އާންމުންގެ ޙައްޤުތައް ހޯދައިދިނުމަށް ވަކާލާތުކުރާ، ޓިކްޓޮކުން މަޝްހޫރުވި ޝެހެނާޒް މޫސާ (ޝެހޭ)، ފަހި ދިރިއުޅުން ކޯޕަރޭޝަން (އެފްޑީސީ) ގެ ފްލެޓެއް އުސޫލާ ޚިލާފަށް ކުއްޔަށް ދޭން އުޅުނު މައްސަލައެއް ފެންމަތިވެ، އެ ކޯޕަރޭޝަނުން އެކަން ބަލަން ފަށައިފިއެވެ.

މިކަމާ ގުޅޭގޮތުން އެފްޑީސީގެ މެނޭޖިންގ ޑިރެކްޓަރު ހަމްދާން ޝަކީލް 'އެކްސް' ގައި ކުރެއްވި ޕޯސްޓެއްގައި ވިދާޅުވީ، އުސޫލުތަކާ ޚިލާފަށް ފްލެޓެއް ކުއްޔަށް ދޭން އުޅޭ މައްސަލައެއް އެ ކުންފުނީގެ ސަމާލުކަމަށް އައިސްފައިވާ ކަމަށާއި، ކުންފުނީގެ ޚާއްޞަ ޓީމަކުން މިހާރު އެ މައްސަލަ ތަޙުޤީޤު ކުރަމުންދާ ކަމަށެވެ.

ހަމްދާން އިތުރަށް ބަޔާންކުރެއްވި ގޮތުގައި، ސޯޝަލް ހައުސިންގ ޔުނިޓްތަކުގެ އެއްބަސްވުމުގައިވާ ގޮތުން، މިފަދަ އަމަލުތަކަކީ އުސޫލާ މުޅިން ޚިލާފު ކަންކަމެވެ. މިފަދަ ކަމެއް ސާބިތުވެއްޖެނަމަ، 50,000 ރުފިޔާއަށްވުރެ ބޮޑު ނޫން އަދަދަކުން ޖޫރިމަނާކުރުމުގެ އިތުރުން، އެ ފަރާތަކާއެކު ވެފައިވާ އެއްބަސްވުން ބާތިލުކުރުމުގެ އިޚުތިޔާރުވެސް ކުންފުންޏަށް ލިބިގެންވެއެވެ.

ޝެހޭ ސޯޝަލް މީޑިއާގައި އިޝްތިހާރުކޮށްފައިވަނީ 'އަމާން ދޯދީ' ޓަވަރުގެ އެޕާޓްމަންޓެކެވެ. ސަރުކާރާއި އެފްޑީސީން ކުރިންވެސް އަންގާފައިވާ ގޮތުގައި، މި އެޕާޓްމަންޓްތަކަކީ އެހެން ފަރާތްތަކަށް ކުއްޔަށް ދިނުން މަނާ ތަންތަނެވެ. ޝެހޭ ކޮށްފައިވާ ޕޯސްޓުގައި ގުޅަންވީ ނަންބަރެއްގެ ގޮތުގައި ދީފައިވަނީ އޭނާގެ އެކުވެރިޔާ، މަޝްހޫރު ޓިކްޓޮކް ތަރި މަރިޔަމް ރުހުޝާ (ރޭޑިއޯ) ގެ ނަންބަރެވެ.

ޝެހޭގެ އިޝްތިހާރުގައިވާ ގޮތުން، ފަރުނީޗަރާ ނުލައި 3 ކޮޓަރީގެ މި އެޕާޓްމަންޓް ކުއްޔަށް ދޭން ހުށަހަޅާފައިވަނީ މަހަކު 23,000 ރުފިޔާއަށެވެ. އަދި އެޑްވާންސްގެ ގޮތުގައިވެސް 23,000 ރުފިޔާ ދައްކަންޖެހެއެވެ. ފާހަގަކޮށްލެވޭ ގޮތުގައި، އެފްޑީސީން އެ ތަނުގެ އަސްލު ވެރިފަރާތަށް އެޕާޓްމަންޓް ކުއްޔަށް ދީފައިވަނީ މަހަކު 10,500 ރުފިޔާއަށެވެ.

މިނޫނަސް، 4,000 ހައުސިންގ ޔުނިޓްގެ ތެރޭގައި ހިމެނޭ އެޕާޓްމަންޓެއް ބޮޑު އަގުގައި ކުއްޔަށް ދޭން އުޅުނު އެހެން މައްސަލައެއްވެސް އެފްޑީސީން މީގެ ކުރިން ބަލަން ފަށާފައިވާކަން ފާހަގަކުރެވެއެވެ.