އިސްރާއީލްގެ ރައްޔިތުން ފުރާނަ ސަލާމަތް ކުރަން ބޭނުން ނަމަ، އެ ގައުމުން ފޭބުމަށާއި އިސްރާއީލަށް އަމާޒުކޮށް މިއަށް ވުރެ ވެސް ވަރުގަދަ ހަމަލާތަކެއް ދިނުމަށް ރާވަމުން އަންނަ ކަމުގެ އިންޒާރު އީރާނުގެ އިސްލާމިކް ރިވޮލިއުޝަނަރީ ގާޑް ކޯޕް (އައިއާރުޖީސީ) އިން ދީފިއެވެ. އައިއާރުޖީސީން ބުނެފައި ވަނީ އިސްރާއީލްގައި މިހާރު ގުގުމަމުންދާ އިންޒާރުގެ ރަނގަބީލުތަކުގެ އަޑު ދެން ދުވަހަކު ވެސް ކެނޑިގެން ނުދާނެ ކަމަށެވެ.
އީރާންގެ ރިވޮލިއުޝަނަރީ ގާޑުން ހާމަކޮށްފައިވާ ގޮތުގައި، ޒަޔަނިސްޓް އަދި އެމެރިކާގެ އަމާޒުތަކަށް ހަމަލާ ދިނުމުގެ ގޮތުން ދާދި ދެންމެއަކު 40 މިސައިލް ވަނީ ފޮނުވާލާފައެވެ. މިއީ މިފަދަ ހަމަލާތަކުގެ 17 ވަނަ ރާޅު ކަމަށް ވެސް އެ ފަރާތުން ބުނެފައިވެއެވެ.
އެމެރިކާ އާއި އިސްރާއީލް ގުޅިގެން އީރާނަށް ހަމަލާ ދިނުމާ ގުޅިގެން ރައްދުގައި އީރާނުން ދަނީ އިސްރާއީލަށާއި މެދުއިރުމަތީގައި ހުރި އެމެރިކާގެ އަސްކަރީ މަރުކަޒުތަކަށާއި އެމްބަސީތަކަށާއި ކޮންސިއުލޭޓްތަކަށް ވަރުގަދަ ހަމަލާތަކެއް ދެމުންނެވެ. މި ހަމަލާތަކަކީ ސީދާ ރައްދު ހަމަލާތަކެއްގެ ގޮތުގައި އީރާނުން ސިފަކުރެއެވެ.
އައިއާރުޖީސީން ވަނީ އިސްރާއީލްގެ އަސްކަރީ މަރުކަޒުތަކާއި، ސަރުކާރުގެ އިމާރާތްތަކާއި، އަދި ސަލާމަތީ މަރުކަޒުތަކާ ދުރަށް ދިއުމަށް އެ ގައުމުގައި ދިރިއުޅޭ އާންމުންނަށް އިލްތިމާސްކޮށްފައެވެ. މިއީ އާންމުންގެ ފުރާނައަށް ލިބިދާނެ ގެއްލުމަކުން ސަލާމަތްވުމަށް ދީފައިވާ އިންޒާރެއް ކަމަށް ބެލެވެއެވެ.
މީގެ އިތުރުން، އީރާނުގެ އަސްކަރިއްޔާއިން ބުނެފައި ވަނީ މި ހަނގުރާމައިގެ އެންމެ ފަހުގެ ނަތީޖާއަކަށް ވެގެންދާނީ އިސްރާއީލް އެއްކޮށް ސުންނާތިވުން ކަމަށެވެ. "އިސްރާއީލްގައި ގުގުމަމުންދާ އިންޒާރުގެ ރަނގަބީލުތަކުގެ އަޑު ދެން ދުވަހަކު ވެސް ކެނޑިގެން ނުދާނެ،" އައިއާރުޖީސީގެ ބަޔާނުގައި ބަޔާންކޮށްފައިވެއެވެ.
