މި ސަރުކާރުގެ 'އާއިލީ ބޯހިޔާވަހިކަން' މަޝްރޫޢުގެ ދަށުން ޚާއްޞަ ދާއިރާތަކަށް ކަނޑައަޅާފައިވާ ފުލެޓުތަކަށް ކުރިމަތިލުމުގެ ޝަރުޠުތަކަށް ބަދަލުުގެނެސް، ހައުސިންގ މިނިސްޓްރީން އެކަން އިޢުލާނުކޮށްފިއެވެ.
މިނިސްޓްރީން މިއަދު އާންމުކުރި އިޢުލާނުގައިވާ ގޮތުން، ބޯހިޔާވަހިކަން ފޯރުކޮށްދިނުމުގައި ޚާއްޞަ އިސްކަމެއްދޭ މުއައްސަސާތަކާއި އިދާރާތަކުގެ ކެޓަގަރީތަކަށް ކުރިމަތިލާ ފަރާތްތަކުން ފުރިހަމަވާންޖެހޭ ޝަރުޠުތަކަށް ވަނީ އިޞްލާޙު ގެނެސްފައެވެ. މީގެ އިތުރުން ކޮންމެ ދާއިރާއަކަށް ދޫކުރުމަށް ހަމަޖެހިފައިވާ ފުލެޓުގެ ޢަދަދުތައް ވެސް މިހާރު ވަނީ ހާމަކޮށްފައެވެ.
ޚާއްޞަ ކެޓަގަރީގެ ދަށުން ދޫކުރާ 1,000 ފުލެޓު ބަހާލެވިފައިވާ ގޮތަކީ:
- ޖުޑިޝަރީގެ މުވައްޒަފުންނަށް: 100 ފުލެޓު
- ފުލުހުންނަށް: 100 ފުލެޓު
- އެމް.އެން.ޑީ.އެފް އަށް: 100 ފުލެޓު
- ސިވިލް ސާވިސްގެ މުވައްޒަފުންނަށް: 200 ފުލެޓު
- ކަރެކްޝަނަލް ސާވިސްގެ މުވައްޒަފުންނަށް: 100 ފުލެޓު
- ދައުލަތުގެ އެހެނިހެން އިދާރާތަކަށް: 400 ފުލެޓު
މި ކެޓަގަރީތަކުން ފުލެޓަށް އެދި ހުށަހަޅާ ފަރާތްތަކުގެ ކިބައިގައި ހުންނަންޖެހޭ އަސާސީ ތިން ޝަރުޠަކީ:
- މާލެ ސިޓީގައި ދިރިއުޅޭ، އާއިލީ ޒިންމާތަކެއް އުފުލާ ފަރާތަކަށްވުން.
- މަދުވެގެން ވޭތުވެދިޔަ އެއް އަހަރު ދުވަހު އެ މުއައްސަސާއެއްގައި މެދުނުކެނޑި ވަޒީފާ އަދާކޮށްފައިވުން.
- ފުލެޓު ލިބޭ ތާރީޚުން ފެށިގެން، އެ އިދާރާއަކުން ކަނޑައަޅާ ވަކި މުއްދަތަކަށް ވަޒީފާގައި ދެމިހުރުމަށް އެއްބަސްވުން.
މީގެކުރިން އާންމުކުރި އުޞޫލުގައިވާ ގޮތުން، ފުލެޓަށް ކުރިމަތިލެވޭނީ އެ މުއައްސަސާއެއްގައި މަދުވެގެން ފަސް އަހަރު ޚިދުމަތްކޮށްފައިވާ މުވައްޒަފުންނަށެވެ. ނަމަވެސް، މިހާރު ގެނައި ބަދަލާއެކު އެ މުއްދަތު ވަނީ އެއް އަހަރަށް ކުރުކޮށްފައެވެ.
'ދައުލަތުގެ އެހެނިހެން އިދާރާތަކުގެ' ތެރޭގައި ރައީސުލްޖުމްހޫރިއްޔާގެ އޮފީހާއި، ރައްޔިތުންގެ މަޖިލީހާއި، އެޓަރނީ ޖެނެރަލްގެ އޮފީހުގެ އިތުރުން މުލިއާގެއާއި ހިލާލީގޭގެ މުވައްޒަފުން ވެސް ހިމެނެއެވެ. މީގެ އިތުރުން ޖޭ.އެސް.ސީ، އިލެކްޝަންސް ކޮމިޝަން އަދި އޭ.ސީ.ސީ ފަދަ މުސްތަޤިއްލު މުއައްސަސާތައް ވެސް މި ބައިގައި ހިމެނެއެވެ.
ހައުސިންގ މިނިސްޓްރީން އިތުރަށް ބުނެފައިވަނީ، 'ބޯހިޔާވެހިކަން އެންމެންނަށް' ސިޔާސަތުގެ ދަށުން މާލޭގެ ރައްޔިތުންނަށް ގޯއްޗާއި ފުލެޓަށް އެދި ހުށަހެޅުމަށް ދީފައިވާ މުއްދަތު މިހާރު އިތުރުކޮށްފައިވާ ކަމަށެވެ. އެގޮތުން، އަންނަ އޭޕްރީލް މަހުގެ 30 ވާ ބުރާސްފަތި ދުވަހުގެ ރޭގަނޑު 23:59 އާ ހަމައަށް ފޯމު ހުށަހެޅުމުގެ ފުރުޞަތު އޮންނާނެއެވެ.
މިދިޔަ ޖަނަވަރީ 18 ގައި ފެށި މި މަޝްރޫޢުގެ ދަށުން، ޖުމްލަ 7,900 ފުލެޓާއި 15,000 ގޯތި ދޫކުރުމަށް ސަރުކާރުން ވަނީ ނިންމާފައެވެ.
