އިރާނުގެ އިސްލާމިކް ރިވޮލިއުޝަނަރީ ގާޑް ކޯޕްސް (އައިއާރުޖީސީ) އިން އިސްރާއީލުގެ އަމާޒުތަކަށް ވަރުގަދަ މިސައިލް ހަމަލާތަކެއް ދީފިއެވެ. މިއީ އެ ސަރަހައްދުގައި އުފެދިފައިވާ ހަމަނުޖެހުންތަކުގެ ތެރެއިން އިރާނުން ދިން ވަރުގަދަ ރައްދެކެވެ.
އައިއާރުޖީސީން ބުނި ގޮތުގައި، ވައިގެ މަގުން ދިން މި ހަމަލާތަކުގެ 17 ވަނަ ރާޅުގައި 40 އަށްވުރެ ގިނަ މިސައިލް ވަނީ ބޭނުންކޮށްފައެވެ. މި ހަމަލާތައް ސީދާ އަމާޒުކޮށްފައިވަނީ އިސްރާއީލާއި އެމެރިކާގެ އަސްކަރީ މުހިންމު ތަންތަނަށް ކަމަށް އެ ފަރާތުން ހާމަކުރެއެވެ.
އައިއާރުޖީސީ އިން ބުނީ އިސްރާއީލްގެ ރައްޔިތުން ފުރާނަ ސަލާމަތް ކުރަން ބޭނުން ނަމަ، އިސްރާއީލުން ފޭބުމަށާއި އިސްރާއީލަށް އަމާޒުކޮށް މިއަށް ވުރެ ވެސް ވަރުގަދަ ހަމަލާތަކެއް ދިނުމަށް ރާވަމުން އަންނަ ކަމުގެ އިންޒާރު އީރާނުގެ އިސްލާމިކް ރިވޮލިއުޝަނަރީ ގާޑް ކޯޕް (އައިއާރުޖީސީ) އިން ދީފިއެވެ.
އެމެރިކާ އާއި އިސްރާއީލް ގުޅިގެން އީރާނަށް ހަމަލާ ދިނުމާ ގުޅިގެން ރައްދުގައި އީރާނުން ދަނީ އިސްރާއީލަށާއި މެދުއިރުމަތީގައި ހުރި އެމެރިކާގެ އަސްކަރީ މަރުކަޒުތަކަށާއި އެމްބަސީތަކަށާއި ކޮންސިއުލޭޓްތަކަށް ހަމަލާތައް ދެމުންނެވެ.
އައިއާރުޖީސީން ބުނެފައި ވަނީ އިސްރާއީލްގެ އަސްކަރީ މަރުކަޒުތަކާއި ސަރުކާރުގެ އިމާރާތްތަކާއި ސަލާމަތީ މަރުކަޒުތަކާ ދުރަށް ދިއުމަށް އެ ގައުމުގައި ދިރިއުޅޭ މީހުންނަށް އިލްތިމާސްކުރާ ކަމަށެވެ. އަދި ހަނގުރާމައިގެ ނަތީޖާއަކަށް ވެގެންދާނީ އިސްރާއީލް އެއްކޮށް ސުންނާތިވުން ކަމުގައި އައިއާރުޖީސީން ބުނެފައިވެއެވެ.
މި ހަމަލާތަކާ ގުޅިގެން މުޅި ސަރަހައްދުގެ މަސްރަހު މިހާރު ވަނީ ވަރަށް ބޮޑަށް ހޫނުވެފައެވެ. ނަމަވެސް، މި ހަމަލާތަކުގެ ސަބަބުން ލިބުނު ގެއްލުންތަކުގެ ތަފްސީލީ ރިޕޯޓެއް އަދި މިހާތަނަށް އާންމުކޮށްފައެއް ނުވެއެވެ.
