ގަލްފްގެ ގައުމުތަކުގެ ވައިގެ ސަރަހައްދު ބަންދުކުރުމާ ގުޅިގެން ފްލައިޓްތައް ކެންސަލްވި ފަތުރުވެރިންގެ ވިސާގެ މުއްދަތު އިތުރުކޮށްދިނުމަށް މޯލްޑިވްސް އިމިގްރޭޝަނުން ނިންމައިފިއެވެ.

މިކަމާ ގުޅޭގޮތުން އިމިގްރޭޝަނުން ބުނީ، މެދުއިރުމަތީގައި މި މަހުގެ 28 ވަނަ ދުވަހުން ފެށިގެން ހިނގަމުންދާ ހަމަނުޖެހުންތަކުގެ ސަބަބުން ދަތުރުފަތުރުގެ ނިޒާމަށް ބުރޫއަރައި، ގިނަ ފްލައިޓްތަކެއް ކެންސަލްވެފައިވާ ކަމަށެވެ. މީގެ ސަބަބުން ރާއްޖޭގައި ތިބި ބައެއް ފަތުރުވެރިންނަށް ވިސާގެ މުއްދަތު ހަމަވުމުގެ ކުރިން ފުރޭނެ ގޮތެއް ނެތުމުން، އެ ފަރާތްތަކަށް ލުޔެއް ދިނުމުގެ ގޮތުން ޓޫރިސްޓް ވިސާ އިތުރުކޮށްދޭން ނިންމީ ކަމަށް އެ އިދާރާއިން މައުލޫމާތު ދެއެވެ.

އިމިގްރޭޝަނުން ނިންމި މި ނިންމުމަށް ފަތުރުވެރިކަމުގެ ދާއިރާގައި މަސައްކަތްކުރާ ފަރާތްތަކުން ވަނީ މަރުހަބާ ކިޔާފައެވެ. އަދި މިއީ މިފަދަ ނާޒުކު ދަނޑިވަޅެއްގައި ފަތުރުވެރިންނަށާއި ސިނާއަތުގައި ހަރަކާތްތެރިވާ ފަރާތްތަކަށް ލިބުނު ބޮޑު ތަސައްލީއެއްގެ ގޮތުގައި އެ ފަރާތްތަކުން ފާހަގަކުރެއެވެ.

އެމެރިކާ އާއި އިސްރާއީލުން އިސްވެ އީރާނަށް ދިން ހަމަލާތަކާ ގުޅިގެން، އީރާނުން ވެސް ވަނީ އެމެރިކާގެ އަސްކަރީ މަރުކަޒުތަކަށް އަމާޒުކޮށް ހަމަލާދީފައެވެ. މި ހަމަނުޖެހުންތަކާ ގުޅިގެން އެ ސަރަހައްދުގެ ގައުމުތަކުން ވައިގެ ދަތުރުފަތުރު މެދުކަނޑާލާފައިވާއިރު، ސައުދީ އަރަބިއްޔާ ފިޔަވައި ގަތަރާއި ދުބާއީ ފަދަ ގައުމުތަކުން ވަނީ އެ ގައުމުތަކުގެ ވައިގެ ސަރަހައްދު ބަންދުކޮށްފައެވެ. މީގެ ސަބަބުން މެދުއިރުމަތީގެ ވައިގެ ދަތުރުފަތުރުގެ ނިޒާމަށް ވަނީ ވަރަށް ބޮޑަށް ބުރޫއަރާފައެވެ.

ރާއްޖެއަށް ޒިޔާރަތްކުރާ ފަތުރުވެރިންގެ ބޮޑު ބައެއް މެދުއިރުމަތީގެ މަގުން ދަތުރުކުރާއިރު، ފްލައިޓްތައް ކެންސަލްވުމުގެ ސަބަބުން ގިނަ އަދަދެއްގެ ފަތުރުވެރިން މިހާރު ވެސް ރާއްޖެއިން ނުފުރިފައި ތިބިކަން ފާހަގަކުރެވެއެވެ.