ގްރީންލޭންޑަކީ އެތަނުގެ ރައްޔިތުންގެ މިލްކެއް ކަމަށް ބުނެ ޔޫރަޕާއި ކެނެޑާގެ ލީޑަރުން އެ އާކްޓިކް ސަރަހައްދަށް ތާއީދުކުރައްވަމުން ގެންދަވަނިކޮށް، ގްރީންލޭންޑްގެ ކޮންޓްރޯލް ހޯދުމަށް އަސްކަރީ ބާރު ބޭނުންކޮށްފާނެ ކަމުގެ އިޝާރާތެއް އެމެރިކާއިން ދީފިއެވެ.

ވައިޓް ހައުސްއިން އަންގާރަ ދުވަހު ނެރުނު ބަޔާނެއްގައި ބުނެފައިވަނީ، ޑެންމާކުގެ ބައެއްގެ ގޮތުގައި އޮތް ގްރީންލޭންޑް ހޯދުމަކީ ގައުމީ ސަލާމަތަށްޓަކައި އިސްކަންދޭ ކަމެއްގެ ގޮތުގައި އެމެރިކާގެ ރައީސް ޑޮނަލްޑް ޓްރަމްޕް ދެކެވަޑައިގަންނަވާ ކަމަށެވެ. އަދި މިއީ "އާކްޓިކް ސަރަހައްދުގައި ތިބި އަޅުގަނޑުމެންގެ ދުޝްމަނުން ހުއްޓުވުމަށް" ކޮންމެހެން ބޭނުންތެރި ކަމެއް ކަމަށްވެސް ބުނެފައިވެއެވެ.

"ޚާރިޖީ ސިޔާސަތުގެ މި މުހިންމު ލަނޑުދަނޑި ހާސިލުކުރުމަށްޓަކައި ރައީސާއި އެމަނިކުފާނުގެ ޓީމުން ދަނީ ތަފާތު އިޚްތިޔާރުތަކާ މެދު މަޝްވަރާ ކުރައްވަމުން. އަދި ހަމަކަށަވަރުންވެސް، އެމެރިކާގެ އަސްކަރިއްޔާގެ ބޭނުންކުރުމަކީ ކޮމާންޑަރ-އިން-ޗީފްގެ އަތްޕުޅުގައި އަބަދުވެސް އޮތް އިޚްތިޔާރެއް،" އެ ބަޔާނުގައިވެއެވެ.

ޒަމާންވީ ބައިވެރިއެއް ކަމަށްވާ ޑެންމާކުގެ އަތުން ގްރީންލޭންޑް އަތުލުމަށް އެމެރިކާއިން ކުރާ ކޮންމެ މަސައްކަތަކީ ނޭޓޯ އިއްތިހާދަށް ބޮޑު ސިހުމެއް ލިބި، ޓްރަމްޕާއި ޔޫރަޕްގެ ލީޑަރުންނާ ދެމެދު އޮތް ނުތަނަވަސްކަން އިތުރަށް ބޮޑުވެގެންދާނެ ކަމެކެވެ.

ނަމަވެސް، ކުރިމަތިވަމުންދާ ދެކޮޅުވެރިކަމުގެ ސަބަބުން ޓްރަމްޕް ފަހަތަކަށް ނުޖެހެއެވެ.

ގްރީންލޭންޑަށް އޮތް ޝައުގުވެރިކަން އެންމެ ފުރަތަމަ 2019 ވަނަ އަހަރު އެމަނިކުފާނުގެ ފުރަތަމަ ދައުރުގައި ފާޅުކުރެއްވިއިރު، ކަރަކަސްއަށް ދިން ހަމަލާއެއްގައި ވެނެޒުއޭލާގެ ރައީސް ނިކޮލަސް މަދޫރޯ އެމެރިކާއިން ވަގަށް ނެގުމާ ގުޅިގެން އެ ޝައުގުވެރިކަން މިހާރު ވަނީ އަލުން އާވެފައެވެ.

