ކުރިއަށް އޮތް ކައުންސިލު އިންތިހާބުގައި އިދިކޮޅު އެމްޑީޕީގެ ކެންޑިޑޭޓުންނަށް ޖާގަ ދިން ނަމަވެސް ތަރައްގީއަށް ހުރަސް ނޭޅޭނެކަމަށް ބުނެ އިދިކޮޅު ފަރާތްތަކުން ދައްކަމުން އަންނަ ވާހަކަތަކަށް ނާއިބު ރައީސް އަލްއުސްތާޒު ހުސައިން މުހައްމަދު ލަތީފު ރައްދު ދެއްވައިފި އެވެ.
ކޮންގްރެސް ޕާޓީގެ ހދ. އަތޮޅު މާލޭ ޖަގަހަ ހުޅުވުމަށް މިރޭ ބޭއްވި ހަފްލާގައި ވާހަކަފުޅުދައްކަވަމުން ނާއިބު ރައީސް ވިދާޅުވީ ރަށްރަށުގައި އޮންނަ ކައުންސިލުތައް ވެގެންދާންޖެހޭނީ އޭރަކު އޮންނަ ސަރުކާރަކާ ގުޅިގެން މަސައްކަތް ކުރަން ދަންނަ ބަޔަކަށް ކަމަށެވެ.
ވާދަވެރިން މިއަދު އުފައްދާ ސުވާލަކީ އެމީހުންނަށް ކައުންސިލު ގޮނޑިތައް ލިބުނުނަމަވެސް ސަރުކާރުގެ ތަރައްގީއަށް ހުރަސް ނޭޅޭނެ ކަމުގެ ވާހަކަތައް ކަމަށް ވިދާޅުވެ، ނާއިބު ރައީސް ވަނީ މިހާރު ސަރުކާރަށް އެއްބާރުލުން ދެންތޯ އިދިކޮޅު ފަރާތްތަކާ ސުވާލު ކުރައްވާފަ އެވެ.
"ވާދަވެރިން އެބަ ބުނޭ މިހާތަނަށް ވެސް ކޮބާހޭ ކުރި އުނދަގުލަކީ؟. ނުނީ މާދާމާ ތިމަންނާމެން އިންތިހާބު ކޮށްގެން ކޮބާހޭ ކުރާނެ އުނދަގުލަކީ؟. ދަންނަވާލަން ބޭނުންވަނީ މިއަދު އެބޭފުޅުން ޕޯޑިއަމްތަކުގައި އެވާހަކަ ދައްކަނީ ސަރުކާރަށް އެއްބާރުލުން ދީގެންތޯ؟ ސަރުކާރުގެ ސިޔާސަތުތަކަށް ތާއީދުކޮށްގެންތޯ؟. ނުވަތަ ރައީސް ނިންމަވާ ނިންމެވުންތަކަށް ފުރިހަމައަށް ތާއީދުކޮށްގެން ސަރުކާރަށް އެއްބާރުލުން ދޭން ރައްޔިތުންނަށް ހެޔޮ ވިސްނުން އިސްކުރުމަށް ބާރު އަޅަމުންތޯއޭ މިއަދު ކެމްޕެއިން ކުރައްވަނީއެ. މީގެން ވެސް ދޭހަވޭ އެއިން ބޭފުޅަކު އިންތިހާބުވެއްޖެނަމަ ސަރުކާރާ ދެކޮޅަށްކަން މަސައްކަތް ކުރައްވާނީ. " - ނާއިބު ރައީސް އަލްއުސްތާޒު ހުސައިން މުހައްމަދު ލަތީފު
މާޒީއަށް ބަލާއިރު ވާދަވެރިން އަބަދުވެސް ކަންތައް ކުރަމުން އައިސްފައިވަނީ އެގޮަތަށް ކަމަށް ނާއިބު ރައީސް ވިދާޅުވި އެވެ.
