މެދުއިރުމަތީ މިހާރު ހިނގަމުން އަންނަ ހަމަނުޖެހުމާ ގުޅިގެން އެމެރިކާގައި ޑޮލަރުގެ އަގު 0.98 އިންސައްތަ މައްޗަށް ގޮސްފިއެވެ. .

ދުނިޔޭގެ ތެލުގެ ބޭނުންކުރާ މިންވަރުގެ ގާތްގަނޑަކަށް 20 އިންސައްތަ ހުރަސްކުރާ އީރާނުގެ އައްސޭރިފަށުގައިވާ ހޮރްމުޒް ކަނޑުއޮޅިން ދަތުރުކުރާ ކޮންމެ އުޅަނދަކަށް ހަމަލާދޭނެ ކަމަށް އީރާނުން ހޯމަ ދުވަހު ބުނުމާ ގުޅިގެން، ތެލުގެ އަގަށް އިތުރު ލޮޅުންތަކެއް އަތުވެދާނެ ކަމަށް އިންވެސްޓަރުން ދަނީ ތައްޔާރުވަމުންނެވެ. 

ހަމަނުޖެހުންތައް ކުރިއަށްދާތީ، އުޅަނދުތައް ދުއްވާ ފަރާތްތަކާއި ކަނޑުދަތުރުފަތުރުގެ އިންޝުއަރެންސް ދޭ ކުންފުނިތަކުން އެ ސަރަހައްދުން ދަތުރުކުރުމަށް ވަނީ ޖެހިލުންވެފައެވެ.

ހޯމަ ދުވަހު އެމެރިކާގެ ސާފުނުކުރާ ތެލުގެ އަގު 6.3 އިންސައްތަ އުފުލުމަށްފަހު، އަންގާރަ ދުވަހު އަނެއްކާވެސް 8 އިންސައްތަ މައްޗަށް ގޮސް ފީފާއެއްގެ އަގު 76.91 ޑޮލަރަށް ވަނީ އަރާފައެވެ. 

އަދި ޕެޓްރޯލްގެ އަގު 11 ސެންޓު މައްޗަށް ގޮސް ގެލަނެއްގެ އަގު 3.11 ޑޮލަރަށް ވަނީ އުފުލިފައެވެ. ބައިނަލްއަގުވާމީ ތެލުގެ އަގު މިންކުރާ ބްރެންޓް ކްރޫޑްގެ އަގު 7.6 އިންސައްތަ މައްޗަށް ގޮސް ފީފާއެއްގެ އަގު 83.65 ޑޮލަރަށް އަރާފައިވާއިރު، މިއީ 2024 ވަނަ އަހަރުގެ ޖުލައި މަހަށްފަހު އަގު މިހާ މައްޗަށް ދިޔަ ފުރަތަމަ ފަހަރެވެ.

ރައްކާތެރި އިންވެސްޓްމަންޓްތަކުގެ ގޮތުގައި ބެލެވޭ ވަސީލަތްތަކުގެ އަގަށް އަންގާރަ ދުވަހު ވަނީ ބަދަލުތަކެއް އައިސްފައެވެ. ތެލުގެ އަގު މައްޗަށް ދިއުމުގެ ސަބަބުން ތަކެތީގެ އަގު އުފުލިދާނެ ކަމަށް ބަލައި، އިންވެސްޓަރުން ބޮންޑުތައް ވިއްކަން ފެށުމުން 10 އަހަރުގެ ޓްރެޒަރީ ޔީލްޑް ވަނީ މައްޗަށް ގޮސްފައެވެ.

ތަކެތީގެ އަގު އުފުލުމުގެ ސަބަބުން ފެޑަރަލް ރިޒާވުން އިންޓްރެސްޓް ރޭޓް ކުޑަކުރުން ލަސްވެދާނެ ކަމަށް ބެލެވުމާއެކު، އެމެރިކާ ޑޮލަރުގެ އަގު ވަނީ 0.98 އިންސައްތަ މައްޗަށް ގޮސްފައެވެ. މި ހަފުތާގެ ތެރޭގައި ޑޮލަރުގެ އިންޑެކްސް ވަނީ ގާތްގަނޑަކަށް 1.8 އިންސައްތަ ކުރިއަރާފައެވެ.

މެކުއަރީ ގްރޫޕްގެ ގްލޯބަލް އެފް.އެކްސް އެންޑް ރޭޓްސް ސްޓްރެޓެޖިސްޓް، ތިއަރީ ވިޒްމަން ވިދާޅުވި ގޮތުގައި، މިހާރު ހިނގަމުންދާ ހަނގުރާމައިގެ ސަބަބުން ތަކެތީގެ އަގު އުފުލިގެންދާނެ ކަމަށް ބެލެވޭތީ ވިޔަފާރިވެރިންގެ މެދުގައި ވަނީ ބޮޑު ނުތަނަވަސްކަމެއް އުފެދިފައެވެ.

"ކުރިން ބެލެވުނީ މިއީ ކުރު މުއްދަތެއްގެ ހަނގުރާމައެއް ކަމަށް. ނަމަވެސް މި ހަނގުރާމަ ދިގުދެމިގެން ހިނގައިދާނެ ކަމަށް އެމެރިކާގެ ސަރުކާރުން އިޝާރާތް ކުރުމާއެކު، ކުރިން އޮތް ބެލުމަށް ވަނީ ބަދަލު އައިސްފައި،" ވިޒްމަން އިތުރަށް ވިދާޅުވިއެވެ.

ރަނުގެ އަގަށް ބަލާއިރު، ހޯމަ ދުވަހު 1.2 އިންސައްތަ މައްޗަށް ގޮސް މަސްދުވަހުގެ ތެރޭގައި އެންމެ މަތީ އަގަށް އެރުމަށްފަހު، އަންގާރަ ދުވަހު ވަނީ 5 އިންސައްތަ ދަށަށް ގޮސްފައެވެ.

ޔޫރަޕްގައި ނެޗުރަލް ގޭސްގެ އަގު ހޯމަ ދުވަހު 38 އިންސައްތަ އުފުލުމަށްފަހު، އަންގާރަ ދުވަހު އަނެއްކާވެސް 24 އިންސައްތަ މައްޗަށް ގޮސްފައިވެއެވެ. އެމެރިކާގައި ނެޗުރަލް ގޭސްގެ އަގު 6.3 އިންސައްތަ އުފުލިފައިވަނީ ހޯމަ ދުވަހު 3.5 އިންސައްތަ މައްޗަށް ދިއުމަށްފަހުއެވެ.

އެމެރިކާގައި ތެލާއި ނެޗުރަލް ގޭސްއަށްވުރެ ބޮޑަށް ޑީސަލްގެ އަގު ވަނީ އުފުލިފައެވެ. ހޯމަ ދުވަހު ޑީސަލްގެ އަގު ގާތްގަނޑަކަށް 12 އިންސައްތަ އުފުލުމަށްފަހު، އަންގާރަ ދުވަހު ވަނީ އިތުރު 13 އިންސައްތަ މައްޗަށް ގޮސްފައެވެ.