އެ އޮޕަރޭޝަނުން ލިބުނު ހިތްވަރާއެކު ޓްރަމްޕް ވިދާޅުވެފައިވަނީ "ހުޅަނގުގެ ބިތުގައި އެމެރިކާގެ ބާރުވެރިކަމާ މެދު ދެން ދުވަހަކުވެސް ސުވާލެއް ނުއުފެދޭނެ" ކަމަށެވެ. އަދި ކޮލަމްބިއާއާއި ކިއުބާއަށް ދެމުންދާ ފިއްތުންތައް ވަނީ އިތުރުކޮށްފައެވެ. މީގެ އިތުރުން، ގްރީންލޭންޑް ކޮންޓްރޯލް ކުރުމަކީ އެމެރިކާގެ ގައުމީ ސަލާމަތަށް ކޮންމެހެން ބޭނުންތެރި ކަމެއް ކަމަށް ވަކާލާތު ކުރައްވަމުން ޓްރަމްޕް ތުހުމަތު ކުރެއްވި ގޮތުގައި، އެ ރަށަކީ "ރަޝިއާ އާއި ޗައިނާގެ އުޅަނދުތަކުން ފުރިފައިވާ" ތަނެކެވެ. އަދި އެތަން ހިމާޔަތްކުރުމުގެ ގާބިލުކަން ޑެންމާކުގެ ކިބައިގައި ނެތް ކަމަށްވެސް ވިދާޅުވިއެވެ.

ދުނިޔޭގެ އެންމެ ބޮޑު ރަށް ކަމަށްވާ ގްރީންލޭންޑްގައި ދިރިއުޅެނީ އެންމެ 57,000 މީހުން ކަމަށްވީ ނަމަވެސް، އެމެރިކާގެ ބައެއްގެ ގޮތުގައި އޮންނަން ބޭނުންނުވާ ކަމަށް އެ ގައުމުން ތަކުރާރުކޮށް ބުނަމުންދެއެވެ.

ޔޫރަޕާއި އުތުރު އެމެރިކާއާ ދެމެދު ގްރީންލޭންޑް އޮންނަ މުހިންމު ސަރަހައްދުގެ ސަބަބުން، އެއީ އެމެރިކާގެ ބެލިސްޓިކް މިސައިލް ޑިފެންސް ސިސްޓަމަށް ވަރަށް މުހިންމު ތަނެކެވެ. އަދި އެތަނުގައި ހުރި މައުދަނީ މުއްސަނދިކަމަކީ ޗައިނާގެ އެކްސްޕޯޓަށް ބަރޯސާވާ މިންވަރު ކުޑަކުރުމަށް ވޮޝިންގޓަނުން ގެންގުޅޭ އަމާޒާ ގުޅޭ ކަމެކެވެ.

ވައިޓް ހައުސްގެ ބަޔާން އަންގާރަ ދުވަހު ނެރުނީ، ފްރާންސް، ޖަރުމަނު، އިޓަލީ، ޕޮލެންޑް، ސްޕެއިން އަދި އިނގިރޭސިވިލާތުގެ ލީޑަރުން ޑެންމާކުގެ ބޮޑުވަޒީރު މެޓޭ ފްރެޑްރިކްސަންއާ ގުޅިވަޑައިގެން، ގްރީންލޭންޑަކީ "އެތަނުގެ ރައްޔިތުންގެ މިލްކެއް" ކަމަށް ބުނެ ބަޔާނެއް ނެރުއްވާފައިވަނިކޮށެވެ.

"ޑެންމާކާއި ގްރީންލޭންޑާ ގުޅޭ ކަންކަމުގައި ގޮތް ނިންމާނީ ހަމައެކަނި ޑެންމާކާއި ގްރީންލޭންޑުން،" އެ ބޭފުޅުން ވިދާޅުވިއެވެ.

ކެނެޑާގެ ބޮޑުވަޒީރު މާކް ކާނީ ވެސް ވަނީ ތާއީދު ފާޅުކުރައްވައި، އިންއުއިޓް (Inuit) ދަރިކޮޅުގެ ގަވަރުނަރު ޖެނެރަލް މޭރީ ސައިމަން އާއި ޚާރިޖީ ވަޒީރު އަނީތާ އާނަންދު އަންނަ މަހުގެ ކުރީކޮޅު ގްރީންލޭންޑަށް ޒިޔާރަތް ކުރައްވާނެ ކަމަށް އިއުލާނު ކުރައްވާފައެވެ.

