީ ދުވެލި އިތުރުކުރެއްވުމަށް ސަރުކާރުން ކުރައްވަމުންދާ މަސައްކަތްތަކުގެ ނަފާ ފެންނަން ފަށާފައިވާ ކަމަށާއި، ކުރިމަގުގައި މި ތަރައްޤީގެ ލާބަ ރައްޔިތުންނަށް ސީދާ ލިބިގެންދާނެކަމުގެ ޔަޤީންކަން ރައީސުލްޖުމްހޫރިއްޔާ ދެއްވައިފިއެވެ.
ރައީސް މިފަދައިން ވިދާޅުވެފައިވަނީ ށ. ކޮމަންޑޫގެ ރައްޔިތުންނާއެކު ބޭއްވެވި ބައްދަލުވުމެއްގައެވެ. މި ބައްދަލުވުމުގައި އިޤްތިޞާދު ނަގާލެއްވުމަށް އެކި ދާއިރާތަކުން ކުރެވެމުންދާ މަސައްކަތްތަކާ ބެހޭގޮތުން ވާހަކަފުޅު ދައްކަވާފައިވެއެވެ.
އެމަނިކުފާނުގެ ވާހަކަފުޅުގައި، މިލަދުންމަޑުލު އުތުރުބުރީގައި ފަތުރުވެރިކަން ކުރިއެރުވުމަށް އިންވެސްޓަރުންނަށް ފަހި ފުރުސަތުތަކެއް ހުޅުވާލެވިފައިވާ ކަމަށާއި، އެއަރޕޯޓްތައް ތަރައްޤީކުރެއްވުމަކީ އިންވެސްޓަރުންގެ އިތުބާރު އިތުރުވެގެންދާނެ ކަމެއްކަމުގައި ފާހަގަކުރައްވާފައިވެއެވެ.
ޓޫރިޒަމް ދާއިރާ ފުޅާވެގެން ދިއުމުން ޒުވާނުންނަށް އެމީހުންގެ ރަށާ ކައިރިން ވަޒީފާގެ ފުރުސަތުތައް ލިބިގެންދާނެކަމަށް ވިދާޅުވެފައިވެއެވެ. އަދި ށ. އަތޮޅުގައި މަސްވެރިކަން އަލުން ދިރުވުމަށް ކުރެވޭ މަސައްކަތުގެ ތެރެއިން، ކޮމަންޑޫގައި 30 ޓަނުގެ އައިސްޕްލާންޓެއް ޤާއިމްކުރުމުގެ އެއްބަސްވުމުގައި ސޮއިކުރެވިފައިވާކަން ފާހަގަކުރައްވާފައިވެއެވެ.
މި ހުރިހާ ފުރުސަތުތަކެއް ހުޅުވާލެވެނީ ދިވެހިންގެ އަތްމައްޗަށް އިޤްތިޞާދު ގެނެސް، އިޤްތިޞާދީ ފުދުންތެރިކަން އިތުރުކުރުމަށްކަމަށާއި، މިކަން ކުރިއަށްގެންދެވެނީ ރޭވުންތެރި، ހަރުދަނާ އުސޫލަކުން ކަމުގައިވެސް ރައީސުލްޖުމްހޫރިއްޔާ ވަނީ ވިދާޅުވެފައެވެ.
