ދިވެހިރާއްޖޭގެ އައްޑޫ ސިޓީއާއި، ކެންޔާގެ މުމްބާސާގެ އިތުރުން އިންޑޮނީޝިއާގެ ޖަކާޓާ ގުޅުވައިދޭ އިގްތިސާދީ ވިޔަފާރި މަގަކާއި "ގްރީން އިކޮނޮމިކް ކޮރިޑޯ" އެއް ގާއިމުކުރުމުގެ މަސައްކަތް ކުރީގެ ރައީސް މުހައްމަދު ނަޝީދު ފައްޓަވައިފިއެވެ.
ރައީސް ނަޝީދުގެ މި ތަސައްވުރަކީ މުމްބާސާއިން ފެށިގެން އައްޑޫ މެދުވެރިކޮށް ޖަކާޓާއާ ހަމައަށް ދެމިގެންދާ ވިޔަފާރި ރޫޓެއް ބިނާކުރުމެވެ. އެމަނިކުފާނު އެކްސްގައި ހިއްސާކުރެއްވި ވީޑިއޯ މެސެޖެއްގައި ވިދާޅުވި ގޮތުގައި، ކެންޔާގެ ރައީސް ވިލިއަމް ރޫޓޯއާ މިކަމާ ގުޅޭގޮތުން މަޝްވަރާކުރެއްވުމުން، އެކަން ކުރިއަށް ގެންދިއުމަށް އެމަނިކުފާނު ވަރަށް ބޮޑު ޝައުގުވެރިކަމެއް ފާޅުކުރައްވާފައިވެއެވެ. އަދި ދިވެހި ސަރުކާރާއި އިންޑޮނީޝިއާގެ އެއްބާރުލުން ލިބިއްޖެ ނަމަ، މި މަޝްރޫއަކީ އަމަލީ ސިފަ ގެނެވިދާނެ ކަމެއް ކަމަށްވެސް އެމަނިކުފާނު ފާހަގަކުރެއްވިއެވެ.
މިކަމާ ގުޅޭގޮތުން ނަޝީދު އިތުރަށް ވިދާޅުވީ، ކެންޔާގެ ރައީސް މި މަސައްކަތުގެ ފީސިބިލިޓީ ދިރާސާކުރުމަށް ތައްޔާރަށް ހުންނެވި ކަމަށާއި، އެ ގައުމުގެ ވަޒީރުންނަށް އެކަމުގެ އިރުޝާދު ދެއްވާފައިވާ ކަމަށެވެ. އެހެންކަމުން، ދެން އޮތް ފިޔަވަޅަކީ ދިވެހި ސަރުކާރާއި ޖަކާޓާގެ އެއްބާރުލުން ހޯދުން ކަމަށް އެމަނިކުފާނު ވިދާޅުވިއެވެ.
މި މަޝްރޫއަކީ "ގްރީން ކޮރިޑޯ" އެއްގެ ގޮތުގައި ސިފަކުރައްވަމުން ނަޝީދު ވިދާޅުވީ، މި މަސައްކަތުގެ ހުރިހާ މަރުހަލާއެއްގައިވެސް އިއާދަކުރަނިވި ހަކަތަ ބޭނުންކުރުމަށާއި ތިމާވެށި ހިމާޔަތްކުރުމަށް އިސްކަންދޭންޖެހޭ ކަމަށެވެ. ސީވީއެފްގެ ސެކްރެޓަރީ ޖެނެރަލްގެ މަގާމުގައި ހުންނަވައިގެން އެފްރިކާގައި ދިރިއުޅުއްވަމުން ގެންދަވާ ނަޝީދު ވިދާޅުވީ، އިންޑިއާ ކަނޑުގެ މަރުކަޒީ ސަރަހައްދެއްގައި އައްޑޫ އޮތްއިރު، ދުނިޔޭގެ ވިޔަފާރި މުދާ އުފުލާ މައި މަގަކަށް އައްޑޫ ނުވުމަކީ ގެއްލުމެއް ކަމަށެވެ.
"އައްޑޫ އަތޮޅަކީ ގުދުރަތީ ގޮތުން އިންޑިއާ ކަނޑުގެ މެދުގައި އޮތް ވަރަށް މުހިންމު ތަނެއް. އެއްކޮޅުން އެފްރިކާއާ ގުޅިފައިވާއިރު، އަނެއްކޮޅުން މި އޮތީ އިންޑޮނީޝިއާ، މެލޭޝިޔާ އަދި ސިންގަޕޫރު ފަދަ އިރުމަތީގެ ގައުމުތައް. އިންޑިއާ ކަނޑަކީ ދުނިޔޭގެ އެންމެ ގިނަ މުދާ އުފުލާ އެއް ސަރަހައްދު،" ނަޝީދު ވިދާޅުވިއެވެ.
އެމަނިކުފާނުގެ ރޭވުމަކީ އައްޑޫ ސިޓީއަކީ ޓްރާންސްޝިޕްމަންޓް ބަނދަރަކަށް ހަދައި، އެފްރިކާއާއި އިންޑޮނީޝިއާއިން އަންނަ މުދާ އައްޑޫގައި ބަދަލުކުރެވޭނެ އިންތިޒާމެއް ހަމަޖެއްސުމެވެ. މިގޮތުން، ކުދި ބޯޓުފަހަރު ބޭނުންކޮށްގެން ދެ ސަރަހައްދުގެ މެދުގައި މުދާ ބަދަލުކުރުމަކީ އިގްތިސާދީ ގޮތުން އެންމެ ފައިދާހުރި ގޮތް ކަމަށްވެސް އެމަނިކުފާނު ލަފާކުރައްވައެވެ.