ވަކި ބަޔާނެއްގައި، ނޯޑިކް ގައުމުތަކުގެ ޚާރިޖީ ވަޒީރުން (ފިންލޭންޑް، އައިސްލޭންޑް، ނޯވޭ، ސްވިޑަން އަދި ޑެންމާކް) ވެސް ވަނީ އަމިއްލަ ކަންކަމުގައި ގޮތް ނިންމުމުގެ ހައްގު ގްރީންލޭންޑަށް އޮތްކަން ފާހަގަކުރައްވާފައެވެ. އަދި އާކްޓިކް ސަރަހައްދުގެ ސަލާމަތަށް ކުރާ އިންވެސްޓްމަންޓްތައް އިތުރުކޮށްފައިވާ ކަމަށާއި، އެމެރިކާ އާއި ނޭޓޯގެ އެހެން ބައިވެރިންނާ މަޝްވަރާކޮށްގެން އިތުރު މަސައްކަތްތައް ކުރުމަށް ތައްޔާރަށް ތިބި ކަމަށްވެސް ބުނެފައިވެއެވެ.

ޕޮލެންޑްގެ ބޮޑުވަޒީރު ޑޮނަލްޑް ޓުސްކް ވެސް ވަނީ ނޭޓޯގެ މެންބަރަކަށް ދޭ އިންޒާރުތަކުގެ ސަބަބުން އެ އިއްތިހާދުގެ އިތުބާރު ގެއްލޭ ކަމަށް ބުނެ އިންޒާރު ދެއްވާފައެވެ. "ނޭޓޯގެ އެއްވެސް މެންބަރަކު އަނެއް މެންބަރަކަށް ހަމަލާދީ ނުވަތަ އިންޒާރު ދީގެން ނުވާނެ،" އޭނާ ވިދާޅުވިއެވެ."އެހެން ނޫންނަމަ، ނޭޓޯގެ އެއްވެސް މާނައެއް ނޯންނާނެ،" އޭނާ ވިދާޅުވިއެވެ.

ގްރީންލޭންޑްގެ ބޮޑުވަޒީރު ޖެންސް-ފްރެޑްރިކް ނީލްސަން، ވިލާތުގެ ލީޑަރުން ވެވަޑައިގެންނެވި އެއްބާރުލުމުގެ ވައުދަށް މަރުހަބާ ވިދާޅުވެ، "އިހުތިރާމްގެ މައްޗަށް ބިނާވެފައިވާ މަޝްވަރާއަކަށް" އެމެރިކާއަށް ކުރެއްވި އިލްތިމާސް އާކުރެއްވިއެވެ.

މިދަނޑިވަޅުގައި، ގްރީންލޭންޑް ހިމާޔަތްކުރުމުގެ ގާބިލުކަން ޑެންމާކްގެ ކިބައިގައި ނެތް ކަމަށް ވިދާޅުވެ ޓްރަމްޕް ދެއްކެވި ވާހަކަތައް ޑެންމާކުން ވަނީ ދޮގުކޮށްފައެވެ.

"ގްރީންލޭންޑަކީ ޗައިނާގެ އިންވެސްޓްމަންޓްތަކުން ފުރިފައިވާ ތަނެއް ކަމަށް ނުވަތަ ގްރީންލޭންޑްގެ އައްސޭރިފަށުގައި ޗައިނާގެ ހަނގުރާމަމަތީ މަނަވަރުތައް ދަތުރުކުރަމުންދާ ކަމަށް ދެކެވޭ ވާހަކަތަކާ އަޅުގަނޑުމެން އެއްބަހެއް ނުވަން،" ޑެންމާކްގެ ފޮރިން މިނިސްޓަރު ލާސް ލޮކޭ ރަސްމުސަން ވިދާޅުވިއެވެ. އަދި އެ ރަށުގައި އެމެރިކާއިން އިތުރަށް އިންވެސްޓް ކުރުމަށް މަރުހަބާ ކިޔާ ކަމަށްވެސް އޭނާ ވިދާޅުވިއެވެ.

ގްރީންލޭންޑްގެ ސަރުކާރުން ބުނީ، މި ހާލަތާ ބެހޭގޮތުން މަޝްވަރާ ކުރުމަށް އެމެރިކާގެ ސެކްރެޓަރީ އޮފް ސްޓޭޓް މާކޯ ރޫބިއޯއާ އެކު، ރަސްމުސަންއާ އެކު އަވަސް ބައްދަލުވުމަކަށް އެދިފައިވާ ކަމަށެވެ.

މީގެއިތުރުން، ގްރީންލޭންޑަށް ކަނޑައަޅާފައިވާ އެމެރިކާގެ ހާއްސަ މަންދޫބުގެ މަގާމަށް ޓްރަމްޕް މިދިޔަ މަހު އައްޔަން ކުރެއްވި ލޫއިނާގެ ގަވަރުނަރު ޖެފް ލޭންޑްރީ އަންގާރަ ދުވަހު ވިދާޅުވީ، ގްރީންލޭންޑްގެ މައްސަލައިގައި ޑެންމާކްގެ މީހުންނާ ނުވަތަ ވިލާތުގެ ޑިޕްލޮމޭޓުންނާ ވާހަކަ ދެއްކުމަށް އޭނާ ޝައުގުވެރިނުވާ ކަމަށެވެ.

