އީރާނުގެ ދީނީ އިލްމުވެރިންގެ މަޖިލީހުން އައްޔަންކުރާ ކޮންމެ އާ ލީޑަރަކީވެސް އިސްރާއީލުން ނައްތާލަން ބޭނުންވާ "ސީދާ އަމާޒެއް" ކަމަށް އެ ގައުމުގެ ޑިފެންސް މިނިސްޓަރު އިސްރާއީލް ކާޓްޒް ބުދަ ދުވަހު އިންޒާރު ދީފިއެވެ.
މި އިންޒާރު ދީފައިވަނީ އަވަހާރަވެފައިވާ އާޔަތުﷲ އަލީ ޚާމަނާއީގެ ބަދަލުގައި އާ ލީޑަރަކު ހޮވުމަށް އީރާނުގެ އިސް އޮފިޝަލުން އެއްވެފައިވާ ދަނޑިވަޅެއްގައެވެ.
އިސްރާއީލުގެ ޑިފެންސް މިނިސްޓަރު އިސްރާއީލް ކާޓްޒް ވިދާޅުވީ، "އީރާނުގެ ޓެރަރިސްޓް ރެޖީމުން އައްޔަންކުރާ ކޮންމެ ލީޑަރަކީ ނައްތާލުމަށް ކަނޑައެޅިފައިވާ ސީދާ އަމާޒެއް. އޮޕަރޭޝަން 'ލަޔަންސް ރޯ' ގެ މަގްސަދުތަކުގެ ތެރެއިން މި މިޝަން ފުރިހަމަކުރުމަށް ބޭނުންވާ ހުރިހާ ވަސީލަތެއް ބޭނުންކޮށްގެން ތައްޔާރުވުމަށް ބޮޑުވަޒީރާއި އަޅުގަނޑު ވާނީ އައި.ޑީ.އެފް އަށް އަންގާފައި،" ކަމަށެވެ.
ކާޓްޒް އިތުރަށް ވިދާޅުވީ އެ ލީޑަރެއްގެ ނަމަކީ ކޮބައިކަމެއް ނުވަތަ ފިލައިގެން އުޅެނީ ކޮންތާކު ކަމެއް ބެލުމެއް ނެތި އިސްރާއީލުން ފިޔަވަޅު އަޅާނެ ކަމަށެވެ.
އަދި އެމެރިކާއާ ގުޅިގެން އީރާނުގެ ރެޖީމްގެ ގާބިލްކަން ނައްތާލުމަށާއި، އީރާނުގެ ރައްޔިތުންނަށް އެ ސަރުކާރު ވައްޓާލައި އާ ސަރުކާރެއް ގާއިމުކުރުމުގެ ފުރުސަތު ހޯދައިދިނުމަށް ފުރިހަމަ ބާރާއެކު މަސައްކަތް ކުރާނެ ކަމަށްވެސް އޭނާ ވިދާޅުވިއެވެ.
އީރާނުގެ އެންމެ މަތީ ލީޑަރު ޚާމަނާއީ އަވަހާރަވީ މިދިޔަ ހޮނިހިރު ދުވަހު އެމެރިކާ އާއި އިސްރާއީލުން ގުޅިގެން ދިން ހަމަލާތަކުގައެވެ. ޚާމަނާއީ އަވަހާރަވިއިރު، އޭނާގެ ބަދަލުގައި މަގާމާ ހަވާލުވާނެ ވަލީއަހުދެއް ރަސްމީކޮށް އިއުލާނުކޮށްފައެއް ނުވެއެވެ. އެހެންކަމުން، އާ ލީޑަރަކު ހޮވުމަށްޓަކައި އިސް ދީނީ އިލްމުވެރިންގެ މަޖިލީހުން މިހާރު ދަނީ ވަރޗުއަލްކޮށް ބައްދަލުވުންތައް ބާއްވަމުންނެވެ.
އިސްރާއީލާއި އެމެރިކާއިން ދައުވާކުރާ ގޮތުގައި މި ހަމަލާތަކުގެ ސަބަބުން އީރާނުގެ ރައްޔިތުންނަށް ޑިމޮކްރެޓިކް ސަރުކާރެއް ގާއިމުކޮށް ސަރަހައްދީ ސުލްހަ ގާއިމުކުރުމަށް މަގުފަހިވެގެންދާނެއެވެ.
ހަމައެއާއެކު، އެމެރިކާގެ ރައީސް ޑޮނަލްޑް ޓްރަމްޕް ވަނީ ވެނެޒުއޭލާގައި ކަންތައް ކުރި ފަދަ ގޮތަކަށް، އީރާނުގެ އިސްވެރިޔާ ހައްޔަރުކޮށް ނުވަތަ ނައްތާލި ނަމަވެސް އިދާރީ އޮނިގަނޑުގެ ބޮޑުބައެއް ދެމެހެއްޓުމުގެ ވިސްނުމެއް ގެންގުޅުއްވާކަން ހާމަކުރައްވާފައެވެ.
