މަސްވެރިކަމުގެ ދާއިރާއަށް ޒުވާނުން އަހުލުވެރި ކުރުމަށްޓަކައި، ޚާއްސަ ތަމްރީން ޕްރޮގްރާމެއް ފެށުމަށް ފިޝަރީޒް މިނިސްޓްރީން ނިންމައިފިއެވެ.
މި ޕްރޮގްރާމްގެ މައިގަނޑު މަޤްސަދަކީ މަސްވެރިކަމުގެ ދާއިރާއަށް އަލަށް ނުކުންނަން ބޭނުންވާ ޒުވާނުންނަށް ބޭނުންވާ ހުނަރުތައް ދަސްކޮށްދިނުމެވެ. މި ޕްރޮގްރާމްގެ ފުރަތަމަ ބުރުގައި ބައިވެރިވުމުގެ ފުރުސަތު ލިބޭނީ އެންމެ ފަސް ޒުވާނުންނަށެވެ.
މިއީ ވޯލްޑް ބޭންކުގެ އެހީތެރިކަމާއެކު ހިންގޭ "ޓްރާންސްފޯމިން ފިޝަރީޒް ސެކްޓާ" ޕްރޮޖެކްޓްގެ ދަށުން ކުރިއަށްގެންދެވޭ މަސައްކަތެކެވެ. މި ތަމްރީން ޕްރޮގްރާމް ފެށުމަށް ހަމަޖެހިފައިވަނީ ކުރިއަށް އޮތް މަހުން ފެށިގެން 2024 ވަނަ އަހަރުގެ ޖަނަވަރީ މަހުގެ ނިޔަލަށެވެ.
ބައިވެރިވެވޭނީ 24 އަހަރުން ދަށުގެ، މަސްވެރިކަމުގެ ދާއިރާއަށް ޝައުޤުވެރިކަން ހުރި، އަދި މިހާރު މަސްވެރިންގެ ދަފްތަރުގައި ނުހިމެނޭ ފަރާތްތަކަށެވެ.
ޕްރޮގްރާމްގެ ބައިވެރިންނަށް ދުވަހު އެލަވަންސެއް ލިބޭނެއެވެ. އަދި މަސްވެރިކަމުގެ ނަޒަރީ މަޢުލޫމާތުގެ އިތުރުން، ރާއްޖޭގެ އެންމެ ކުޅަދާނަ ކެޔޮޅުންގެ އަތްދަށުން ޢަމަލީ ތަޖުރިބާ ހޯދުމުގެ ފުރުސަތު ލިބޭނެއެވެ. ޚާއްސަކޮށް ކަޅުބިލަމަހުގެ ދޮށީގެ މަސްވެރިކަމުގައި ފާހަގަކޮށްލެވޭ އުޅަނދެއްގައި މަސައްކަތްކުރުމުގެ ފުރުސަތު ހުޅުވިގެންދާނެއެވެ.
ޕްރޮގްރާމްގައި ބައިވެރިވުމަށް އެދޭ ފަރާތްތަކުން، އެޕްލިކޭޝަން ފޯމާއެކު އައިޑީ ކާޑުގެ ކޮޕީ ހުށަހަޅަންވާނެއެވެ. 18 އަހަރުން ދަށުގެ ފަރާތެއްނަމަ، ބެލެނިވެރިޔާގެ ހުއްދައިގެ ލިޔުމެއްވެސް ހުށަހަޅަންޖެހޭނެއެވެ. ހުރިހާ ލިޔެކިޔުންތައް އަންނަ ބުރާސްފަތި ދުވަހުގެ ކުރިން ފިޝަރީޒް މިނިސްޓްރީއަށް އީމެއިލް މެދުވެރިކޮށް ފޮނުވަންވާނެއެވެ.
