ގަލްފް ސަރަހައްދުގައި އެމެރިކާއިން އަސްކަރީ ބާރުގަދަކުރަމުންދާތީ ނުތަނަވަސްކަން އިތުރުވެފައިވާ ދަނޑިވަޅެއްގައި، އެމެރިކާއާއެކު މަޝްވަރާކުރުމަށް ބޭނުންވާ އިންތިޒާމުތައް ހަމަޖެހެމުންދާކަމަށް އީރާނުގެ ގައުމީ ސަލާމަތާ ބެހޭ އިސް އޮފިޝަލަކު ވިދާޅުވެއްޖެއެވެ.
އީރާނުގެ ސުޕްރީމް ނޭޝަނަލް ސެކިއުރިޓީ ކައުންސިލްގެ އިސްވެރިޔާ އަލީ ލާރިޖާނީ ހޮނިހިރު ދުވަހު ސޯޝަލް މީޑިއާގައި ކުރެއްވި ޕޯސްޓެއްގައި ވިދާޅުވީ، މީޑިއާތަކުން ދައްކާ ބިރުވެރި މާހައުލާ ޚިލާފަށް، މަޝްވަރާތަކަށް ބޭނުންވާ އޮނިގަނޑު އެކުލަވައިލުމުގެ މަސައްކަތް ކުރިއަށްދާ ކަމަށެވެ. ނަމަވެސް، މި މަޝްވަރާތަކާ ބެހޭ އިތުރު ތަފްސީލެއް އޭނާ ހާމައެއް ނުކުރައްވައެވެ.
މިކަމާ ގުޅޭގޮތުން އެމެރިކާގެ ރައީސް ޑޮނަލްޑް ޓްރަމްޕް ވިދާޅުވީ، އީރާނުން ބޭނުންވަނީ އަސްކަރީ ކުރިމަތިލުމަކަށް ދިއުމުގެ ބަދަލުގައި އެއްބަސްވުމަކަށް އައުމަށް ކަމަށް ގަބޫލުކުރައްވާ ކަމަށެވެ. ފޮކްސް ނިއުސްއަށް ދެއްވި އިންޓަވިއުއެއްގައި ޓްރަމްޕް ވިދާޅުވީ އީރާނުން އެމެރިކާއާ ވާހަކަދައްކަމުންދާ ކަމަށާއި، ކުރިއަށް އޮތް ތަނުގައި ވާނެ ގޮތެއް ބަލާނެ ކަމަށެވެ. އަދި އެމެރިކާގެ ވަރުގަދަ އަސްކަރީ ފްލީޓެއް އެ ސަރަހައްދަށް މިހާރު ދަތުރުކުރަމުންދާކަންވެސް އޭނާ ފާހަގަކުރެއްވިއެވެ.
ފަހަކަށް އައިސް އީރާނާއި އެމެރިކާގެ ގުޅުން ވަރަށް ބޮޑަށް ގޯސްވެފައިވަނީ، އީރާނުގެ ނިއުކްލިއާ ޕްރޮގްރާމް ހުއްޓުވުމަށާއި، އެ ގައުމުގައި ހިނގަމުންދާ މުޒާހަރާތަކާ ގުޅިގެން ޓްރަމްޕް ދެއްވަމުންދާ ހަރުކަށި އިންޒާރުތަކާ ގުޅިގެންނެވެ. އެމެރިކާއިން ވަނީ ޔޫ.އެސް.އެސް އަބްރަހަމް ލިންކަން މަނަވަރު ހިމެނޭހެން ބޮޑު އަސްކަރީ ފައުޖެއް އެ ސަރަހައްދަށް ފޮނުވާފައެވެ.
އީރާނުގެ އިސް ލީޑަރުން ވިދާޅުވަމުން ގެންދަވަނީ މަޝްވަރާއަށް ފުރުސަތު އެބައޮތް ކަމަށާއި، ނަމަވެސް އެކަން ކުރެވޭނީ އެމެރިކާއިން އީރާނަށް ދެމުންދާ އަސްކަރީ އިންޒާރުތައް ހުއްޓާލުމުން ކަމަށެވެ. ޓްރަމްޕް މީގެ ކުރިން ވިދާޅުވެފައިވަނީ އީރާނުން މަޝްވަރާގެ މޭޒަށް ނައިސްފިނަމަ، ބާރުގެ ބޭނުންކުރަން ޖެހިދާނެ ކަމަށެވެ.
މީގެ އިތުރުން، ދުނިޔޭގެ ވިޔަފާރީގެ މުހިންމު މަގަކަށްވާ ހޯރްމޫޒް ކަނޑުއޮޅީގައި އީރާނުގެ ރިވެލޫޝަނަރީ ގާޑްސް (އައި.އާރް.ޖީ.ސީ) އިން ބޭއްވުމަށް ހަމަޖެހިފައިވާ އަސްކަރީ ތަމްރީނުތަކާ ގުޅިގެން އެމެރިކާގެ ސެންޓްރަލް ކޮމާންޑް (ސެންޓްކޮމް) އިން ވަނީ އިންޒާރު ދީފައެވެ. ސެންޓްކޮމް އިން ބުނީ އެ ސަރަހައްދުގައި ހިންގާ ނުރައްކާތެރި އަމަލުތަކުގެ ސަބަބުން ކުރިމަތިލުމަކަށް މަގުފަހިވެދާނެ ކަމަށެވެ.
މިކަމަށް ރައްދު ދެއްވަމުން އީރާނުގެ ޚާރިޖީ ވަޒީރު އައްބާސް އަރާގްޗީ ވިދާޅުވީ، އީރާނުގެ އަމިއްލަ ސަރަހައްދުގައި އަސްކަރީ ތަމްރީނުތައް ބާއްވާނެ ގޮތް ބުނެދޭން އެމެރިކާއިން މަސައްކަތް ކުރުމަކީ ބަލައިގަނެވޭނެ ކަމެއް ނޫން ކަމަށެވެ. އަދި ބޭރުގެ ބާރުތައް އެ ސަރަހައްދުގައި ތިބުމަކީ މަސްލަހަތު ގޯސްވާ ކަމެއް ކަމަށްވެސް އޭނާ ވިދާޅުވިއެވެ.
މި ދަނޑިވަޅުގައި ގަތަރުގެ ބޮޑުވަޒީރު ޝައިޚް މުޙައްމަދު ބިން އަބްދުއްރަޙްމާން އަލްޘާނީ ވަނީ އީރާނަށް ވަޑައިގެން، ނުތަނަވަސްކަން ކުޑަކުރުމާ ގުޅޭގޮތުން ލާރިޖާނީއާ މަޝްވަރާ ކުރައްވާފައެވެ. ގަތަރުގެ ޚާރިޖީ ވުޒާރާއިން ބުނީ، ސަރަހައްދުގެ ހަމަޖެހުމަށްޓަކައި ސުލްހަވެރި ހައްލެއް ހޯދުމަށް ކުރެވޭ ހުރިހާ މަސައްކަތަކަށް ގަތަރުން ތާއީދުކުރާ ކަމަށެވެ.
