މިފްކޯގެ ހިންގުން ހަރުދަނާކުރުމަށް ގެންނަ އިސްލާހުތަކުގެ ދަށުން، އެ ކުންފުނީގެ ބޯޑުގައި މަސްވެރިންގެ އަޑު އުފުލޭނެ މެންބަރަކު ހަމަޖައްސާނެ ކަމަށް ވިދާޅުވިތާ ގާތްގަނޑަކަށް ދެ އަހަރު ފަހުން، އެ މަޤާމަށް މީހަކު ހޮވައިފިއެވެ. 

މި މަޤާމަށް ހޮވިފައިވަނީ ގދ. ތިނަދޫ، ރިހިވެލި، ރީޝަމް މުހައްމަދު ޝަރީފެވެ.

މިފްކޯގެ ބޯޑުގައި މަސްވެރިން ތަމްސީލުކުރާނެ މެންބަރަކު ލުމަކީ ރައީސް މުހައްމަދު މުއިއްޒުގެ އިންތިޚާބީ ވައުދެކެވެ. އަދި މިއީ އެމަނިކުފާނުގެ ފުރަތަމަ 100 ދުވަހުގެ "ހަފުތާ14" މަގުޗާޓުގައި ހިމެނިފައިވާ ކަމެކެވެ. މި ވައުދު ފުއްދުމަށްޓަކައި، މިފްކޯ އަލުން އެކުލަވާލުމަށްފަހު، މިދިޔަ އަހަރުގެ ޖެނުއަރީގައި މި މަޤާމަށް ކުރިމަތިލުމުގެ ފުރުސަތު ހުޅުވާލިއެވެ.

މި މަޤާމަށް މީހަކު އައްޔަންކުރުން ލަސްވި ސަބަބާމެދު ސުވާލު އުފެދުނު ހިނދު، މިފްކޯއިން ބުނެފައިވަނީ ކުންފުނީގެ ހިންގާ ގަވާއިދަށް ބަދަލުތަކެއް ގެންނަން ޖެހުނު ކަމަށެވެ. އެހެންނަމަވެސް، މި މަޤާމަށް މީހަކު ހޮވުމުގައި ކެބިނެޓުން ކަނޑައެޅި އުސޫލުތަކާ އެއްގޮތަށް ކަންކުރެވިފައިވޭތޯ ސުވާލު އުފެދިފައިވެއެވެ. މިކަމާ ގުޅޭގޮތުން މިފްކޯގެ ސީނިއަރ ޕީއާރު މެނޭޖަރު ވިދާޅުވެފައިވަނީ މިއީ މިނިސްޓްރީން ކުރިއަށް ގެންދިޔަ މަސައްކަތެއް ކަމަށެވެ.