ޚާމަނާއީ އަވަހާރަަކޮށްލުމުގެ މަސްތަކެއް ކުރިން އެމެރިކާއާއި އިޒްރާއިލުގެ ޖާސޫސީ ބާރުތަކުން ދިޔައީ އޭނާއަަށް ފާރަލަމުން ކަމަށް ރިޕޯޓުތައް ބުނެފިއެވެ.
މި މައުލޫމާތާ ގުޅުންހުރި ފަސް މަސްދަރަކުން ސީ.އެން.އެން އަށް ކިޔައިދީފައިވާ ގޮތުގައި، އިޒްރޭލާއި އެމެރިކާގެ ޖާސޫސީ އިދާރާތަކުން ދިޔައީ އީރާނުގެ ރޫހާނީ ލީޑަރު އާޔަތުﷲ ޢަލީ ޚާމަނާއީގެ ދިރިއުޅުމުގެ އާދަކާދަތަކާއި، އޭނާ ބައްދަލުކުރައްވާ ފަރާތްތަކާއި، މުއާސަލާތީ ވަސީލަތްތަކުގެ އިތުރުން ހަމަލާއެއްގެ ނުރައްކާ އޮތް ހާލަތެއްގައި އޭނާ ރައްކާތެރިކަން ހޯއްދަވާނެ ތަންތަން ވަރަށް ގާތުން ބަލަމުންނެވެ. މީގެ އިތުރުން، އާންމުކޮށް އެއްތަނަކުން ބައްދަލުނުވާ އީރާނުގެ ސިޔާސީ އަދި އަސްކަރީ އިސް ވެރިންގެ ހަރަކާތްތަކަށް ވެސް ދިޔައީ ފާރަލަމުންނެވެ.
ވޭތުވެދިޔަ މަދު ދުވަސްކޮޅުގެ ތެރޭގައި އެ ފަރާތްތަކަށް ވަނީ ރަނގަޅު ފުރުސަތެއް ލިބިފައެވެ. އާޔަތުﷲ ޚާމަނާއީގެ އޮފީހާއި، ރިއާސީ ގަނޑުވަރާއި، ގައުމީ ސަލާމަތާ ބެހޭ އިދާރާތައް ހުންނަ ތެހެރާންގެ ކޮމްޕައުންޑްގެ ތަފާތު ތަންތަނުގައި، ހޮނިހިރު ދުވަހުގެ ހެނދުނު އީރާނުގެ އެންމެ އިސްވެރިން ބައްދަލުވުމެއް ބޭއްވުމަށް ހަމަޖެހިފައިވާކަން ޖާސޫސީ އިދާރާތަކަށް އެނގުނެވެ.
އިޒްރޭލުގެ މަސްދަރަކުން ބުނި ގޮތުގައި، އާންމުކޮށް ވަރަށް ބޮޑަށް ސަލާމަތީ ފިޔަވަޅުތައް ވަރުގަދަކުރައްވާ ޚާމަނާއީއަށް، ރޭގަނޑުގެ ވަގުތުތަކަށްވުރެ ދުވާލުގެ ވަގުތުތަކުގައި ނުރައްކާ ކުޑަކަމަށް ގަބޫލުކުރެވި، ސަލާމަތީ ފިޔަވަޅުތަކަށް ކޮންމެވެސް ވަރެއްގެ ލުޔެއް ދެވުނެވެ. މިއީ އިޒްރޭލާއި އެމެރިކާގެ އިސް އޮފިޝަލުން ގަބޫލުކުރި ގޮތުގައި ދޫކޮށްލެވެން ނެތް ފަދަ ރަނގަޅު ފުރުސަތެކެވެ.
މިކަމާ ގުޅިގެން، ރޭގަނޑުގެ ވަގުތު ދޭން ރޭވި ހަމަލާ ދުވާލުގެ ވަގުތަށް ބަދަލުކުރެވުނެވެ. އިޒްރޭލުގެ އަސްކަރީ ޗީފް އޮފް ސްޓާފް އިޔާލް ޒާމިރު، ވައިގެ ސިފައިންގެ ޕައިލެޓުންނަށް ފޮނުއްވި މެސެޖެއްގައި ވިދާޅުވީ، "ހޮނިހިރު ދުވަހުގެ ފަތިހު 'އޮޕަރޭޝަން ރޯރިންގ ލަޔަން' ފެށޭނެ" ކަމަށާއި، ކަނޑައެޅިފައިވާ އަމާޒުތަކަށް ހަމަލާދިނުމުގެ ހުއްދަ ދެވިފައިވާ ކަމަށެވެ. އަދި މިއީ ތާރީޚީ ވަގުތެއް ކަމަށް ވެސް އޭނާ ވިދާޅުވިއެވެ.
