އިސްލާމިކް މިނިސްޓްރީގެ ކުރީގެ ޕާމަނަންޓް ސެކެޓްރީ ވަޒީފާއިން ވަކިކުރީ ގާނޫނާ ހިލާފަށް ކަމަށް ސުޕްރީމް ކޯޓުން ކަނޑައަޅާފައިވާ މައްސަލައިގައި ގެއްލުމުގެ ބަދަލުގެ ގޮތުގައި 1.1 މިލިއަން ރުފިޔާ އޭނާއަށް ދިނުމަށް ދައުލަތުގެ މައްޗަށް ސިވިލް ކޯޓުން މިއަދު ހުކުމްކޮށްފި އެވެ.
2019 ވަނަ އަހަރު ސިވިލް ސާވިސް ކޮމިޝަނުން މުސްއަބު ވަޒީފާއިން ވަކިކުރި މައްސަލައާ ގުޅިގެން ކޯޓުތަކުގައި ދިގު މުއްދަތެއް ހިނގައިފައިވާ މި މައްސަލައިގައި، ސުޕްރީމް ކޯޓުން ވަނީ އޭނާ ވަޒީފާއިން ވަކިކުރީ ގާނޫނާ ހިލާފަށް ކަމަށް ކަނޑައަޅާފައެވެ. ނަމަވެސް ގެއްލުމުގެ ބަދަލު ކަނޑައެޅުމަށް ސުޕްރީމް ކޯޓުން ވަނީ ސިވިލް ކޯޓަށް ފޮނުވާފައެވެ.
ހައިކޯޓުން ކުރިން މި މައްސަލައިގައި 1.1 މިލިއަން ރުފިޔާ ބަދަލުގެ ގޮތުގައި ދޭންޖެހޭނެ ކަމަށް ހުކުމްކޮށްފައި ވީނަމަވެސް، ސިވިލް ސާވިސް ކޮމިޝަނުން އެ ހުކުމް އިސްތިއުނާފު ކުރުމުން ސުޕްރީމް ކޯޓުން ވަނީ ބަދަލުގެ މިންވަރު ކަނޑައެޅުމުގެ ބައި ބާތިލުކޮށް، އަލުން ސިވިލް ކޯޓުގައި ބަދަލުގެ މައްސަލަ ހުށަހެޅުމަށް އިރުޝާދު ދީފައެވެ.
މިއަދު ސިވިލް ކޯޓުން ނިންމި ގޮތުގައި، މުސްއަބު ވަޒީފާއިން ގޯސްކޮށް ވަކިކުރުމުގެ ސަބަބުން އޭނާގެ އެއްބަސްވުމުގައި ބާކީ އޮތް 2 އަހަރާއި 10 މަސް އަދި 15 ދުވަހުގެ މުސާރައާ އެއްވަރުގެ ފައިސާއެއް ބަދަލުގެ ގޮތުގައި ދޭންޖެހޭނެ ކަމަށް ކަނޑައަޅާފައިވެއެވެ. މި ފައިސާ އަދާކުރުމަށް ސިވިލް ސާވިސް ކޮމިޝަނަށް ދީފައިވަނީ އެއް މަހުގެ މުއްދަތެކެވެ.
