އެޓްލާންޓިކް ކަނޑުގައި ދަތުރުކުރަމުންދާ ކްރޫޒް ޝިޕެއް ކަމަށްވާ އެމްވީ ހޮންޑިއަސްގައި ނުރައްކާތެރި ހަންޓާވައިރަސް ފެތުރި، އަށް މީހަކަށް ބަލިޖެހި ތިން މީހަކު މަރުވުމާ ގުޅިގެން މިއީ އާލަމީ ބަލިމަޑުކަމަކަށް ވެދާނެތީ ކަންބޮޑުވުން އުފެދިއްޖެއެވެ.
މީދަލުގެ ޒަރީއާއިން ފެތުރޭ މި ވައިރަހުގެ ސަބަބުން ކޮވިޑް-19 ފަދަ ހާލަތެއް ކުރިމަތިވެދާނެތޯ ބައެއް ފަރާތްތަކުން ސުވާލު އުފައްދަމުންދާއިރު، ސިއްހީ މާހިރުން ދަނީ މިކަން ކޮންޓްރޯލް ކުރުމަށް މަސައްކަތް ކުރަމުންނެވެ.
މި ބަލިމަޑުކަން ފެށިފައިވަނީ އޭޕްރީލް މަހުގެ ކުރީކޮޅު އެމްވީ ހޮންޑިއަސް އިންނެވެ. ނަމަވެސް، ސިއްހީ މާހިރުން ވިދާޅުވާ ގޮތުގައި މިއީ ކޮވިޑް-19 އާ އެއްގޮތް ހާލަތެއް ނޫނެވެ. ދުނިޔޭގެ ސިއްހަތު ޖަމިއްޔާ (ޑަބްލިއުއެޗްއޯ) ގެ ވެރިޔާ ޑރ. ޓެޑްރޯސް އަދަނޮމް ގެބްރިއޭސަސް ވިދާޅުވީ، "މިއީ ސީރިއަސް ހާދިސާއެއް ނަމަވެސް، އާންމު ސިއްހަތަށް އޮތް ނުރައްކާ ކުޑަ" ކަމަށެވެ.
ކޭޕް ވާޑޭ ކައިރީގައި ބޯޓު ތާށިވެފައި އޮތުމަށްފަހު، ސްޕެއިން ސަރުކާރުން ވަނީ މި ބޯޓު ބަނދަރުކުރުމުގެ ހުއްދަ ދީފައެވެ. މިހާރު މި ބޯޓު ދަތުރުކުރަމުންދަނީ ކެނެރީ އައިލެންޑްސް އަށެވެ. ބޯޓުގައި ތިބި އެމެރިކާގެ ރައްޔިތުންނާ އެމެރިކާގެ ސީޑީސީގެ ޓީމަކުން ބައްދަލުކޮށް، ނެބްރަސްކާގެ ނޭޝަނަލް ކުއަރަންޓީން ޔުނިޓަށް ގެންދިއުމަށް ވަނީ ހަމަޖެހިފައެވެ.
މި ބަލިމަޑުކަމާ ގުޅޭގޮތުން ޑަބްލިއުއެޗްއޯ އިން ބުނީ ބޯޓުގައި ތިބި 150 އެއްހާ މީހުންގެ ތެރެއިން އަށް މީހަކަށް ބަލިޖެހިފައިވާ ކަމަށް ޝައްކުކުރެވޭ ނުވަތަ ކަށަވަރުވެފައިވާ ކަމަށެވެ. ބަލިޖެހުނު މީހުންގެ ތެރެއިން ބައެއް މީހުން ނެދަލޭންޑްސް އަދި ދެކުނު އެފްރިކާއަށް ބަދަލުކޮށް ފަރުވާ ދެމުންދާއިރު، އެކަކުގެ ހާލު ވަރަށް ސީރިއަސް ކަމަށް މައުލޫމާތު ލިބެއެވެ.
ހަންޓާވައިރަސް އަކީ ޖަނަވާރުންގެ ފަރާތުން އިންސާނުންނަށް ފެތުރޭ، ނުރައްކާތެރި ބައްޔެއް ކުރިމަތިކުރުވާ ވައިރަހެކެވެ. މިއީ އާ ވައިރަހެއް ނޫން ނަމަވެސް، މީގެ ބަލިމަޑުކަމެއް ފެނުމަކީ ވަރަށް މަދުން ނޫނީ ނުވާ ކަމެކެވެ. ކްލީވްލޭންޑް ކްލިނިކްގެ ޑރ. ކާލާ މެކްވިލިއަމްސް ވިދާޅުވި ގޮތުގައި މިފަހަރު ފެނިގެން މިއުޅެނީ މި ވައިރަހުގެ ވަރަށް ނާދިރު ސްޓްރެއިން އެކެވެ.
އާޖެންޓީނާގެ އުޝުއާޔާ އިން އޭޕްރީލް 1 ގައި ފުރި މި ބޯޓު އެންޓާކްޓިކާ އަދި އެޓްލާންޓިކްގެ ބައެއް ރަށްތަކަށް މަޑުކޮށްފައިވެއެވެ. ބަލި ފެތުރެން ފެށީ އޭޕްރީލް މަހުގެ މެދުތެރޭގައި ސެއިންޓް ހެލީނާ ރަށާ ކައިރީގައި ބޯޓު އޮއްވައެވެ. މިހާރު ކަމާބެހޭ ފަރާތްތަކުން ދަނީ މި ނާދިރު ވައިރަސް ބޯޓަށް ވަދެ ފެތުރުނު ގޮތް ތަހުގީގު ކުރަމުންނެވެ.