އިޒްރޭލުގެ ގަޑިން ހެނދުނު 6 ޖަހާކަންހާއިރު، އިޒްރޭލާއި އެމެރިކާ ގުޅިގެން ދިން ވަރުގަދަ ހަމަލާތަކުގެ ފުރަތަމަ ފިޔަވަހީގައި، އިޒްރޭލުގެ ހަނގުރާމަމަތީ މަތިންދާބޯޓުތަކުން އެ ކޮމްޕައުންޑަށް ހަމަލާދިނެވެ. މި ހަމަލާތަކުގައި ބޭނުންކުރީ އަމާޒަށް ސީދާ ފާތިހުވާ ޒަމާނީ ހަތިޔާރާއި ދުރު ރާސްތާގެ މިސައިލްތަކެވެ. އެ ކޮމްޕައުންޑްގައި އިސްވެރިން ތިއްބެވި ތިން ތަނަށް ވެސް އެއްވަގުތެއްގައި ހަމަލާ އެރިއެވެ. އޭގެ ގަޑިއިރުތަކެއް ފަހުން، ރައީސް ޑޮނަލްޑް ޓްރަމްޕް ވަނީ ޚާމަނާއީ އަވަހާރަވެފައިވާކަން އިއުލާންކުރައްވާފައެވެ.
ޓްރަމްޕްގެ ސޯޝަލް މީޑިއާ ބަޔާނުގައި ވިދާޅުވީ، އެމެރިކާާއި އިޒްރޭލުގެ ވަރުގަދަ ޖާސޫސީ ނިޒާމުތަކުގެ ކިބައިން ސަލާމަތްވުމަށް ޚާމަނާއީއަށާއި އެހެން ވެރިންނަށް އެއްވެސް ފުރުސަތެއް ނުލިބުނު ކަމަށެވެ.
މި ހަމަލާގައި ޚާމަނާއީގެ އިތުރުން އީރާނުގެ ރިވޮލިއުޝަނަރީ ގާޑްސްގެ ކޮމާންޑަރާއި، ޑިފެންސް މިނިސްޓަރު ފަދަ އެންމެ އިސްވެރިން އެއްތަނަކަށް ޖަމާވީ ކީއްވެގެންކަން އަދި ސާފެއް ނުވެއެވެ. މި ހަމަލާގައި އަވަހާރަވި ބޭފުޅުންގެ ތެރޭގައި ޑިފެންސް މިނިސްޓަރު އަޒީޒް ނާސިރުޒާދާ، މިލިޓަރީ ކައުންސިލްގެ ވެރިޔާ އެޑްމިރަލް އަލީ ޝަމްޚާނީ، އަދި ރިވޮލިއުޝަނަރީ ގާޑްސްގެ އިސް ކޮމާންޑަރުން ހިމެނެއެވެ.
މި އޮޕަރޭޝަނުން ހާމަވެގެން ދިޔައީ، ފާއިތުވި މަސްތަކުގައި އީރާނުގެ އެތެރޭގައި އިޒްރޭލާއި އެމެރިކާގެ ޖާސޫސީ ނިޒާމު އޮތް ވަރުގަދަކަމެވެ. އިޒްރޭލުގެ އަސްކަރީ އޮފިޝަލަކު ވިދާޅުވި ގޮތުގައި، އިޒްރޭލުން އަބަދުވެސް ދުޝްމަނުންގެ ވެރިންގެ ހަރަކާތްތައް ބަލައެވެ. ނަމަވެސް މިފަދަ ބޮޑު އޮޕަރޭޝަނަކަށް ގިނަ ކަންތައްތަކެއް އެއްވަގުތެއްގައި ފުރިހަމަވާން ޖެހެއެވެ.
ތައްޔާރުވުމާއި ރޭވުންތެރިކަން
މި އޮޕަރޭޝަނަކީ އިޒްރޭލާއި އެމެރިކާ ގުޅިގެން ހަފުތާތަކެއް ވަންދެން ރޭވި ކަމެކެވެ. ކްރިސްމަސްގެ ފަހުން މާ-އަ-ލާގޯގައި ބޮޑުވަޒީރު ނަތަންޔާހޫއާއި ޓްރަމްޕް ބޭއްވި ބައްދަލުވުމެއްގައި، އީރާނުން އަލުން ނިއުކްލިއާ މަސައްކަތްތައް ފަށާފައިވާކަމުގެ މައުލޫމާތު ހިއްސާކުރެވުނެވެ. އެ ބައްދަލުވުމުގައި، އީރާނުގެ މިސައިލް ސައިޓްތަކަށް ހަމަލާދިނުމަށް ޓްރަމްޕް ތާއީދުކުރެއްވިއެވެ.
އޭގެ ފަހުން އީރާނުގެ އެތެރޭގައި ފެށުނު މުޒާހަރާތަކާ ގުޅިގެން، އެމެރިކާއާއި އިޒްރޭލުގެ ރޭވުންތައް އިތުރަށް އަވަސްވެގެން ދިޔައެވެ. މި ހަމަލާއަށް ތައްޔާރުވުމުގެ ގޮތުން އެމެރިކާއިން ވަނީ މެދުއިރުމައްޗަށް ދުނިޔޭގެ އެންމެ ބޮޑު މަތިންދާބޯޓު އުފުލާ މަނަވަރާއެކު އިތުރު އަސްކަރީ ވަސީލަތްތައް ފޮނުވާފައެވެ. މި މުއްދަތުގެ ތެރޭގައި އިޒްރޭލުގެ އަސްކަރީ އަދި ޖާސޫސީ އިދާރާތަކުގެ ވެރިން ވަނީ ތަކުރާރުކޮށް ވޮޝިންގޓަނަށް ޒިޔާރަތްކޮށް، މި އޮޕަރޭޝަންގެ ފަހުގެ ތައްޔާރީތައް ނިންމާފައެވެ.
