މޯލްޑިވްސް ބޮޑީބޯޑިންގ އެސޯސިއޭޝަން (އެމްބީބީއޭ) އިން އިންތިޒާމްކޮށްގެން ބާއްވާ ޤައުމީ ބޮޑީބޯޑިންގ ލީގުގެ ދެވަނަ މުބާރާތް ކަމަށްވާ، "ލަބެރަ ބޮޑީބޯޑިންގ ޗެލެންޖް 2025" މިއަދު ފަށައިފި އެވެ.

މި މަހުގެ 5 އިން 8 ގެ ނިޔަލަށް މާލޭ ވަރުނުލާ ރާޅުގަނޑު ސަރަހައްދުގައި ކުރިއަށްދާ މުބާރާތުގައި ހުރިހާ އިވެންޓަކުން މުޅިއެކު 20 އެތުލީޓުން ވާދަކުރާނެ އެވެ.

އޭގެތެރެއިން، މެންސް އޯޕަން ކެޓަގަރީގައި 19 ބައިވެރިން، ޖޫނިއާ މެންސް ބައިގައި ނުވައެއް އަދި ޑްރޮޕްނީ އިވެންޓްގައި ހަތް އެތުލީޓުން ވަނީ ބައިވެރިވެފައެވެ.

މި ފަހަރުގެ މުބާރާތުގައި މާލެ ސިޓީ އަށް ނިސްބަތްވާ، 9 އެތުލީޓުންނާއި، ލ. ގަމުން ދެ އެތުލީޓުން، ނ. ޅޮހިން ތިން އެތުލީޓުން، ށ. ކަނޑިތީމުން ދެ އެތުލީޓުން، ފުވައްމުލަކު ސިޓީ އާއި، ނ. މާފަރާއި މ. ވޭވަށް އަދި ކ. ދިއްފުށިން އެތުލީޓެއް ވާދަކުރާނެ އެވެ.