އޭގެ ބަދަލުގައި، އޭނާ ބޭނުންވަނީ ސީދާ ގްރީންލޭންޑްގެ ރައްޔިތުންނާ ވާހަކަ ދައްކަން ކަމަށް ވިދާޅުވިއެވެ. "އަޅުގަނޑު ބޭނުންވަނީ ގްރީންލޭންޑްގެ ދިރިއުޅުމުގެ ފެންވަރު ރަނގަޅު ކުރުމުގެ ފުރުސަތަކަށް އެދޭ މީހުންނާ ވާހަކަ ދައްކަން،" ފޮކްސް ނިއުސް ރޭޑިއޯ ޝޯއެއްގައި ރިޕަބްލިކަން ޕާޓީގެ މި މެންބަރު ވިދާޅުވިއެވެ.

ވަކިން ފާހަގަކޮށްލެވޭ ގޮތުގައި، ދަ ވޯލް ސްޓްރީޓް ޖާނަލްއިން ރިޕޯޓްކޮށްފައިވާ ގޮތުގައި، ކޮންގްރެސްގެ ބްރީފިންއެއްގައި ރޫބިއޯ ވަނީ، ފަހަކަށް އައިސް ދެމުންދާ އިންޒާރުތަކަކީ ގްރީންލޭންޑަށް ވަގުތުން އަރައިގަތުމުގެ ނިޝާނެއް ނޫން ކަމަށާއި، އަމާޒަކީ ޑެންމާކްގެ އަތުން އެ ރަށް ގަތުން ކަމަށް އެމެރިކާގެ ގާނޫނު ހަދާ މަޖިލީހުގެ މެންބަރުންނަށް ވިދާޅުވެފައެވެ.

ވައިޓް ހައުސްގެ ޑެޕިއުޓީ ޗީފް އޮފް ސްޓާފް ސްޓީވަން މިލާ ވެސް ވަނީ ޑެންމާކްގެ ސިޔާދަތާ މެދު އުފެދިފައިވާ ކަންބޮޑުވުންތަކަށް ފުރަގަސްދެއްވާފައެވެ.

"ބައިނަލްއަގުވާމީ ރީތި އުސޫލުތަކާއި އެހެނިހެން ކަންކަމާ ބެހޭގޮތުން ބޭނުންވަރަކަށް ވާހަކަ ދެއްކިދާނެ،" މިލާ ސީއެންއެންއަށް ވިދާޅުވިއެވެ. "އެކަމަކު އަޅުގަނޑުމެން މި ދިރިއުޅެނީ ބާރާއި، ނުފޫޒާއި، ހަކަތައިގެ މައްޗަށް ބިނާވެފައިވާ ހަގީގީ ދުނިޔެއެއްގައި."

ކޮންގްރެސްގެ މެންބަރުން، އޭގެ ތެރޭގައި ޓްރަމްޕްގެ ރިޕަބްލިކަން ޕާޓީގެ ބައެއް މެންބަރުން ވެސް ހިމެނޭ ގޮތަށް، މިކަމާ ދެކޮޅަށް ތެދުވިއެވެ.

"ގްރީންލޭންޑަކީ ވިއްކާލަން އޮތް ތަނެއް ނޫން ކަމަށް ޑެންމާކާއި ގްރީންލޭންޑުން ސާފުކޮށް ބުނުމުން، އެމެރިކާއިން ޖެހޭނީ މުއާހަދާތަކުގެ ދަށުން އަދާކުރަންޖެހޭ ޒިންމާތަކަށް އިހުތިރާމްކޮށް، ޑެންމާކްގެ ރަސްކަމުގެ ސިޔާދަތާއި ސަރަހައްދީ ނުގުޑާ ފުރިހަމަކަމަށް އިހުތިރާމް ކުރަން،" ސެނެޓް ނޭޓޯ އޮބްޒާވަރ ގްރޫޕްގެ ކޯ-ޗެއާސް، ޑިމޮކްރެޓިކް ސެނެޓަރ ޖީން ޝަހީން އަދި ރިޕަބްލިކަން ސެނެޓަރ ތޮމް ޓިލިސް ވިދާޅުވިއެވެ.