އައްޑޫ ސިޓީއަށް ދަތުރުކުރާ ފްލައިޓުތަކުގެ އަދަދު އިތުރުނުކުރާތީ އައްޑޫ މީދޫ ދާއިރާގެ މެންބަރު އަބްދުއްރަހްމާން ކަންބޮޑުވުން ފާޅުކުރައްވައިފިއެވެ.

ސޯޝަލް މީޑިއާގައި ކުރެއްވި ޕޯސްޓެއްގައި އަބްދުއްރަހްމާން ވިދާޅުވީ، މޯލްޑިވިއަންގެ ފްލައިޓުތަކުން އައްޑޫއާއި މާލެއާ ދެމެދު ދަތުރުކުރުމަށް ފަހަކަށް އައިސް ޖާގަ ލިބުން ވަރަށް ބޮޑަށް ދަތިވެފައިވާ ކަމަށެވެ. އަދި ޑިމާންޑާ އެއްވަރަށް ފްލައިޓުތައް އިތުރުނުކުރެވޭނަމަ، އެހެން އެއާލައިންތަކަށް އެ ފުރުސަތު ދޭންޖެހޭނެ ކަމަށް އޭނާ ވިދާޅުވިއެވެ.

މެންބަރު ފާހަގަކުރެއްވި ގޮތުގައި، ރަމަޟާން މަހުގެ ފަހު ދިހައާއި އީދު ބަންދަށް ރަށަށް ދާން ބޭނުންވާ ފަރާތްތަކަށާއި، ބަންދު ނިންމާލުމަށްފަހު އެނބުރި ދާން ތިބި މީހުންނަށް ޖާގަ ނުލިބުމުގެ ސަބަބުން ބޮޑެތި ތަކުލީފުތަކެއް ވަނީ ކުރިމަތިވެފައެވެ. މީގެ އިތުރުން، ސަރުކާރުގެ ބޭފުޅުންގެ ކެމްޕޭން ދަތުރުތަކަށް ފްލައިޓްތަކުގެ ޝެޑިއުލް ބަދަލުކުރާ ކަމަށާއި، އޭގެ ސަބަބުން ކަނެކްޓިން ފްލައިޓްތަކަށް އަރަން ތިބޭ ފަރާތްތަކަށް ބޮޑެތި ގެއްލުންތަކެއް ލިބެމުންދާ ކަމަށް އޭނާ ތުހުމަތުކުރެއްވިއެވެ.

އަބްދުއްރަހްމާން އިތުރަށް ވިދާޅުވީ، ކޮންމެ އިންތިޚާބަކާ ދިމާކޮށް އައްޑޫގެ ތަރައްގީއަށް ބޮޑެތި ވައުދުތަކެއް ވެފައިވީ ނަމަވެސް، އަމަލީ ގޮތުން ފެންނަ ކުރިއެރުމެއް ނެތް ކަމަށެވެ. އައްޑޫއަށް ބޭނުންވަނީ ހަމައެކަނި މަގުހެދުމާއި ކަރަންޓުގެ ޚިދުމަތް ނޫން ކަމަށާއި، މަސް ފެކްޓަރީއާއި، ބްރިޖާއި، ފެންވަރު ރަނގަޅު ބޭސްފަރުވާގެ އިތުރުން ވަޒީފާގެ ފުރުސަތުތައް ވެސް އައްޑޫ ރައްޔިތުން ބޭނުންވާ ކަމަށް އޭނާ ވިދާޅުވިއެވެ.

މިހާރު އައްޑޫއާއި މާލެއާ ދެމެދު ދުވާލަކު ތިނެއް ނުވަތަ ހަތަރު ފްލައިޓް ދަތުރުކުރާއިރު، ޓިކެޓެއްގެ އަގު އުޅެނީ 1،222 ރުފިޔާއަށެވެ. ނަމަވެސް، މެންބަރު ވިދާޅުވާ ގޮތުގައި މި އަދަދަކީ މިހާރު އޮތް ޑިމާންޑާ ބަލާއިރު އެކަށީގެންވާ މިންވަރެއް ނޫނެވެ.