ފަސްޓް ބްލޭޑަރސްއިން އިންޑިއާގެ ޕޫނޭގައި ބޭއްވި އެންޑިއުރެންސް ވޯލްޑް ޗެމްޕިއަންޝިޕްގައި ރާއްޖޭގެ ސްކޭޓިންގ ތާރީޚުގައި ފާހަގަކޮށްލެވޭ ކާމިޔާބީއެއް ހޯދައިފިއެވެ.
ރާއްޖޭގެ ސްކޭޓިންގ ކުރިއެރުވުމަށް މަސައްކަތްކުރާ މި ޖަމްޢިއްޔާގެ ކުޅުންތެރިން ވަނީ ޖުމްލަ 16 މެޑަލް ރާއްޖެއަށް ހޯދައިދީފައެވެ. މިއީ ރާއްޖޭގެ ސްކޭޓިންގ ދާއިރާއަށް ލިބުނު ވަރަށް ބޮޑު ކުރިއެރުމެކެވެ.
މި މުބާރާތުން ފަސްޓް ބްލޭޑަރސްގެ ކުޅުންތެރިން ވަނީ 4 ރަން މެޑަލާއި، 4 ރިހި މެޑަލް އަދި 8 ނިލަން މެޑަލް ހޯދާފައެވެ. އިންޑިއާގެ ޕޫނޭގައި ބޭއްވުނު މި މުބާރާތުގައި ފަސްޓް ބްލޭޑަރސްގެ ފަރާތުން ޖުމްލަ 14 ދަރިވަރުން ވާދަކުރިއިރު، މިއީ ރާއްޖޭގެ އެކި ކަންކޮޅުތަކުގައި ސްކޭޓިންގ ކުޅުން ކުރިއެރުވުމަށް މަސައްކަތްކުރާ ޖަމްޢިއްޔާއެއްގެ ގޮތުގައި ފާހަގަކޮށްލެވޭ ފަސްޓް ބްލޭޑަރސްއަށް ލިބުނު ފަޚުރެކެވެ.
މި ކާމިޔާބީތަކާ ގުޅިގެން ޓީމްގެ ކޯޗް މުހައްމަދު ރިލްވާން ވިދާޅުވީ، ސްކޭޓަރުންނަކީ ކުޅިވަރަށް ކިތަންމެ އައު ކުދިންތަކަކަށް ވިނަމަވެސް، އުއްމީދު ކުރިވަރަށްވުރެ މާ ބޮޑެތި ކާމިޔާބުތަކެއް ހޯދާފައިވާކަމަށެވެ. "މިއީ ރާއްޖޭގައި ސްކޭޓިންގ ކުރިއެރުވުމަށް ކުރެވޭ މުހިންމު މަސައްކަތެއް. 2013 ވަނަ އަހަރު ވެސް މި މުބާރާތުގައި ވާދަކުރި ނަމަވެސް، މިފަހަރު ދެގުނަ އިތުރު ކުދިން ބައިވެރިވުމަކީ އަޅުގަނޑުމެންނަށް ލިބުނު ހިތްވަރެއް،" ކޯޗް ރިލްވާން ވިދާޅުވިއެވެ.
މެޑަލް ހޯދި ކުޅުންތެރިންގެ ތަފްސީލު:
މި މުބާރާތުގައި މެޑަލް ހޯދި ކުޅުންތެރިންގެ ތަފްސީލު ތިރީގައި މިވަނީއެވެ:
- ވަދޫދު (Wadud): 2 ބްރޮންޒް މެޑަލް (U5)
- މަރިޔަމް ޔަނާލް ފަޒީން (Mariyam Yanaal Fazeen): 2 ރަން މެޑަލް (U6)
- މަރިޔަމް ޔާނާ އިމާދު (Maryam Yaana Imad): 2 ރިހި މެޑަލް (U6)
- ރިކްޒާ (Rikza): 2 ރަން މެޑަލް، 2 ބްރޮންޒް މެޑަލް (U8)
- މުހައްމަދު ނައުލް (Mohamed Naul): 2 ރިހި މެޑަލް، 1 ބްރޮންޒް މެޑަލް (U7)
- ފާތިމަތު އުލްޔާ (Fathimath Ulyaa): 2 ނިލަން މެޑަލް (U8)
- ޔޫސުފް އިޒްޔާން އަނަސް ވަހީދު (Yoosuf Izyan Anas Waheed): 1 ބްރޮންޒް މެޑަލް (U10)
މި ޓީމަށް ހޮވުނު 14 ދަރިވަރުންގެ ތެރެއިން 12 ދަރިވަރުންނަކީ އައްޑޫ ސިޓީ ކައުންސިލާއި ފަސްޓް ބްލޭޑަރސް ގުޅިގެން ނޮވެމްބަރު 1 އިން 15 އަށް ބޭއްވި ސްކޭޓް ކޭމްޕްގައި ބައިވެރިވި ކުދިންނެވެ. 15 ދުވަހުގެ މުއްދަތަށް ކުރިއަށްދިޔަ މި ކޭމްޕްގައި 3 އަހަރާއި 15 އަހަރާ ދެމެދުގެ ޖުމްލަ 51 ކުދިން ބައިވެރިވިއެވެ. މި ކޭމްޕްގެ ތެރެއިން ޚާއްސަ ހުނަރުތައް ދައްކުވައިދިން 12 ކުދިން ވަނީ ވޯލްޑް ޗެމްޕިއަންޝިޕްގައި ރާއްޖެ ތަމްސީލުކުރުމަށް ހޮވާފައެވެ.
ކޯޗް ރިލްވާން ވަނީ މި ޓީމަށް އައްޑޫ ސިޓީ ކައުންސިލުން ދެއްވި އެހީތެރިކަން ފާހަގަކޮށް ޝުކުރު އަދާކުރައްވާފައެވެ. ކައުންސިލުން ވަނީ ކޮންމެ ކުއްޖަކަށް ޓިކެޓް އެލަވެންސްގެ ގޮތުގައި 4000 ރުފިޔާ ދީފައެވެ. އަދި ޓީމަކީ ކުޑަ ކުދިން ހިމެނޭ ޓީމަކަށްވުމާއެކު، ބެލެނިވެރިންގެ ފަރާތުން ލިބުނު ފުރިހަމަ އެއްބާރުލުމަށް ވެސް ކޯޗް ވަނީ ޚާއްސަ ޝުކުރެއް އަދާކުރައްވާފައެވެ.
އިންޑިއާގެ އެންޑިއުރެންސް ފެޑެރޭޝަން އޮފް އިންޑިއާއިން އިންތިޒާމުކުރި މި ތިން ދުވަހުގެ މުބާރާތުގައި ރާއްޖެ ހިމެނޭ ގޮތަށް 9 ގައުމެއްގެ 398 އެތްލީޓުން ވާދަކުރިއިރު، މުބާރާތުގެ ޗެމްޕިއަންކަން ހޯދާފައިވަނީ އިންޑިއާއިންނެވެ.
