މީޑިއާ ރެގިއުލޭޓަރީ ބިލާ ދެކޮޅަށް ނޫސްވެރިން އިހުތިޖާޖު ކުރަމުންދާ ދަނޑިވަޅެއްގައި އެކްސްގައި ހިއްސާކުރެއްވި ޕޯސްޓެއްގައި މަތީން ވިދާޅުވެފައިވަނީ، ރާއްޖޭގެ ނަން މަޝްހޫރު ބޮޑެތި މީޑިއާތަކުގެ ވެރިންނަކީ ސިޔާސީ ޕާޓީތަކުގެ އެންމެ އިސްވެރިން ނުވަތަ އިސް ސަފުގައި ހަރަކާތްތެރިވާ ފަރާތްތައް ކަމަށެވެ.
މަތީން ފާހަގަކުރެއްވި ގޮތުގައި މީޑިއާތައް ހިންގަވާ ފަރާތްތަކުގެ ތެރޭގައި ރިޔާސީ ކެންޑިޑޭޓުންނާއި، މަޖިލިސް މެންބަރުންނާއި، ވަޒީރުންނާއި، އެކި ސަރުކާރުތައް ހިންގުމުގައި އެންމެ އިސްކޮށް ތިއްބަވާ ބޭފުޅުންނާއި، ވިޔަފާރިވެރިން ހިމެނެއެވެ. އަދި މީޑިއާތަކުގައި މަސައްކަތްކުރައްވާ ގިނަ ބޭފުޅުންނަކީވެސް ސިޔާސީ ފަރާތްތަކުގެ މުވައްޒަފުން ކަމަށް އޭނާ ވިދާޅުވިއެވެ.
"މީޑިއާގެ މިނިވަންކަން ބިނާވެފައިވަނީ މި ހަގީގަތުގެ މައްޗަށް. މީޑިއާތަކުން ރައްޔިތުންނާ ހަމައަށް ފޯރުކޮށްދޭ މައުލޫމާތުގެ ސިފަތައް ގުޅިފައި އޮންނާނީވެސް މި ހަގީގަތާ ކަމާމެދު ޝައްކުކުރާނެ ޖާގައެއް ނެތް," މަތީން ވިދާޅުވިއެވެ.
މި ހަގީގަތުގެ އަލީގައި، މަޠީން ވަނީ ޒިންމާދާރުކަމާއެކު މަސައްކަތްކުރުމުގެ މުހިންމުކަން ފާހަގަކުރައްވާފައެވެ. އެގޮތުން އެކަކު އަނެކަކަށް އިހްތިރާމްކުރުމާއި، ހަގީގަތް އޮޅުވާނުލުމާއި، އެހެން މީހުންގެ އަބުރު ރައްކާތެރިކުރުމުގެ މުހިންމުކަން ފާހަގަކުރެއްވިއެވެ.
އަދި އެންމެ ފަހުން މަތީން ވަނީ، އެމީހެއްގެ އަމަލުތަކާއި ބަހުރުވައާމެދު ކޮމިޝަނަކަށް ޖަވާބުދާރީވުމަށް ދެކޮޅުހެދިކަމުގައިވިޔަސް، މާތްﷲ ގެ ހަޟްރަތުގައި ޖަވާބުދާރީ ވާންޖެހޭނެކަން ހަނދާން ބަހައްޓަން ޖެހޭނެކަމަށް އިންޒާރުދެއްވާފައެވެ.
މީޑިއާގެ މިނިވަންކަން ދެމެހެއްޓުމާއެކު، އެ މިނިވަންކަން ޒިންމާދާރު ގޮތެއްގައި ބޭނުންކުރުމުގެ މުހިންމުކަމެވެ. އަދި މީޑިއާތަކުގެ މިލްކުވެރިކަމާއި ހިންގުމުގެ ސިފަތަކަށް ރައްޔިތުން ސަމާލުވެ، މީޑިއާއިން ލިބޭ މައުލޫމާތުތައް ދޭހަކުރުމުގައި މި ކަންކަމަށް ރިއާޔަތްކުރުން މުހިންމުއެވެ.
